ཏི༌ཏུས༌ལ༌ པ༌འུ༌ལུའི༌ ཆག༌བྲིས༌།
ཏི༌ཏུས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌པོ༌ ཡེ༌ཤུའི༌ སྐུ༌ཚབས༌ པ༌འུ༌ལུའི༌, ཀེརེ༌ཏི༌ ཚོ༌ལིང༌ངི༌ཀ༌ བོར༌ཁན༌ ཏི༌ཏུས༌ལ༌ བྲིའ༌ ཛད༌ཏེ༌ ཨིན༌ནོག༌། ཏེ༌ཏུས༌, པ༌འུ༌ལུ༌ གྱུད༌ཏེ༌ ཏད༌པའེ༌ ནང༌ང༌ ཡོང༌ཁན༌, ཡེ༌ཤུའི༌ སྐོར༌ལ༌ གའ༌མོའེ༌ ནས༌ཚུལ༌ ཁྱེབས༌ཤུག༌ཅེས༌སི༌ ནང༌ང༌ ལས༌ ཅོ༌ཁན༌, ཁོང༌ངི༌ ཕྲོ༌པ༌ ཨིན༌པིན༌།
པ༌འུ༌ལུ༌ དང༌ ཏི༌ཏུས༌, ཀེརེ༌ཏའི༌ སྔུན༌ལ༌ སོང༌ཏེ༌ ཨིན༌པིན༌། ཏེ༌རུ༌ པ༌པུ༌ལུའི༌ ཆོས༌ཤད༌ཅེས༌པོའེ༌ མི༌གུན༌ ཏད༌པའེ༌ ནང༌ང༌ ཡོངས༌། པ༌འུ༌ལུའི༌ ཏི༌ཏུས༌ ཏེ༌ ཏད༌པ༌ཅན༌གུན༌ལ༌ ཚིར༌ཅུག༌ཅེས༌སི༌ ནང༌ང༌ ཡ༌ཏོ༌ ཅོ༌ཅེས༌ལ༌ ཏེ༌རུ༌ བོར༌ཏེ༌ སོང༌པིན༌། ཏ༌ ཁོང༌ངི༌ འི༌ ཆག༌བྲིས༌པོ༌ ཏི༌ཏུས༌ལ༌, ཁོའ༌ གྱབ༌གལ༌ ཅོ༌ཁན༌གུན༌ནི༌ གྱབ༌གལ༌ལ༌ རོགས༌ ཅོ༌ཅེས༌ལ༌, བྲིའ༌ ཛདས༌། ཁོང༌ངི༌ ཏི༌ཏུས༌ལ༌ མ༌ཤི༌ཀ༌པ༌གུན༌ ཁྲིད༌ཅེས༌སི༌ ཁོང༌རང༌ངི༌ ཝང༌ སལ༌ཏེ༌ ཁོའ༌ གྱབ༌གལ༌ ཅོ༌ཁན༌གུན༌ ཉམ༌པོ༌ ཀ༌ཟུག༌གི༌ བྲེལ༌ ཅོ༌ཅེས༌སི༌ ལབ༌ཞ༌ སལ༌ལ༌ ཛདས༌། པ༌འུ༌ལུའི༌ མ༌ཤི༌ཀ༌པའེ༌ ཏད༌པ༌ དང༌ མ༌ཤི༌ཀ༌པའེ༌ མི༌ཚེ༌ཞིག༌ ཕུད༌ཅེས༌སི༌ ལབ༌ཞ༌, ཡང༌ ཏི༌ཏུས༌ལ༌ ཏེ༌རུ༌ ཡོད༌ཁན༌ནི༌ ཟུས༌མའེ༌ ལོབ༌པོན༌གུན༌ནེ༌ ཤང༌ ཅོ༌ཅེས༌ལ༌, བྲིའ༌ ཛདས༌།
པ༌འུ༌ལུའི༌ འི༌ ཆག༌བྲིས༌པོ༌, ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 30 ནེ༌ 32 ཉེ༌ཁོར༌ལ༌ བྲིའ༌ ཛད༌ཁན༌བོ༌, གྱུས༌ ཆའ༌ནོག༌།།
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 4
