1 तब लेवियों को पूर्वजों को परिवारों को मुख्य आदमी एलीआजार याजक, अऊर नून को टुरा यहोशू, अऊर इस्राएली वंश को पूर्वजों को परिवारों को मुख्य आदमियों को जवर आय क 2 ✡21:2 गिनती ३५:१-८कनान देश को शीलो नगर म कहन लग्यो, “परमेश्वर न मूसा को द्वारा हम्ख बसन लायी नगर, अऊर हमरो जनावरों ख चरावन लायी मैदान भी देन की आज्ञा दी होती।” 3 तब इस्राएलियों न परमेश्वर को कहन को अनुसार अपनो अपनो हिस्सा म सी लेवियों ख चराइयों समेत हि नगर दियो।

4 तब कहात जाति को कुलों को नाम पर चिट्ठी निकली। येकोलायी लेवियों म सी हारून याजक को वंश को यहूदा, शिमोन, अऊर बिन्यामीन को वंशों को हिस्सा म सी तेरा नगर मिल्यो। 5 बाकी कहात जातियों ख एप्रैम को वंश, दान को वंश, अऊर मनश्शे को अरधो वंश को हिस्सा म सी चिट्ठी डाल क दस नगर दियो गयो।

6 फिर गेर्शोनियों ख इस्साकार को वंश को परिवार, अऊर आशेर, अऊर नप्ताली को वंशों को हिस्सा म सी, अऊर मनश्शे को ऊ अरधो वंश को हिस्सा म सी भी जो बाशान प्रदेश म होतो चिट्ठी डाल क तेरा नगर दियो गयो।

7 वंशों को अनुसार मरारी वंश ख रूबेन, गाद, अऊर जबूलून को वंशों को हिस्सा म सी बारा नगर दियो गयो।

8 जो आज्ञा परमेश्वर न मूसा को द्वारा दी होती ओको अनुसार इस्राएलियों न लेवियों ख चारागाह जमीन समेत यो नगर चिट्ठी डाल क दियो।

9 उन्न यहूदियों अऊर शिमोनियों को वंशों को हिस्सा म सी यो नगर जिन को नाम लिख्यो हंय दियो; 10 हि नगर लेवीय कहाती वंशों म सी हारून को वंश लायी होतो; कहालीकि पहिली चिट्ठी उन्कोच नाम पर निकली होती। 11 मतलब उन्न उन्ख यहूदा को पहाड़ी देश म चारयी तरफ की चराइयों समेत किर्यतर्बा नगर दे दियो, जो अर्बा अनाक को बाप होतो जो हेब्रोन भी कहलावय हय। 12 पर ऊ नगर को खेत अऊर ओको गांव उन्न यपुन्ने को टुरा कालेब ख ओकी निजी जमीन कर क् दे दियो।

13 तब उन्न हारून याजक को वंश ख चराइयों समेत खूनी को शरन नगर हेब्रोन, अऊर अपनी अपनी चराइयों समेत लिब्ना, 14 यत्तीर, एश्तमो, 15 होलोन, दबीर, 16 ऐन, युत्ता अऊर बेतशेमेश दियो; यो तरह उन दिनों वंशों को हिस्सा म सी नव नगर दियो गयो। 17 अऊर बिन्यामीन को वंश को हिस्सा म सी अपनी अपनी चराइयों समेत हि चार नगर दियो गयो, मतलब गिबोन, गेबा, 18 अनातोत अऊर अल्मोन। 19 यो तरह हारूनवंशी याजकों ख तेरा नगर अऊर चराइयां मिली।

