2
Nan Nangifafan-ikhan Cristo isnan Awakna ya nan Katangtangachana
1 Ammoyo ay issan naiyornosanyo ken Cristo et naipafikas nan semekyo, ad-i ngen? Ya naliwliwa kayo isnan layadna ken chakayo. Wad-ay akhes nan ornosyo isnan Ispirito Santo, ya wad-ay nan layad ya seg-angyo. 2 Idwani an-anayanyo nan lagsakko isnan mangipaesanganyo isnan semek ya layadyo, ta chadlos kayo naornos ya es-esang isnan pangkhepyo. 3 Ad-i kayo omanap isnan kafokfokochanyo ay enkhawisan paymo chomayewan, mod-i ket ifafan-igyo nan awakyo ta ifilangyo ay napatpateg nan ib-ayo mo chakayo. 4 Faken koma yangkhay nan waschin enkhawisanyo nan wadwad-enyo mod-i ket semkenyo nan enkhawisan nan ib-ayo. 5 Ilaenyo ta nan semekyo et maikis-o isnan semek Cristo Jesus. Kag tona nan semekna:
6 Olay mo sikhod ay tet-ewa ay Dios, eg-ayna inpip-ilit nan maikis-owana ken Apo Dios, 7 mod-i ket inyoyana nan katangtangachana ta enfalin ay faa isnan nenfalinana ay ison nan takho.
8 Osto ay nenfalin is takho, infafan-igna nan awakna ay mamatpati ken Amana, olay mo siya's kateyana is kakolos ay kangaakhan ay etey.
9 Isonga inpatongchon Apo Dios siya ta siya nan matangtangad isnan am-in.
Ya inchowan kayet Apo Dios ken siya nan kapapatekhan ay ngachan isnan am-in ay ngachan, 10 tatno machad-ayaw nan ngachan Jesus isnan am-iam-in.
Ta sa et am-in nan wad-ay id chaya, ya nan am-in ay takho isnan lofong, ya olay akhes nan natey,*Nan osto ay naisolat isnan Griego isna et, “nan wad-ay is chaem nan lota.” et sa cha enfalintomeng ay manad-ayaw ken siya.
11 Sa cha't waschin figfikhen ay mangwanin si Jesu Cristo nan Apo.
Siya chi nan mangischo isnan katangtangachan Dios Ama.
Nan Mamati et Kag cha Silaw isnan Lofong
12 Tay siya chi, siya na nan laychek ay iloney ken chakayo ay laylaychek. Issan kawadko ken chakayo kad-in pinmatpati kayo, siya kayet koma idwani ta faken yangkhay isnan wad-ayak, mod-i ket am-am-amed kayet isnan maichak. Iyegyatyo si Apo Dios isnan mangid-idnowanyo ay mangikwas isnan lebfengyo ay ikkan isnan naisalakanyo.†Nan osto ay naisolat isnan Griego isna et, “idnoyo nan kaisalakanyo isnan egyat ya tayenten.” 13 Tay wawawawad-ay si Apo Dios ay mangidno ken chakayo ya mangipafikas isnan layad ya kafaelanyo ay mangangnen isnan laychena.
14 Isnan am-in ay ngag sisa ay angnenyo, ad-i kayo enmollomollotomot paymo makisomasoma, 15 ta enfalin kayo ay nadchalos ay an-ak Apo Dios ya maid makmakwaniyanyo. Tatno olay mo makitetee kayo isnan naloloko ay takho ay naikfis nan akkhocha, khechangna'y maid enkolanganyo ta alig kayo tokwifi ay menlalanglang isnan ab-afollinget ay lofong 16 isnan cha yo mangidchoowan isnan omipabfiyag ay kalin Apo Dios. Mo siya na nan ikkanyo, wad-ay nan khotok nan enlal-ayachak maipoon ken chakayo isnan akhew ay kasin aliyan Cristo, tay at maipaila ay faken ongar yangkhay nan chonok ya felayko ken chakayo.‡Nan osto ay naisolat isnan Griego isna et, “faken ongar nan nentagtakhak ya faken ongar nan felayko.”
