Nan Inpaammon Jesu Cristo ay Inpaifaagna ken Juan
Nan Makwani Maipoon isnan Inpaammon Jesu Cristo ay Insolat Juan
Laychen Apo Dios ay ammowen tako nan maipoon isnan am-in ay omat is tap-in akhew. Infaagna chana ken Juan ay apostolna isnan nentetey-ana isnan ili ay makwani en Patmos ay liliwsen si fayfay. Inpailan Apo Dios ken Juan nan at omat is tap-in akhew, kag isnan ikkan Apo Dios ay manosa isnan cheycha'y takho ay cha mangang-angnen isnan ngaag, ya nan mensobfalitana isnan mamati ken siya. Insolat Juan am-in nan infab-aag Apo Dios ken siya isnan nenpail-an Jesu Cristo ay nangifaag ken siya. Siya na nan anongosna isnan liblo'y insolat Juan, ya issan cha na mangisolatan sina et nalakalakay et siya.
Nan Linaona
Nan lapon nan solat 1:1-8
Nan inmona ay naipaila ken Juan isnan kag na iitaw 1:9-20
Nan solat isnan pito ay maam-amongan nan mamati 2:1 - 3:22
Nan kachad-ayawan Apo Dios id chaya 4:1-11
Nan nalolonlon ay papil ya nan kordero 5:1-14
Nan pito ay naiipket isnan nalolonlon ay papil 6:1 - 8:1
Nan pito ay trompeta 8:2 - 11:19
Nan fafai, oweg ya chwa ay naoyong ay enkik-iwi 12:1 - 13:18
Nan Kordero ya nan 144,000 ay sinfotna 14:1-5
Nan kaaniyan nan takho isnan lota 14:6-20
Nan pito ay mallokong ay napno is chosa 15:1 - 16:21
Nan fafai ay nensasakay isnan naoyong ay enkik-iwi 17:1-18
Nan napakawasan nan Babilonia ya nan naafakan am-in nan mangapos ken Apo Dios 18:1 - 20:10
Nan omochi ay mangokoman Apo Dios isnan katakhotakho 20:11-15
Nan falo ay chaya, falo ay lota, ya falo ay Jerusalem 21:1 - 22:5
Nan anongos nan solat 22:6-21
1
Nan naisolat sina ay liblo et nan inpaammon Jesu Cristo maipoon isnan nganngani omat isnan cha omali ay akhew, ay inischon Apo Dios ken siya ta ipaammona isnan faan Apo Dios. Si Cristo, inpaiyammona na ken sak-en ay Juan ay faana isnan nangifaalana isnan anghelna. Et insolatko am-in nan inilak, ya tistikhowak ay siya na nan kalin Apo Dios ya nan kinatet-ewa ay inpailan Jesu Cristo. Naoney nan takho ay mangifasa isnan naipadto isnan nay ay liblo isnan ib-ana, ya siya akhes isnan mannge isna ya mangiyangnen isnan naisolat isna, tay at ad-i omannong et maangnen chana.
Pakomosta isnan Cheycha'y Mamati ay Maam-among isnan Pito ay Ili id Asia
Sak-en si Juan ay manolat isnan am-in ay mamati ay maam-among isnan pito ay ili isnan Probinsiya ay Asia. Asop ya mawad-ay ken chakayo nan fachang ya talna ay malpo ken Apo Dios, ya nan pito ay Ispiritona,* Away nan ayen nan pito ay Ispiritona et siya nan Ispirito Santo isnan pito ay kamabfalina. ya si Jesu Cristo. Si Apo Dios, et sikhod ay wad-ay id sangad-om, ya sisya idwani, ya is eng-engkhana kayet. Nan pito ay Ispiritona et wad-ay isnan sakhang nan tronona. Ya si Jesus, siya nan kaaafolot ay tistikho isnan kinatet-ewa. Siya nan inmona isnan nenkatey ay finmangon ta ad-i kasin matey, ya siya nan Apon nan am-in ay ali isnan lofong.
Laylaychen Jesus chatako, ya maichalan isnan eteyna sinnakana chatako isnan chosan nan fasol tako. Nan osto ay naisolat isnan Griego isna et, “maichalan isnan chalana inpawayana chatako isnan fasol tako.” Sa na't nenfalinen chatako ay ali ay en-apo, ya pachi akhes ay mensilsilfi ken Dios Amana ay isilsilfiyana. Asop ya si Cristo nan kawad-an nan katangtangachan ya kamabfalin is eng-engkhana. Amen.
Chey, ilaenyo si Jesus ay cha omal-ali isnan lifoo. At ilaen am-in nan takho siya, olay am-in nan nangikolos ken siya. Et am-in nan natkenatken ay tribo isnan lofong, en-akha cha isnan omaliyana. Siya na nan tet-ewa ay sa omat. Amen.