1 འི༌ ཨི༌གེ༌བོ༌ ང༌ པ༌འུ༌ལུའི༌ ཆོགས༌ནེ༌ ཨིན༌། ང༌ ནི༌ དཀོན༌མཆོག༌གི༌ ཞབ༌སྟོག༌པ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ ཨིན༌། དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལ༌, མ༌ཤི༌ཀའེ༌ ནང༌ང༌ ཨིད༌ཤེས༌ ཅོ༌ཅེས༌པོ༌ ཤད༌ཅེས༌ དང༌, དཀོན༌མཆོག༌གི༌ ལམ༌མི༌ཀ༌ གྲུལ༌ཨིན༌ མི༌ཚེ༌ ཕུད༌ཅེས༌སི༌ དེན༌བ༌བོ༌, ཤེ༌ཤེས༌ ལབ༌བ༌ལ༌ ང༌ ལམ༌ཅུགས༌། 2 འི༌ དེན༌བ༌བོའེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌ཁན༌ནི༌ ལོ༌ཁྱེལ༌ ཏང༌ང༌ནོག༌, ཀ༌བོ༌ ཏུས༌གྱུན༌ དྲང༌པོ༌ མོལ༌ཁན༌ནི༌ དཀོན༌མཆོག༌གི༌ ཇིག༌རྟེན༌ ཛད༌དི༌ སང༌ སྔུན༌ལ༌ ཞལ༌ཆད༌ ཛད༌ཏེ༌ ཨིན༌པིན༌། 3 ཏ༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌, ངའེ༌ ཚང༌མ༌ལ༌ ཆོས༌ཤད༌ཅེས༌ གྱུད༌ཏེ༌ ཁོང༌ངི༌ འི༌ ལོན༌བོ༌ སྔོན༌ ཅུག༌ཏེ༌ ཨིན༌ནོག༌། དཀོན༌མཆོག༌ ང༌དང༌ངི༌ སྐྱབ༌གོན༌ནི༌ བཀའ༌ སལ༌ཁན༌ ནང༌ཞིན༌ལ༌, ཁོང༌རང༌ངི༌ ཕིའ༌ འི༌ ལས༌པོ༌ ངའེ༌ ལག༌ག༌ སྟད༌ད༌ ཛདས༌།
4 ང༌དང༌གུན༌ནི༌ ཏད༌པའེ༌ ནང༌ང༌, ངའེ༌ དེན༌བའེ༌ བུ༌ཚ༌ ཙོགས༌ ཨིན༌ཁན༌ནི༌ ཅེས༌པའེ༌ སྤུན༌, ཏི༌ཏུས༌ལ༌ བྲིའད༌། དཀོན༌མཆོག༌ ཡབ༌ དང༌ ང༌ཏི༌ སྐྱབ༌གོན༌ མ༌ཤི༌ཀ༌ ཡེ༌ཤུ༌ ཉིས༌ཀོའེ༌ ཁྱོ༌རང༌ང༌ ཐུག༌རྗེ༌ དང༌ ཞི༌དེ༌ སལ༌ཤིག༌།
ཀེརེ༌ཏའི༌ ནང༌ང༌ ཏི༌ཏུས༌སི༌ ཞབ༌སྟོག༌གུན༌།
1:5 ནེ༌ 16
