14
ཏད༌པའེ༌ ནང༌ང༌ ཤུགས༌མེད༌ དང༌ ཤུགས༌ཅན༌།
14:1 ནེ༌ 23
1 ཏད༌པའེ༌ ནང༌ང༌ འུ༌ཐུགས༌ ཡོད༌ཁན༌གུན༌ ཁྱོ༌ཞ༌གུན༌ནི༌ ཕྲོའ༌ སྲེས༌, ཨིན༌ནའང༌ ཁོང༌གུན༌ནི༌ སམ༌ཚུལ༌ ཀ༌བོ༌ སེམས༌ཉིད༌དི༌ ཐོག༌ནེ༌ ཁག༌ཅན༌ མན༌ ཏེ༌གུན༌ནི༌ སྐོར༌ལ༌ ཛིང༌མོ༌ མ༌ཏང༌ཤིག༌། 2 སྤེར༌ན༌ མི༌ ཅིག༌གི༌ ཏད༌པའེ༌ ཁོའ༌ ཅི༌ཚང༌མ༌ ཟའ༌ནའང༌ ཆོགས༌ ཟེར༌ར༌ནོག༌, ཨིན༌ནའང༌ ཏད༌པ༌ འུ༌ཐུགས༌ ཡོད༌ཁན༌ ཡང༌མི༌ཞིག༌གི༌, ཚོད༌མ༌ མ༌ནེ༌ ཟའ༌ མ༌ནོག༌། 3 ཅི༌ཚང༌མ༌ ཟའ༌ཁན༌གུན༌ནི༌ ཚོད༌མ༌ མ༌ནེ༌ མ༌ཟའ༌ཁན༌གུན༌ལ༌ ཉམ༌ཤུང༌ རྩི༌ཝ༌ མེད༌ཁན༌ ཙོགས༌ལ༌ ལྟའ༌ མ༌གོས༌། ཡང༌ ཤ༌ མ༌ཟའ༌ཁན༌གུན༌ནི༌, ཟའ༌ཁན༌གུན༌ལ༌ སྡིག༌པ༌ ཅོས༌ཏེ༌ ཨིན༌ནོག༌ ཟེར༌ཏེ༌ ཉད༌གལ༌ ཀལ༌ མ༌གོས༌, ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ གའ༌སུས༌ ཞུའ༌ ཛད༌ཏེ༌ ཨིན༌ནོག༌། 4 ཞན༌མ༌ཞིག༌གི༌ ཞབ༌སྟོག༌པ༌ཞིག༌ག༌ ཁྲིམས༌ཅད༌ ཏང༌ཁན༌ ཁྱོ༌རང༌ སུ༌ ཨིན༌། ཁོང༌གུན༌ ནོངས༌མེད༌ ཨིན༌ན༌ མན༌, ཏེ༌བོ༌ ཁོ༌རང༌གུན༌ནི༌ སྤོན༌བོའེ༌ ཐག༌ཅད༌ སལ༌ཨིན༌། ཡང༌ ཁོང༌གུན༌ ནོངས༌མེད༌ ལུས༌ཨིན༌, ཅིའ༌ཟེར༌ན༌ གཙོ༌བོའེ༌, ཏེ༌གུན༌ ནོངས༌མེད༌ ཅོ༌ཉན༌ན༌ ཛད༌ད༌ནོག༌།
5 མི༌ ཅིག༌གི༌, ཞག༌ཅིག༌ ཡང༌ཞག༌གུན༌ནི༌ སང༌ མང༌ང༌ དམ༌པ༌ ཐེའ༌ནོག༌། ཞན༌ཡང༌ མི༌ ཅིག༌གི༌, ཞག༌ ཚང༌མ༌ ཙོགས༌ ཐེའ༌ནོག༌། ཁྱོ༌ཞའ༌ རེ༌རེའེ༌ རང༌རང༌ངི༌ སམ༌ཁན༌བོའེ༌ཀ༌ སྟན༌པོ༌ ཡོང༌གོས༌། 6 ཞག༌ཅིག༌ ཁག༌ཅན༌ ཐེས༌ཏེ༌ གཙོ༌བོའ༌ ཅོལ༌ཁན༌གུན༌ནི༌ ཏེ༌བོ༌ ཁོང༌ང༌ རྩི༌ཝ༌ ཕུལ༌ཅེས༌ལ༌ ཅོའ༌ནོག༌། ཤ༌ ཟའ༌ཁན༌གུན༌ནི༌ གཙོ༌བོའེ༌ རྩི༌ཝའེ༌ ནང༌ང༌ ཟའ༌ནོག༌, ཅིའ༌ཟེར༌ན༌ ཁོང༌གུན༌ནི༌ ཟའེ༌ སང༌ སྔུན༌ལ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཨིན༌ནོག༌། ཡང༌ ཤ༌ མ༌ཟའ༌ཁན༌གུན༌ནིའང༌ གཙོ༌བོའེ༌ རྩི༌ཝའེ༌ ནང༌ང༌ ཤ༌ ཟའ༌ མ༌ནོག༌ ཡང༌ ཁོང༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ནོག༌། 7 ང༌དང༌གུན༌ ང༌དང༌རང༌ངི༌ ཕིའ༌ སོན༌ཏེའ༌ དུག༌ག༌ མ༌ནོག༌ ཡ༌, ང༌དང༌རང༌ངི༌ ཕིའ༌ ཤིའ༌ མ༌ནོག༌། 8 གལ༌ཏེས༌ ང༌དང༌གུན༌ སོན༌ཏེ༌ མི༌ཚེ༌ ཕུད༌དད༌ན༌, ཏེ༌བོ༌ གཙོ༌བོའ༌ རྩི༌ཝའེ༌ ཕིའ༌ ཨིན༌ནོག༌། ཡང༌ གལ༌ཏེས༌ ང༌དང༌གུན༌ ཤི༌ན༌ ཏེ༌བོའང༌ གཙོ༌བོའེ༌ རྩི༌ཝའེ༌ ཕིའ༌ ཨིན༌ནོག༌། ཏེ༌བོའེ༌ཕིའ༌ ང༌དང༌གུན༌ སོན༌ཏེའ༌ ཡོད༌གྲོ༌ ཡ༌ ཤི༌ཏེ༌, ང༌དང༌གུན༌ གཙོ༌བོའེ༌ ཨིན༌ནོག༌། 9 ཤི༌ཁན༌ དང༌ སོན༌ཏེ༌ ཉིས༌ཀོའེ༌ གཙོ༌བོ༌ གྱུར༌ཅེས༌སི༌ གྱུན༌ཚན༌བོའེ༌ ཕིའ༌, མ༌ཤི༌ཀ༌ ཀྲོངས༌ས༌ ཛད༌ཏེ༌ ཡང༌སྐྱར༌ སོན༌ཏེའ༌ ཞངས༌ས༌ ཛདས༌།
10 ཏེ༌ནེ༌ ཅི༌ཕིའ༌ ཁྱོ༌རང༌ངི༌ སྤུན༌ཞིག༌ག༌ སྐྱོན༌ ཀལ༌ལད༌། ཡང༌ ཁོང༌གུན༌ལ༌ ཉམ༌ཤུང༌ རྩི༌ཝ༌ མེད༌ཁན༌ ཙོགས༌ལ༌ ཅིའ༌ ལྟའད༌། ཨིད༌ཏུ༌ ཅོ༌ཤིག༌, ང༌དང༌ ཚང༌མ༌ དཀོན༌མཆོག༌གི༌ ཁྲིམས༌ཅད༌དི༌ ཞུགས༌ཁྲིས༌སི༌ དུན༌ལ༌ ལང༌གོས༌ས༌ནོག༌། 11 དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
"གཙོ༌བོའེ༌ མོལས༌, 'ཀ༌ཟུག༌ ང༌ སོན༌ཏེའ༌ ཡོད༌ཁན༌བོ༌ དེན༌བ༌ ཨིན༌,
པིག༌མོ༌ ཚུགས༌ཏེ༌ ཚང༌མའེ༌ ངའ༌ ཆག༌ཕུལ༌ཨིན༌།