Si Dios Apo ay sikhod ay wad-ay id sangad-om, ya sisya idwani, ya is eng-engkhana kayet, et siya nan Makabfalin am-in, ay mangwanin, “Sak-en nan chadlos lapon nan am-iam-in, ya nan anongos akhes nan ngonon.”
Nan Nangil-an Juan ken Jesu Cristo
Sak-en si Juan ay ib-ayo, ay naitapi ken chakayo ay naiyornos ken Jesus. Ib-ak akhes chakayo ay cha makian-anos isnan cha tako maliglikhatan, ya maitapi ak ken chakayo isnan en-ap-apowana. Naiyey ak ay nentee isnan esa'y ili ay makwanin Patmos ay liliwsen si fayfay, khapo isnan nangipaammowak isnan kalin Apo Dios ya nan kinatet-ewa ay inpaammon Jesus. 10 Isnan esang ay Chomingkho Nan osto ay naisolat isnan Griego isna et, “isnan akhew nan Apo.” Siya nan kinwanin Juan tay Chomingkho nan akhew ay kasin natakhowan Apo Jesus isnan etey. ay chak enchad-ayawan, wad-ay ak isnan kamabfalin nan Ispirito Santo, et chinngek is kachokogko nan naipapangekhe ay kali ay kag trompeta. 11 Kinwaninan, “Isolatmo isnan liblo nan ilaem, sam et ipaw-it isnan cheycha'y mamati ay cha maam-among isnan cheycha'y pito'y ili ay Efeso, Esmirna, Pergamo, Tiatira, Sardis, Filadelfia ya Laodicea.”
12 Ya kek et nenlikhos ay mangila isnan cha enkali ken sak-en, ya inilak nan pito ay pagsilawan ay nakhaeb is fallitok. 13 Et wad-ay is kakhawan nan nalilwes ay pagsilawan nan kag takho nan ilana, ay misasakhiyad nan fachona, ya wad-ay nan fallitok ay falikes is katakebna. 14 Nan fookna et enpokaw ay kag nan kapokaw nan fook si karnilo, paymo nan kapokaw nan lifoo.§ Nan osto ay naisolat isnan Griego isna et, “nan kapokaw nan andap.” Somili nan matana ay kag isnan enfidfichang ay apey. 15 Nan sikina et somili ay kag isnan khanfang ay nalonag sa et mafaew ya nalaslalaslasan ta enkosimsim, ya nan kalina et kag san wawak nan ab-afikas ay chanom. 16 Ineegnana nan pito'y tokwifi isnan kannawan ay limana, ya cha fomab-ala is katopekna nan at-atachem ay fadyok ay chwa nan tachemna. Somili nan kamesna ay kag isnan kapigsan nan langlang nan akhew.
17 Isnan nangil-ak ken siya nenlokfob ak is kasikina, et kag ak natey. Ngem insikchodna nan kannawan ay limana ken sak-en sa na't kanan, “Ad-i ka omegyat. Sak-en nan omona ya nan omochi, 18 ya nan poon si fiyag. Et olay natey ak, nay ilaem at matatakho ak is eng-engkhana, ya wad-ay kalebfengak isnan Etey ya isnan Hades ay tey-an si natey.* Nan osto ay naisolat isnan Griego isna et, “wad-ay ken sak-en nan torfek nan Etey ya Hades.” 19 Isolatmo et nan cheycha'y cham ilaen. Faken yangkhay nan ilam ay maang-angnen idwanin, mod-i ket nan ilaem ay at maang-angnen is omali ay akhew. 20 Et ipaammok idwani nan ayen nan naycha ay sikhod ay egay naam-ammowan ay inilam. Nan pito'y tokwifi isnan kannawan ay limak, et siya chachi nan pito'y angheles ay manoktokkhong isnan cheycha'y mamati ay maam-among isnan chey pito ay ili id Asia. Nan akhes pito ay pagsilawan et chaicha nan kaiyalikhan nan mamati isnan chey ay ili.”

*1:4 Away nan ayen nan pito ay Ispiritona et siya nan Ispirito Santo isnan pito ay kamabfalina.

1:5 Nan osto ay naisolat isnan Griego isna et, “maichalan isnan chalana inpawayana chatako isnan fasol tako.”

1:10 Nan osto ay naisolat isnan Griego isna et, “isnan akhew nan Apo.” Siya nan kinwanin Juan tay Chomingkho nan akhew ay kasin natakhowan Apo Jesus isnan etey.

§1:14 Nan osto ay naisolat isnan Griego isna et, “nan kapokaw nan andap.”

*1:18 Nan osto ay naisolat isnan Griego isna et, “wad-ay ken sak-en nan torfek nan Etey ya Hades.”