1 ཏ༌ ཁྲིམས༌ ཤེས༌ཁན༌ ངའེ༌ སྤུན༌, ཁྱོ༌ཞ༌གུན༌ལ༌ ཅི༌ གྱུས༌མེད༌ད༌? ཁྲིམས༌སི༌ ཝང༌བོ༌ མི༌ཞིག༌གི༌ཀ༌ ཁོ༌ སོན༌ཏེའ༌ ཡོད༌ཡོད༌ཚོག༌པ༌, གྲུལ༌ལ༌ནོག༌། 2 སྤེར༌ན༌, ཁྲིམས༌ ནང༌ཞིན༌ ན༌མ༌ ཅོ༌ཁན༌ནི༌ བུ༌མོ༌བོའེ༌ ཁོ༌རང༌ངི༌ མག༌པ༌ སོན༌ཏེའ༌ ཡོད༌ཡོད༌ཚོག༌པ༌ ཁོ༌ ཉམ༌པོ༌ ཨིད༌ཤེས༌ཅན༌ནི༌ བྲེལ༌ བོར༌གོས༌། ཨིན༌ནའང༌ གལ༌ཏེས༌ ཁོའེ༌ མག༌པ༌ ཤི༌ན༌, ཁོ༌ མག༌པ༌ ཉམ༌པོ༌ ཨིད༌ཤེས༌ཅན༌ དུག༌ཅེས༌སི༌ ཁྲིམས༌པོ༌ སྲུང༌ཅེས༌ནེ༌ བུད༌ཏེ༌ ཨིན༌ནོག༌། 3 གལ༌ཏེས༌ མག༌པ༌བོ༌ སོན༌ཏེའ༌ ཡོད༌ ཟ༌ནེ༌, ཏེ༌ བུ༌མོ༌བོའེ༌ ཞན༌ཞིག༌ག༌ ན༌མ༌ ཅོ༌ན༌, ཁོའེ༌ ཞིད༌མད༌ མན༌པ༌ ཞན༌མི༌ཞིག༌ ཉམ༌པོ༌ ལུས༌བྲེལ༌ ཅོ༌ཁན༌ནི༌ སྡིག༌པ༌ ཅོས༌ཏེ༌ ཨིན༌ནོག༌། ཨིན༌ནའང༌ གལ༌ཏེས༌ ཁོའེ༌ མག༌པ༌བོ༌ ཤི༌ཏེ༌ སྟིང༌ནེ༌, ཡང༌ ན༌མ༌ ཅོ༌ན༌, ཁོ༌ ཁྲིམས༌ ནང༌ཞིན༌ ལོག༌ཡེམ༌མི༌ སྡིག༌པ༌ ཅོ༌ཅེས༌ནེ༌ མ༌གལ༌ལ༌ ཨིན༌ནོག༌།

4 ཏེན༌ན༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ ཤི༌ ཟ༌ནེ༌, ཁྱོ༌ཞ༌གུན༌ ཁྲིམས༌སི༌ ཝང༌ངི༌ ཀ༌ནེའང༌ ཤི༌ཏེ༌ ཨིན༌ནོག༌། ཏ༌ ཁྱོ༌ཞ༌གུན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཁན༌བོ༌ ཉམ༌པོ༌ ཅིག༌གྲིལ༌ སོང༌ཏེ༌ ཨིན༌ནོག༌། ཏེ༌བོའེ༌ ཞས༌ཏེ༌ ང༌དང༌གུན༌ནི༌ དཀོན༌མཆོག༌གི༌ ཕིའ༌ ལས༌ ཟང༌པོའེ༌ བྲས༌བུ༌ སྨིན༌ཅུག༌ཐུབ༌ཨིན༌། 5 ང༌དང༌གུན༌ སྔུན༌མའེ༌ སྕོད༌པའེ༌ ཝང༌ངི༌ ནང༌ང༌ ཡོད༌ ཟ༌ནེ༌, ང༌དང༌གུན༌ནི༌ ནང༌ང༌ སྡིག༌པའེ༌ དོད༌པ༌གུན༌ནི༌ ལས༌ ཅོའད༌པིན༌། ཡང༌ ཁྲིམས༌སི༌, ཏེ༌ དོད༌པ༌ ངན༌པ༌གུན༌ ལང༌ཅུགས༌ཏེ༌ སྡིག༌པའེ༌ ལས༌སི༌ སྟོན༌ཐོག༌ སྨིན༌ ཅུག༌ག༌ནོག༌, ཀ༌བོའེ༌ བྲས༌བུ༌ ཤི༌ཅེས༌པོ༌ ཨིན༌ནོག༌། 6 ཨིན༌ནའང༌ ཏ༌ ང༌དང༌གུན༌ ཁྲིམས༌སི༌ ཀ༌ནེ༌ བུད༌ཏེ༌ ཨིན༌ནོག༌, ཅིའ༌ཟེར༌ན༌ ང༌དང༌གུན༌ ལྡམས༌ཏེ༌ བོར༌ཁན༌ནི༌ ཁྲིམས༌པོའེ༌ ཕིའ༌ ཤི༌ཏེ༌ ཨིན༌ནོག༌། ཏ༌ བྲིས༌ཁན༌ནི༌ ཁྲིམས༌པོའེ༌ ཞབ༌སྟོག༌ མ༌ཅོའ༌, དམ༌པའེ༌ ཐུག༌ཉིད༌དི༌ ནང༌ང༌ མི༌ཚེ༌ སོ༌མ༌ཞིག༌ ཕུད༌ཨིན༌, ང༌དང༌གུན༌ནི༌ དཀོན༌མཆོག༌ག༌ ཞབ༌སྟོག༌ ཞུ༌ཨིན༌།

7 ཅི༌ ཏེ༌ནེ༌, ངའེ༌ དཀོན༌མཆོག༌གི༌ ཁྲིམས༌པོ༌ ངན༌པ༌ ཨིན༌ནོག༌ ཟེར༌ཏེ༌ ཨིན༌ནོག༌ག༌? མ༌ནེ༌ མན༌། ངོས༌པོའ༌ ངའ༌, ང༌རང༌ངི༌ སྡིག༌པ༌གུན༌ ལྟན༌ཁན༌བོ༌ ཏེན༌ན༌ ཁྲིམས༌པོ༌ ཨིན༌པིན༌། གལ༌ཏེས༌ ཁྲིམས༌པོའེ༌ "ཞན༌མའེ༌ ཨིན༌ཁན༌བོའ༌ དོད༌པ༌ མ༌ཅོ༌ *7:7 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 20:17 དང༌ ཁྲིམས༌སི༌ སྤེ༌ཆ༌ ཉིས༌པའེ༌ 5:21 " མ༌ཟེར༌པིན༌ན༌, ཞན༌མའེ༌ ཨིན༌ཁན༌ལ༌ དོད༌པ༌ ཅོ༌ཅེས༌པོ༌ སྡིག༌པ༌ ཨིན༌ཁན༌ ངའ༌ གྱུས༌ མ༌ཆའ༌ ཡོད༌གྲོ༌། 8 ཨིན༌ནའང༌ སྡིག༌པའེ༌, ཏེ༌ བཀའ༌བོ༌ ཀོལ༌ཏེ༌ ངའེ༌ ནང༌ང༌ ཞན༌མའེ༌ ཨིན༌ཁན༌བོའ༌ དོད༌པ༌ ཅོ༌ཅེས༌སི༌ རིགས༌ ཚང༌མ༌ སྐྱེ༌ཅུགས༌། གལ༌ཏེས༌ ཁྲིམས༌ མེད༌པིན༌ན༌, སྡིག༌པའ༌, ཏེ༌ ཝང༌བོ༌ མེད༌གྲོ༌། 9 ཏུས༌ཤིག༌ག༌ ངའེ༌ ཁྲིམས༌སི༌ ཧ༌གོ༌མེད༌པ༌ མི༌ཚེ༌ ཕུད༌དད༌པིན༌, ཨིན༌ནའང༌ ངའ༌ དཀོན༌མཆོག༌གི༌ བཀའ༌བོ༌ ཧ༌གོའ༌ནའང༌, ངའེ༌ མི༌ཚེའེ༌ ནང༌ང༌ སྡིག༌པའེ༌ ལས༌ ཅོ༌ཅེས༌ གོ༌ཟུགས༌, ཡང༌ ང༌ ཤི༌། 10 ཏེ༌ནེ༌ ངའེ༌ ཐོང༌, ཏེན༌ན༌ ཁྲིམས༌སི༌ བཀའ༌བོའེ༌, ངའ༌ མི༌ཚེ༌ ཁྱོང༌ཅེས༌སི༌ ཚབས༌ལ༌, ངའེ༌ ཕིའ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌། 11 སྡིག༌པའེ༌ ཏེ༌ བཀའ༌བོའེ༌ ཕན༌ཐོགས༌ ལེན༌ཏེ༌ ངའ༌ གོབ༌སྐོརས༌, ཡང༌ ཏེན༌ན༌ བཀའ༌བོ༌ ཀོལ༌ཏེ༌ ངའེ༌ཀ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌། 12 ཨིན༌ནའང༌ ཁྲིམས༌པོ༌ དག༌སའང༌ དམ༌པ༌ ཨིན༌ནོག༌, ཡང༌ ཏེ༌བོའེ༌ བཀའ༌གུན༌ དམ༌པ༌, དྲང༌པོ༌ དང༌ ཟང༌པོ༌ ཨིན༌ནོག༌།

13 ཏེ༌ནེ༌ ཅི༌, ཟང༌པོ༌ ཨིན༌ཁན༌ནི༌ ཁྲིམས༌པོའེ༌, ངའ༌ ཤི༌ཅེས༌པོ༌ ཁྱོངས༌ས༌? མ༌ནེ༌ མ༌ཁྱོངས༌། སྡིག༌པའེ༌, ཟང༌པོ༌ ཨིན༌ཁན༌བོའེ༌ ཕན༌ཐོགས༌ ལེན༌ཏེ༌ ངའེ༌ཀ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌། འོ༌ན༌ དཀོན༌མཆོག༌གི༌ བཀའ༌ གྱུད༌ཏེ༌ ང༌དང༌ང༌ སྡིག༌པ༌ མངས༌ཏེའང༌ ངན༌པ༌ ཨིན༌ཁན༌བོ༌ ཧ༌གོའ༌ནོག༌།

14 ང༌དང༌གུན༌ལ༌ གྱུས༌ཨིན༌ནོག༌, དཀོན༌མཆོག༌གི༌ ཁྲིམས༌པོའེ༌ མི༌ཚེ༌ དྲང༌པོ༌ ཕུད༌ཅེས༌ལ༌ ཁྲིད༌ད༌ནོག༌, ཨིན༌ནའང༌ ང༌ ང༌རང༌ངི༌ སྡིག༌ཅན༌ དོད༌པ༌གུན༌ནི༌ ཁྲིད༌དུག༌། ཏེ༌བོ༌ ནི༌ ང༌ སྡིག༌པའེ༌ ཚེ༌ཡོག༌ག༌ ཙོངས༌ཁན༌ ཙོགས༌ ཨིན༌ནོག༌། 15 ངའེ༌ ཅོ༌ཨིན༌ ཡོད༌ཁན༌བོ༌ ང༌ ཧ༌གོའ༌ མེ༌རག༌, ཅིའ༌ཟེར༌ན༌ ངའ༌ དྲང༌པོ༌ ཅོ༌ཉིན༌ ཡོད༌ནའང༌ ངའེ༌ ཅོའ༌ མི༌དུག༌, མ༌ཚད༌ ངའེ༌ ཏེ༌བོ༌ ཅོ༌རུག༌ ཀ༌བོའ༌ ངའེ༌ ནཕ༌རད༌ ཅོའད༌། 16 ཡང༌ གལ༌ཏེས༌ ངའེ༌ མི༌ཅོ༌ སམ༌ཁན༌ནི༌ ལས༌པོ༌ ཅོ༌ན༌, ཏེ༌ནེ༌ ཁྲིམས༌ ཟང༌པོ༌ ཨིན༌ཁན༌བོའ༌ ངའེ༌ སེམས༌སི༌ ཆོགས༌སྐྱོར༌ ཅོས༌ཏེ༌ ཨིན༌ནོག༌། 17 ཏེ༌ནེ༌ ངན༌པ༌ ཅོ༌ཁན༌བོ༌ ངའ༌ མན༌པ༌ ངའེ༌ ནང༌ང༌ ནས༌ཏེ༌ ཡོད༌ཁན༌ནི༌ སྡིག༌པ༌བོ༌ ཨིན༌ནོག༌། 18 ཡང༌ ངའ༌ གྱུས༌ཡོད༌, ངའེ༌ ནང༌ང༌ ཟང༌པོ༌ ཅིག༌གའང༌ ནས༌ས༌ མེད༌, ཏེ༌བོ༌ ངའེ༌ སྡིག༌ཅན༌ སྕོད༌པ༌བོ༌ ཨིན༌། ངའ༌ དྲང༌པོ༌ ཅོ༌ཉིན༌ ཡོད༌ནའང༌ ངའ༌ ཅོ༌ཉན༌ན༌ མི༌དུག༌། 19 ངའེ༌ ཟང༌པོ༌ ཅོ༌ཉིན༌ ཡོད༌ནའང༌ ཅོའ༌ མི༌དུག༌། ངའེ༌ ངན༌པ༌ ཅོ༌ཉིན༌ མེད༌ནའང༌ ཏེ༌བོ༌ ཅོ༌དུག༌། 20 ཏ༌ གལ༌ཏེས༌ ངའེ༌ ཅོ༌ཉིན༌ མེད༌ཁན༌བོ༌ ཅོ༌ན༌, ཏེ༌ནེ༌ ཏན༌ཏན༌ལ༌ ངན༌པ༌ ཅོ༌ཁན༌བོ༌ ང༌ མན༌པ༌, ངའེ༌ ནང༌ང༌ ནས༌ཏེ༌ ཡོད༌ཁན༌ནི༌ སྡིག༌པ༌བོ༌ ཨིན༌ནོག༌།

21 ཏ༌ ང༌དང༌ངི༌ ནང༌ང༌ ཝང༌ཞིག༌གི༌ ལས༌ ཅོ༌ཁན༌བོ༌ ངའ༌ ཧ༌གོ༌, ངའེ༌ དྲང༌པོ༌ ཅོ༌ཉིན༌ ཡོད༌ ཟ༌ནེ༌, ངན༌པ༌ ངའ༌ ཉམ༌པོ༌ དུགས༌ཏེ༌ ཡོང༌དུག༌། 22 ངའེ༌ སེམས༌ གང༌པོ༌ནེ༌ དཀོན༌མཆོག༌གི༌ ཁྲིམས༌ལ༌ ཅམས༌པ༌ ཅོའད༌། 23 ཨིན༌ནའང༌ ངའེ༌ ནང༌ང༌, ཏེ༌ ཝང༌བོའེ༌ ངའེ༌ ཁྲིམས༌ ཁའ༌ཉན༌ཅེས༌སི༌ དོད༌པའེ༌ གྱབ༌གལ༌ལ༌ ནོལ༌ལ༌རག༌། ཏེ༌ ཝང༌བོའེ༌, ངའ༌, ངའེ༌ ནང༌ང༌ ཡོད༌ཁན༌ནི༌ སྡིག༌པའེ༌ ཚེ༌ཡོག༌ གྱུར༌ཅུག༌དུག༌། 24 ང༌ ཙམ༌ཤིག༌གི༌ རྡུག༌པོ༌ མི༌ཞིག༌ མ༌ནོག༌! སུའི༌ ངའ༌ ཤི༌ཅེས༌ ཁྱོང༌ཁན༌ནི༌ འི༌ ཟུགས༌པའེ༌ ནང༌ནེ༌ ཐར༌ཅུག༌ཨིན༌? 25 དཀོན༌མཆོག༌ག༌ ཐུག༌རྗེ༌ཆེ༌! ང༌ ཐར༌ཅུག༌ཁན༌བོ༌ ནི༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཨིན༌ནོག༌། སོང༌པ༌སང༌ ཐོང༌དུག༌ག༌, འི༌བོ༌ ཀ༌ཟུག༌གི༌ ཨིན༌ནོག༌? ང༌རང༌ངི༌ སེམས༌སི༌ ནང༌ང༌ ངའེ༌ དེན༌བ༌ དཀོན༌མཆོག༌གི༌ ཁྲིམས༌པོ༌ ཁའ༌ཉན༌ཉིན༌རག༌, ཨིན༌ནའང༌ ངའེ༌ སྡིག༌པའེ༌ སྕོད༌པའེ༌ ཞས༌ཏེ༌ ང༌ སྡིག༌པའེ༌ ཡོག༌པོ༌ ཨིན༌།