ལྕེ༌ ཚང༌མའེ༌ སྟོད༌པ༌ ཕུལ༌ཨིན༌ ང༌ དཀོན༌མཆོག༌ ཨིན༌ཁན༌བོའེ༌ སྤང༌པོ༌ ཏང༌ཨིན༌།'*14:11 ཡེ༌ཤ༌ཡཱའེ༌ སྤེ༌ཆའེ༌ 49:18 དང༌ 45:23 "
12 ཏེན༌ན༌བོའེ༌ཕིའ༌ ང༌དང༌ རེ༌རེའ༌ དཀོན༌མཆོག༌གི༌ སྐུན༌དུན༌ལ༌ རང༌རང༌ངི༌ ཅོ༌ཁན༌ ཚང༌མ༌ ཤད༌གོས༌ས༌ནོག༌, ཏེ༌ནེ༌ ཁོང༌ངི༌ ཁྲིམས༌ཅད༌ ཛད༌ཨིན༌། 13 སོང༌པ༌སང༌ ཅིག༌ དང༌ ཅིག༌ག༌ སྐྱོན༌རྗོད༌ མ༌ཅོ༌ཤིག༌། ཏེ༌བོའེ༌ ཚབས༌ལ༌, ཞན༌མ༌ ཏད༌པ༌ཅན༌ཞིག༌ སྒག༌གྱབས༌ཏེ༌ གྱེལ༌ མི༌ཅུག༌ཅེས༌སི༌ མི༌ཚེ༌ཞིག༌ ཕུད༌ཤིག༌།
14 ང༌ གྱུས༌ཡོད༌, ཡང༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ཟའ༌ཅེས༌སི༌ རིགས༌ ཚང༌མ༌ ཚི༌ཏུ༌ མན༌ཁན༌བོ༌ ང༌ ཏན༌ཏན༌ལ༌ ལོ༌ཁྱེལ༌ རག༌། ཨིན༌ནའང༌ གལ༌ཏེས༌ སུ༌ཞིག༌གི༌ ཏེ༌བོ༌ རྩང༌མ༌ མ༌ནོག༌ སམ༌ན༌, ཏེ༌ནེ༌ ཁོའེ༌ ཕིའ༌ ཏེ༌བོ༌ རྩང༌མ༌ མ༌ནོག༌། 15 གལ༌ཏེས༌ ཁྱོ༌ཞའེ༌ ཟའ༌ཅེས༌པོའེ༌, ཞན༌ཡང༌ སྤུན༌ཞིག༌ག༌ སེམ༌ཕམས༌ ཆ༌ཅུག༌ན༌, ཏེ༌ནེ༌ ཁྱོ༌ཞའེ༌ ཅེས༌པའེ༌ ནང༌ང༌ ལས༌ མ༌ཅོའ༌ ཨིན༌ནོག༌། ཁྱོ༌ཞ༌གུན༌ནི༌ ཟའ༌ཅེས༌པོའེ༌, ཁྱོ༌ཞ༌རང༌ངི༌ སྤུན༌ཞིག༌གི༌ ཏད༌པ༌ མེད༌ཁན༌ མ༌ཅོ༌ཤིག༌, ཀ༌བོའེ༌ ཏོན༌ལ༌ མ༌ཤི༌ཀ༌ ཀྲོངས༌ས༌ ཛདས༌། 16 ཁྱོ༌ཞའེ༌ གྱལ༌ལ༌ ཨིན༌ནོག༌ སམས༌ཏེ༌ ཅོ༌ཁན༌བོའ༌ སུ༌ཞིག༌གིའང༌ སྐྱོན༌རྗོད༌ ཅོ༌ མ༌ཅུག༌ཤིག༌། 17 དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཁག༌ཅན༌བོ༌ ནི༌, ཟའ༌ཅེས༌ དང༌ ཐུང༌ཅེས༌ མན༌པ༌, དམ༌པའེ༌ ཐུག༌ཉིད༌དི༌ ནང༌ང༌ ཞི༌དེ༌ དང༌ སྐྱིད༌པོའེ༌ མི༌ཚེ༌ དྲང༌པོ༌ཞིག༌ ཕུད༌ཅེས༌པོ༌ ཨིན༌ནོག༌། 18 གལ༌ཏེས༌ ཁྱོ༌ཞ༌གུན༌ནི༌ ཏེ༌ཟུག༌ མི༌ཚེ༌ ཕུད༌ཨིན༌ མ༌ཤི༌ཀ༌ ཞབ༌སྟོག༌ ཞུ༌ན༌, ཁྱོ༌ཞ༌གུན༌ནི༌ དཀོན༌མཆོག༌ ཐུགས༌ཐད༌ ཅུག༌ག༌ནོག༌, ཡང༌ ཞན༌མ༌གུན༌ནི༌ ཁྱོ༌ཞ༌གུན༌ལ༌ རྩི༌ཝ༌ ཅོ༌ཨིན༌། 19 ང༌དང༌གུན༌ནི༌ ཆོས༌ཚོགས༌སི༌ ནང༌ང༌ ཞི༌དེ༌ ཁྱོང༌ཅེས༌ དང༌ གཙོ༌བོའེ༌ ནང༌ང༌ ཅིག༌ དང༌ ཅིག༌ ལྡན༌ཅུག༌ཅེས༌སི༌ ནང༌ང༌ སྲན༌ཏྲེ༌ རྩོན༌གྲུས༌ ཅོ༌ཨིན༌།
20 ཟའ༌ཅེས༌ཤིག༌གི༌ ཏོན༌ལ༌ དཀོན༌མཆོག༌གི༌ ཆག༌ལས༌པོ༌ མེད༌ཁན༌ མ༌ཅོ༌། ཟའ༌ཅེས༌ ཚང༌མ༌ རྩང༌མ༌ ཨིན༌ནོག༌། ཨིན༌ནའང༌ ཁྱོ༌ཞའེ༌ ཟའ༌ཅེས༌པོའེ༌ ཞན༌མི༌ཞིག༌ ཏད༌པའེ༌ ནང༌ང༌ སྒག༌གྱབ༌ཅུག༌གད༌ན༌, ཏེ༌ནེ༌ ཏེ༌བོ༌ གྱལ༌ལ༌ཞིག༌ ཅོས༌ཏེ༌ མ༌ནོག༌། 21 ཤ༌ ཟའ༌ཅེས༌ ཡ༌ ཆང༌ ཐུང༌ཅེས༌ ཡ༌ ཞན༌ཡང༌ ལས༌གུན༌ནི༌, ཁྱོ༌ཞ༌རང༌ངི༌ སྤུན༌ཞིག༌ག༌ ཏད༌པའེ༌ ནང༌ང༌ སྒག༌གྱབ༌ཅུག༌གད༌ན༌, ཏེ༌ནེ༌ ཏེ༌གུན༌ མ༌ཅོ༌ན༌ མང༌ང༌ གྱལ༌ལ༌ ཨིན༌ནོག༌། 22 ཏེ༌ ཚང༌མའེ༌ སྐོར༌ལ༌ ཁྱོ༌ཞ༌གུན༌ནི༌ ཏད༌པ༌ ཅོ༌ཁན༌བོ༌ དཀོན༌མཆོག༌ དང༌ ཁྱོ༌ཞ༌རང༌གུན༌ནི༌ པར༌ལ༌ བོར༌ཤིག༌། ཟང༌པོ༌ ཨིན༌ སམས༌ཏེ༌ ཅོ༌ཁན༌ནི༌ ལས༌པོའེ༌ཀ༌ ནོངས༌ཅན༌ མ༌ཚོར༌ཁན༌གུན༌, ཙམ༌ཤིག༌གི༌ ཅིན༌ལབས༌ཅན༌ མ༌ནོག༌། 23 ཨིན༌ནའང༌ ཐེ༌ཚོམས༌ ཡོད༌ཏེ༌ ཟའ༌ཁན༌ནི༌ མི༌བོའེ༌ སྡིག༌པ༌ ཅོས༌ཏེ༌ ཨིན༌ནོག༌, ཅིའ༌ཟེར༌ན༌ ཁོའེ༌ ཏེ༌ ཟན༌བོ༌ ཏད༌པ༌ ཅོས༌ཏེ༌ མ༌ཟའ༌ ཨིན༌ནོག༌། ཡང༌ ཁྱོ༌ཞའེ༌ ཅོས༌ཁན༌ ཚང༌མ༌ ཏད༌པ༌ གྱུད༌ཏེ༌ མན༌ན༌, ཁྱོ༌ཞ༌གུན༌ནི༌ སྡིག༌པ༌ ཅོས༌ཏེ༌ ཨིན༌ནོག༌།