Nan Ikadwa ay Solat Pablo ken Timoteo
Nan Makwani Maipoon isnan Maikadwa ay Solat Pablo ken Timoteo
Nan maikadwa ay solat Pablo ken Timoteo et siya nan nangisolatana isnan angsan ay tokhon ken Timoteo ay infilangna'y anakna ya kafachangna isnan chonona pala ken Cristo. Nan kapatekhan isnan naay ay solat et nan mangikatpelan nan mamati isnan likhat. Tinokhona si Timoteo ta pabfikasena siya ay mangitot-oloy ay mangisos-olo isnan tet-ewa maipoon ken Jesu Cristo. Tinokhona akhes siya ta ad-ina lidlichongan nan maibfakha isnan Khawis ay Chamag ya nan ammona maipoon isnan inpasolat Apo Dios id sangad-om tatno itot-oloyna ay patkhen chachi. Tinokhona akhes tatno ikkana ay khawis nan chonona olay mo angsan nan likhat ay pad-anena ya olay akhes ibfafan-igcha siya.
Infakhan Pablo ken Timoteo ay masapol ay meymey-ana ta ad-i maitapi ay makiap-apat isnan ongar yangkhay ay maid silfina. Tay maid paat maifachang nan kag todi ay ap-apat mod-i ket maichena nan pammatin nan takho ay manmannge ischi.
Ipasmek kayet Pablo ken Timoteo ta eestena ay mangiyang-angnen ya mangisos-olo isnan tet-ewa ay maisolo ay nalpo ken Apo Dios.
Nan Linaona
Nan lapon nan solat 1:1-2
Nan menyamanan Pablo khapo ken Timoteo ya nan tokhona ken siya ta ipapatina ay ensilfi ken Apo Dios 1:3-18
Nan okhalin nan kaaafolot ay ensilfi ken Cristo 2:1-13
Nan ikkan ay enfiyag ay tan-oyan Apo Dios 2:14-26
Nan okhalin nan takho isnan omochi ay akhew 3:1-9
Nan tokhon Pablo ken Timoteo ta ipapatina ay mamati ya mangisolo isnan kalin Apo Dios 3:10 - 4:8
Nan omochi ay filin 4:9-18
Nan anongos nan solat 4:19-22
1
Nan Lapon nan Solat
1 Sak-en si Pablo ay apostol Cristo Jesus tay siya nan nemnem Apo Dios. Infaana sak-en ay en mangipalawag isnan fiyag ay inkalin Apo Dios ken chatako ay naiyornos ken Cristo Jesus.
2 Siya na nan solatko ken sik-a Timoteo ay laylaychek ay anakko. Asop ya nan fachang, seg-ang ya talna ay nalpo ken Dios Ama ya si Cristo Jesus ay Apo tako nan wad-ay ken sik-a.
Nan Nenyamanan Pablo Maipoon isnan Pammatin Timoteo
3 Khawis nan semekko isnan sakhang Apo Dios ay ensilsilfiyak ay kag isnan inangnen nan ikik-itko, ya kad-in enlowalo ak ay manmanmek ken sik-a isnan inakhew ya minaschem ya enyaman ak maipoon ken sik-a. 4 Chachama nan iliwko ken sik-a, am-amed mo semkek nan nentalemtemam issan nensiyananta, ya nay laychek ay kasin ilaen sik-a ta amed ak malaychan. 5 Sesemkek nan tet-ewa ay pammatim ay sikhod ay wad-ay ken ikitmo ay Loida ya si inam ay Eunice. Patiyek ay siya chi nan pammati ay wad-ay ken sik-a idwani.
Nan Filin Maipoon isnan Kafaelan ay Inchowan Apo Dios ken Timoteo
6 Tay siya chi kasin ko ibfakha ken sik-a ta pabfichangem kasin nan kafaelam ay inlayad Apo Dios ken sik-a issan nangilowalowak ay nangipattangak isnan limak ken sik-a. 7 Tay faken egyat nan ischon nan Ispirito Santo ay inlayad Apo Dios ken chatako mod-i ket nan kamabfalin, layad ya katpe.
8 Ad-i ka koma fomain ay mangitakcheg ken Apo tako ay Jesus. Ad-i ka koma akhes fomain isnan mafabfalochak maipoon ken siya, mod-i ket isnan kamabfalin Apo Dios anosam nan likhat ay inaag tako khapo isnan Khawis ay Chamag.
9 Insalakana ya inayakhana chatako tatno nakapet tako ken siya. Faken khapo isnan inangnen tako nan inmisalakana, mod-i ket tay pangkhepna chadlo ay fomachang ken chatako maichalan ken Cristo Jesus, olay issan sisya'y eg-ayna nangab-an isnan lofong. 10 Et inpailana tet-ewa chi idwani maichalan isnan inmaliyan Cristo Jesus ay omisalak ken chatako. Kinaana nan kamabfalin nan etey ya inyalina nan falo ay fiyag ay eng-engkhana maichalan isnan Khawis ay Chamag.
11 Chinotokan Apo Dios sak-en ay en-apostolna, ya finmaa ay en mangipalawag ya mangisolo isnan nay Khawis ay Chamag. 12 Siya chi nan khotok nan maipap-alikhatak. Ngem ad-i ak fomain tay ammok si Apo Dios ay talkek, ya ad-i ak enchwadchwa ay wad-ay nan kamabfalina ay manokkhong isnan intalekna ken sak-en,*Nan teken ay kaifalikkasan nan nay et, “wad-ay nan kamabfalina ay manokkhong isnan intalekko ken siya.” engkhana isnan akhew ay omaliyan Jesus.
13 Nan tet-ewa ay sos-olo ay chinngem ken sak-en, siya koma nan mawanwaned. Ton-ochem na isnan mangiyangnenam isnan pammati ya layad ay ichowan Cristo Jesus ken chatako ay naiyornos ken siya. 14 Sam et ilaen ta takchekham ay khawis nan kinatet-ewa ay naitalek ken sik-a isnan Ispirito Santo ay wad-ay ken chatako.
Nan Nenliglikhatan Pablo isnan Fabfalochan
15 Ammom ay chinokokhan nan am-in ay mamati id Asia sak-en. Naitapi cha Filego ken Hermogenes ken chaicha. 16 Ngem mo maipoon ken Onesiforo, asop ya seg-angan Apo Dios nan pangafongna tay kad-in inmipafikas. Egay akhes finmain isnan nakadchinaak 17 mod-i ket issan inomchanana isna id Roma, inmanaanap engkhana'y nad-anana sak-en. 18 Sikhod ay ammom met nan am-in ay infadfachangna ken sak-en id Efeso issan chey. Asop ya maseg-ang nan Apo ken siya isnan akhew ay omaliyan Apo Jesus ay en-okom.
*1:12 Nan teken ay kaifalikkasan nan nay et, “wad-ay nan kamabfalina ay manokkhong isnan intalekko ken siya.”