20 फिर बाकी कहाती को लेवी वंश को परिवारों ख एप्रैम को हिस्सा म सी कुछ नगर दियो गयो। 21 मतलब उन्ख चराइयों समेत एप्रैम को पहाड़ी देश म खूनी ख शरन लेन ख शकेम नगर दियो गयो, फिर अपनी चराइयों समेत गेजेर, 22 किबसैम, अऊर बेथोरोन; हि चार नगर दियो गयो। 23 अऊर दान को वंश को हिस्सा म सी अपनी अपनी चराइयों समेत, एलतके, गिब्बतोन, 24 अय्यालोन, अऊर गत्रिम्मोन; हि चार नगर दियो गयो। 25 अऊर मनश्शे को अरधो वंश को हिस्सा म सी अपनी अपनी चराइयों समेत तानाक अऊर गत्रिम्मोन; हि दोय नगर दियो गयो। 26 यो तरह बाकी कहातियों को वंश को सब नगर चराइयों समेत दस नगर होतो।

27 फिर लेवियों को वंशों म सी गेर्शोनियों ख मनश्शे को अरधो वंश को हिस्सा म सी अपनी अपनी चराइयों समेत खूनी को शरन नगर बाशान प्रदेश को गोलान अऊर बेशतरा; हि दोय नगर दियो गयो। 28 अऊर इस्साकार को वंश को हिस्सा म सी अपनी अपनी चराइयों समेत किश्योन, दाबरत, 29 यर्मूत, अऊर एनगन्नीम; हि चार नगर दियो गयो। 30 अऊर आशेर को वंश को हिस्सा म सी अपनी अपनी चराइयों समेत मिशाल, अब्दोन, 31 हेल्कात, अऊर रहोब; हि चार नगर दियो गयो। 32 अऊर नप्ताली को वंश को हिस्सा म सी अपनी अपनी चराइयों समेत खूनी को शरन नगर गलील प्रदेश को केदेश नगर, हम्मोतदोर, अऊर कर्तान; हि तीन नगर दियो गयो। 33 गेर्शोनियों को वंशों को अनुसार उन्को सब नगर अपनी अपनी चराइयों समेत तेरा होतो।

34 फिर बाकी लेवियों, मतलब मरारियों को वंशों ख जबूलून को वंश को हिस्सा म सी अपनी चराइयों समेत योकनाम, कर्ता, 35 दिम्ना, अऊर नहलाल; हि चार नगर दियो गयो। 36 अऊर रूबेन को वंश को हिस्सा म सी अपनी चराइयों समेत बेसेर, यहसा, 37 कदेमोत, अऊर मेपात; हि चार नगर दियो गयो। 38 अऊर गाद को वंश को हिस्सा म सी अपनी चराइयों समेत खूनी को शरन नगर गिलाद प्रदेश म को रामोत, महनैम, 39 हेशबोन, अऊर याजेर, यो सब मिलाय क चार नगर हंय, दियो गयो। 40 लेवियों को बाकी वंशों मतलब मरारियों को वंशों को अनुसार उन्ख बारा नगर चिट्ठी डाल क दियो गयो।

41 इस्राएलियों की निजी जमीन को बीच लेवियों को सब नगर अपनी चराइयों समेत अड़तालीस हय। 42 हि सब नगर अपनो चारयी तरफ की चराइयों को संग होती; इन सब नगरों की याच दशा होती।

43 यो तरह परमेश्वर न इस्राएलियों ख ऊ पूरो देश दियो, जेक ओन उन्को पूर्वजों सी कसम खाय क देन ख कह्यो होतो; अऊर हि ओको अधिकारी होय क ओको म बस गयो। 44 अऊर परमेश्वर न उन सब बातों को अनुसार, जो ओन उन्को पूर्वजों सी कसम खाय क कही होती, उन्ख चारयी तरफ सी आराम दियो; अऊर उन्को दुस्मनों म सी कोयी भी उन्को सामने टिक नहीं सक्यो; परमेश्वर न उन सब ख उन्को वश म कर दियो। 45 जितनी भलायी की बाते परमेश्वर न इस्राएल को घराना सी कही होती ओको म सी कोयी बात भी नहीं छूटी; सब की सब पूरी भयी।