5 ཁྱོ༌རང༌ངི༌ ང༌དང༌གུན༌ནི༌ ལས༌གུན༌ གྲུབ༌ཅུག༌ཅེས༌ དང༌ ངའེ༌ ལབ༌ཞ༌ ནང༌ཞིན༌, གྲོང༌ཁྱེར༌ རེ༌རེའེ༌ ནང༌ང༌ འུ༌སྐྱོང༌གུན༌ སྐོ༌ཅེས༌སི༌ གྱུན༌ཚན༌བོའེ༌ ཕིའ༌, ངའེ༌ ཁྱོ༌རང༌ ཀེརེ༌ཏའི༌ ནང༌ང༌ བོར༌པིན༌། 6 འུ༌སྐྱོང༌གུན༌ སྐྱོན༌མེད༌ དང༌ ཁོ༌རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌ ཡོང༌གོས༌། ཡང༌ ཁོང༌ངི༌ ཕྲུ༌གུ༌གུན༌ ཏད༌པ༌ཅན༌, ཡང༌ སྕོད༌ལམ༌ ངན༌པ༌ དང༌ ཁའ༌མི༌ཉན༌ ཡོད༌ཁན༌ནི༌ སྐྱོན༌ མ༌ཕོག༌ཁན༌ རིག༌ ཡོང༌གོས༌། 7 དཀོན༌མཆོག༌གི༌ ཆག༌ལས༌གུན༌ འུ༌སྐྱོང༌གུན༌ནི༌ ལག༌ག༌ སྟད༌ པ༌སང༌, ཁོང༌ངི༌ མི༌ཚེ༌བོ༌ སྐྱོན༌མེད༌ཁན༌ཞིག༌ ཡོང༌གོས༌། ཁོང༌ ཕོ༌སོ༌ཅན༌ ཡ༌ སྲོ༌དུང༌ཅན༌, ཁོང༌ ཆང༌ མང༌པོ༌ ཐུང༌ཁན༌, སྲོའེ༌ ནང༌ང༌ ནོད༌སྐྱལ༌ཁན༌ ཡ༌ པེ༌ནེ༌ ཕིའ༌ དོད༌པ༌ཅན༌ ཡོང༌ མ༌གོས༌།
8 ཐད༌པོ༌ ཉམ༌པོ༌ ཁོའེ༌ ཁང༌པ༌ ཡོང༌ཁན༌གུན༌ལ༌ གའ༌སུས༌ ཞུ༌ཁན༌, ཡང༌ ཟང༌པོ༌ ལས༌གུན༌ལ༌ ཁོའེ༌ ཅེས༌པ༌ ཅོ༌གོས༌། ཁོའེ༌ མི༌ཚེ༌བོ༌ ཤེས༌རབས༌སི༌ ནང༌ང༌ ཕུད༌གོས༌, ཡང༌ ཐག༌ཅད༌གུན༌ ཆོག༌རིས༌ མེད༌པ༌ ཅོ༌གོས༌། ཁོའེ༌ མི༌ཚེ༌བོ༌ དམ༌པ༌ དང༌, རང༌སེམས༌ ཅུན༌ཏེ༌ བོར༌ཉན༌ཁན༌ཞིག༌ ཡོང༌གོས༌། 9 ལབ༌ཁན༌ནི༌ ཨིད༌ཤེས༌ཅན༌ནི༌ ལོན༌ནི༌ཀ༌ ཁོའ༌ མ༌སྲན༌ཏྲེ༌ ཏད༌པ༌ ཡོང༌གོས༌, ཏེ༌ནེ༌ ཁོའེ༌ ཞན༌མ༌གུན༌ལ༌ དེན༌བའེ༌ ལབ༌ཞ༌ ཉམ༌པོ༌ སྤོས༌པ༌ སྐྱེ༌ཅུག༌ ཉན༌ཨིན༌, ཡང༌ ཏེ༌བོའེ༌ གྱབ༌གལ༌ ཅོ༌ཁན༌གུན༌ལ༌ ནོར༌ཏེ༌ ཨིན༌ཁན༌བོ༌ ལྟན༌ ཐུབ༌ཨིན༌།
10 ངོ༌ལོག༌ ཅོ༌ཁན༌ནི༌ མི༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཀ༌གུན༌ ཕན༌མི༌ཐོགས༌སི༌ སྤེ༌རའེ༌ ནང༌ང༌ དྲེས༌ཏེ༌ ཞན༌མ༌གུན༌ལ༌ གོབ༌སྐོར༌རད༌, མིག༌སལ༌ལི༌ ཐར༌པ༌ ཐོབ༌ཅེས༌ལ༌, བུ༌ཚ༌གུན༌ལ༌ སུན༌ནད༌ *1:10 སུན༌ནད༌དི༌ ཏོན༌བོ༌ ནི༌ བུ༌ཚའེ༌ ཤའེ༌ ཀ༌ནེ༌ པགས༌པ༌ ཅད༌ཏེ༌ སྟགས༌ ཅོ༌ཅེས༌པོ༌ ཨིན༌ནོག༌། ཅོ༌གོས༌ ཟེར༌ཁན༌གུན༌། 11 ཁྱོ༌རང༌ངི༌ ཁོང༌གུན༌ལ༌ ཏེ༌ཙོགས༌ ཟེར༌ཅེས༌ནེ༌ སྒག༌གོས༌, ཅིའ༌ཟེར༌ན༌ ཏེ༌གུན༌ནི༌ ཟུས༌མའེ༌ ལབ༌ཞ༌གུན༌ནི༌, ནང༌ཚངས༌ གང༌པོ༌ དེན༌བའེ༌ ལབ༌ཞ༌གུན༌ནེ༌ ཐག༌རིང༌ང༌ ཁྲིད༌ཏེ༌ ཁྱེར༌ར༌ནོག༌། ཡང༌ ཁོང༌གུན༌ནི༌ ཏེ༌བོ༌ ཁོ༌རང༌གུན༌ནི༌ ཕན༌ཐོགས༌སི༌ ཕིའ༌ ཅོའ༌ནོག༌། 12 འི༌བོ༌ ནི༌, ཁོ༌རང༌གུན༌ནི༌ ཕྲོ༌ནེ༌ ལུང༌སྟོན༌པ༌ ཅིག༌གི༌, "ཀེརེ༌ཏ༌པ༌གུན༌ ཟུན༌ཇན༌, ཁྱི༌ ཙོགས༌ དང༌ ལས༌མི༌ལམ༌ གྲོད༌ནབས༌ཅན༌" ཟེརས༌ཏེ༌ ཨིན༌ནོག༌། 13 ཁོའེ༌ ཟེར༌ཁན༌བོ༌ དྲང༌པོ༌ ཨིན༌པ༌, ཏད༌པའེ༌ ནང༌ང༌ སྟན༌པོ༌ ལུས༌ཤེས༌སི༌ ཕིའ༌, ཁྱོ༌རང༌ངི༌ ཏེ༌ཙོགས༌སི༌ སྤུན༌གུན༌ལ༌ མ༌སྲན༌ཏྲེ༌ ཁའ༌སྐྱེ༌ཏེ༌ སྐྱོང༌གོས༌། 14 ཏེ༌གུན༌ནི༌, ཡ༌ཧུ༌དཱ༌པའེ༌ ཟུས༌མའེ༌ རུངས༌ དང༌ དྲང༌པོའ༌ གྱབ༌ ལོགས༌ཏེ༌ ཆའ༌ཁན༌གུན༌ནི༌ བཀའ༌གུན༌ལ༌ ཉན༌ མ༌གོས༌།
15 སེམས༌ ལག༌མོ༌ ཡོད༌ཁན༌གུན༌ནི༌ ཕིའ༌ ཅི༌ཚང༌མ༌ རྩང༌མ༌ ཨིན༌ནོག༌། ཨིན༌ནའང༌ སྙིང༌ངི༌ ནང༌ང༌ རྩང༌མ༌ མེད༌ཁན༌ དང༌, ཡེ༌ཤུའི༌ཀ༌ ཏད༌པ༌ མ༌ཅོ༌ཁན༌གུན༌ནི༌ ཕིའ༌ ཅི༌ཤིག༌གའང༌ རྩང༌མ༌ མེད༌པ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ སམ༌ཚུལ༌ དང༌ སེམས༌ གུན༌ ངན༌པ༌ ཡོད༌ཏེ༌ ཨིན༌ནོག༌། 16 ཏེ༌ཙོགས༌སི༌ མི༌གུན༌ནི༌ ཟེར༌ར༌ནོག༌, ཁོང༌གུན༌ནི༌ དཀོན༌མཆོག༌ ཤེས༌སད༌། ཨིན༌ནའང༌ ཏེ༌གུན༌ནི༌ ལས༌གུན༌ ཅོ༌ ཚུལ༌ལ༌ ལྟ༌ན༌, ཁོང༌ངི༌ སྟིང༌རང༌ནེ༌ མ༌གྲུལ༌ཁན༌བོ༌, ཤེས༌དུག༌། ཏེ༌གུན༌ ནཕ༌རད༌ཅན༌ དང༌ ཁའ༌མི༌ཉན༌ ཡང༌ ཁོང༌གུན༌ལ༌ ཅའང༌ ལས༌ ཟང༌པོ༌ ཅོ༌ཉན༌ན༌ མ༌ནོག༌།