17 Idwani away matey ak pala ken chakayo. Iyaligko nan chalak isnan fayas ay maikoyag ay maitoptop isnan pammatiyo ay maichaton ken Apo Dios.§Isnan okhalin nan Judio, mo wad-ay ichatoncha ay enkik-iwi ken Apo Dios, pateyencha, sa cha't ippey is kaaltar. Sa cha't enlowalo. Mo nakwas nan ikkancha ay mangichoo isnan enkik-iwi, ifokfokcha nan fayas ay mamengpeng isnan inikkancha ay nenchad-ayaw. Iyalig Pablo nan pammaticha isnan enkik-iwi ay naichoo ken Apo Dios, ya nan chalana kannay ay sesemkena ay at maipafala et iyaligna isnan fayas ay mangonto isnan enchayawancha ken Apo Dios. Mo siya chi nan maangnen, et enlal-ayad ak ay matey, ya makilagsak ken chakayo am-in. 18 Et siya akhes koma ay enlal-ayad ya makilagsak kayo ken sak-en.
Nan Nangibfaalan Pablo ken cha Timoteo ya si Epafrodito id Filipos
19 Asop ya ad-i omannong ya ipalofos Apo Jesus ay faalek si Timoteo ay mangila ken chakayo, ta mo chengngek ken siya nan maipoon isnan kasasaadyo et onanig ak lomagsak. 20 Kecheng siya is ammok isna ay kag ken sak-en ay chadlos mangiismek isnan enkhawisanyo. 21 Am-in nan tapina, et nan enkhawisancha yangkhay nan pasiyat-encha ya faken nan laychen Jesu Cristo. 22 Ngem ammoyo et nan inpailan Timoteo ay kinapategna. Kag kami sin-ama ay mangid-idno ay mangipaammo isnan Khawis ay Chamag. 23 Idwani mo ammowek et nan sa maangnen ken sak-en isna, at asop ya sak ifaa kannay siya ken chakayo. 24 Asop ya ad-i omannong ya at ipalofos Apo Jesus ay makaeey ak akhes issa.
25 Ngem idwani, kanak en mo masapol ay ipasaak et issa nan ib-a tako ay si Epafrodito ay finaayo ay mamachang ken sak-en isnan kasapolak. Siya nan ib-ak isnan chono ya ib-ak kayet ay sorchachon Cristo. 26 Chachama nan iliwna ken chakayo am-in, ya isnan nangammowana ay chinngeyo nan nensakkitana et nadchanakhan siya. 27 Nensakit tet-ewa siya ya nganngani matey, nay met achi sineg-angan Apo Dios siya, ya faken yangkhay siya, mod-i ket olay sak-en akhes, tay mo sa ya natey siya, at am-am-amed ak ensasanga. 28 Siya chi nan khotok nan menlaychak ay pasaalen siya ta malagsakan kayo ay kasin mangila ken siya. Et mo siya chi, at chadlo chomine nan semekko. 29 Adi kad ipailayo nan layadyo ay manawat ken siya, tay ib-ayo siya ay naiyornos ken Apo Jesus. Patkhenyo nan takho ay kag ken siya, 30 tay egayna inyegyat nan mateyana maigkhapo isnan chonon Cristo. Tet-ewa'y nganngani natey siya khapo isnan chono ay inpadnon Cristo ken siya, tay laychena'y sokantan chakayo ay fomachang ken sak-en.
*2:10 Nan osto ay naisolat isnan Griego isna et, “nan wad-ay is chaem nan lota.”
†2:12 Nan osto ay naisolat isnan Griego isna et, “idnoyo nan kaisalakanyo isnan egyat ya tayenten.”
‡2:16 Nan osto ay naisolat isnan Griego isna et, “faken ongar nan nentagtakhak ya faken ongar nan felayko.”
§2:17 Isnan okhalin nan Judio, mo wad-ay ichatoncha ay enkik-iwi ken Apo Dios, pateyencha, sa cha't ippey is kaaltar. Sa cha't enlowalo. Mo nakwas nan ikkancha ay mangichoo isnan enkik-iwi, ifokfokcha nan fayas ay mamengpeng isnan inikkancha ay nenchad-ayaw. Iyalig Pablo nan pammaticha isnan enkik-iwi ay naichoo ken Apo Dios, ya nan chalana kannay ay sesemkena ay at maipafala et iyaligna isnan fayas ay mangonto isnan enchayawancha ken Apo Dios.