Nan Maikatlo ay Solat Juan
Nan Makwani Maipoon isnan Maikatlo ay Solat Juan
Nan maikatlo ay solat Juan et insolatna isnan esa'y mangipangpango isnan mamati ay si Gayo khapo isnan khawis ay namachangana isnan mamati ya am-amed isnan namachangana isnan en-isos-olo isnan kalin Apo Dios. Ifagfakhana akhes ken siya ay masapol ay meymey-ancha ta ad-icha ab-abfoloten nan ngaag ay okhalin nan lalaki ay nenngachan si Diotrefes.
Nan Linaona
Nan lapon si nan solat 1-4
Maichad-ayaw si Gayo 5-8
Nan ngaag ay inangnen Diotrefes 9-10
Nan khawis ay inangnen Demetrio 11-12
Nan anongos nan solat 13-15
1
1 Sak-en si Juan ay esang ay mangichad-alan isnan mamati, ya isolatko na ken sik-a aloyosko ay Gayo ay tet-ewa ay laylaychek.
2 Ilol-owalowak sik-a aloyosko ta komekedse ka ya ta enkhagkhawis ka isnan am-in. Ad-i ak enchwadchwa ay khawis nan pammatim.*Nan osto ay naisolat isnan Griego isna et, “khawis nan leng-agmo.” 3 Chachama ay enlal-ayad ak isnan inmaliyan nan tapina ay ib-a tako ay mamati ay nanistikho isnan nangab-abfolotam isnan kinatet-ewa, tay nan kinatet-ewa nan wanwanchem. 4 Maid kasin chadlos malaylaychak mod-i kecheng nan manngelak ay ab-abfoloten nan an-akko nan kinatet-ewa.
5 Aloyosko, kaaafolot ka isnan cham angnen ay menmangili isnan iib-a ay mamati, am-amed tay kaili cha. 6 Inokhodcha isnan sakhang nan naam-among ay mamati nan maipoon isnan layadmo. Khawis mo paligwatem chaicha ay osto tay siya nan lebfengna'y maangnen isnan faan Apo Dios. 7 Tay naligwat cha ay en mangitakcheg isnan ngachana, ya ad-i cha omala isnan kasapolancha isnan ad-i mamati. 8 Tay siya chi lebfengna'y mangiliyen tako ya fachangan tako nan kag tod-icha ay takho, ta en-asifabchang tako ay mangiwalas isnan kinatet-ewa.
Nan Tokhon Maipoon isnan Nawewe
9 Wad-ay san solatko ken chakayo issa ay maam-among ay mamati, ngem si Diotrefes ay mangipatotongcho isnan awakna, et ad-ina figfikhen sak-en. 10 Et mo omey ak sisa, at pabfalaek ken chakayo nan ang-angnena ay aped omipangapangaag. Ya ad-i kayet maoma isnan ang-angnena tay ad-ina akhes mangiliyen nan ib-a tako ay mamati, ya iyad-ina kayet nan kailiyanyo ay menlayad ay menmangili ken chaicha, sa na't telachen isnan kaam-amonganyo nan mangangnen sidi.
11 Aloyosko, ad-im tonton-ochen nan ngaag, mod-i ket nan yangkhay khawis nan wanchem. Tay nan mangangnen isnan khawis, siya nan naiyanak ken Apo Dios, ngem nan mangangnen isnan ngaag, ad-ina figfikhen si Apo Dios.†Nan osto ay naisolat isnan Griego isna et “egayna inila si Apo Dios.”
12 Mo maipoon ken Demetrio, khawis nan makmakwaniyana isnan am-in, ya olay nan kinatet-ewa ay inyokhalina. Olay sak-en, tistikhowak siya, ya ammoyo ay tet-ewa nan ifagfakhak.
Nan Anongos nan Ikatlo ay Solat Juan
13 Angsan nan laychek ay isolat ken sik-a, ngem ad-ik laychen ay papil ya lapis nan angnek ay makikali ken sik-a, 14 mod-i ket asop ya isnan ad-i omannong et makaeey ak sisa ta entot-oya ta.‡Nan naisolat isnan English isna et, “ta ensakhang ta ay entot-oya,” ngem nan wad-ay isnan Griego et, “ensaskhang nan topekta ay enkali.”
Asop ya wad-ay ken sik-a nan talna.
Pakpakomostaan nan ib-ata isna sik-a: Sin-es-aem akhes ay pakomostaen nan am-in ay ib-ata ay wad-ay issa.