Metiu
Evavang Pukat Te Ne Iesu Karisito
Metiu Ga Ven I
Exoxora Molonga Teren Na Ebuk
Metiu ga ven na ebuk, nini era re esongoi ma evura eaposel te ne Iesu. Metiu nini me Juda. Nini ga ven ti eme Juda tiga ngingis evopot te eradi ne Moroa ga ruki i ti vee eradi loklok ukuing kindi. Te xoxora xolonu Hibru, evasiun te eradi loklok ukuing loxo Moroa ga lok ukuing kei. Moroa ga lok ukuing ne Iesu ti lok aro emomono ren. Konong ke xoxora Grik, exongkoxora ni Karisito.
Konong keren na ebuk Metiu ga xora ri emomono loxo Iesu nini ne Karisito. Ma ga lok amolonga gok erokoxora konong ke Emanang Kaala mumu ne Karisito. Ma ne Iesu ga lok epovo mo erokoxora.
Memu re evusongoi mares Iesu ga mere ma Moroa ga lok axutu i kasinge eminere, Metiu ga ven na ebuk. Emares ga ven ni i langan AD 53 o AD 57.
Erokongkoxora puruk konong keren na ebuk:
(1) 1:1-2:23 Maria ga visik ne Iesu konong ke exot kolonu re Orong Devit
(2) 3:1-12 Jon Baptais ga gagas livi engas si ne Iesu
(3) 3:13-4:11 Jon ga baptais ne Iesu ma ne Satan gara lok tongor i
(4) 4:12-14:12 Iesu ga pas onno re exompua Galili ma ga anasa
(5) 14:13-17:21 Iesu ga pas pupuk terokot ma ga anasa
(6) 17:22-18:35 Iesu ga biong ti exompua Galili ma ga anasa
(7) 19:1-20:34 Iesu ga pas lanak ti exompua Judaia ma ga anasa
(8) 21:1-27:66 Ewik memupit te erogugu te ne Iesu ma eminere ren
(9) 28:1-20 Exuxutu kaxat te ne Iesu
1
Eroasing Te Ebibinet Te Ne Iesu
(Luk 3:23-38)
1 Nina e etere avolo te eroasing te ebibinet te ne Iesu Karisito, nini evipisik livi te ne Devit, ma ne Devit nini evipisik livi te ne Abaram.
2 Abaram ni tamana ne Aisak,
ma Aisak ni tamana ne Jakop,
ma Jakop ni tamana ne Juda eburu mi erobata ren,
3 ma Juda ni tamana ne Peres mi ne Sara (nendu easing keren ne Tema).
Ma Peres ni tamana ne Esron,
ma Esron ni tamana ne Ram,
4 ma Ram ni tamana ne Aminadap,
ma Aminadap ni tamana ne Nason,
ma Nason ni tamana ne Salmon,
5 ma Salmon ni tamana ne Boas (Raap ni nene),
ma Boas ni tamana ne Obet (Rut ni nene),
ma Obet ni tamana ne Jesi.
6 Ma Jesi ni tamana ne Devit, Eorong.
Ma Devit ni tamana ne Solomon (nene ni eventixin te ne Uraia),
7 ma Solomon ni tamana ne Roboam,
ma Roboam ni tamana ne Abaisa,
ma Abaisa ni tamana ne Asa,
8 ma Asa ni tamana ne Josepat,
ma Josepat ni tamana ne Joram, ma Joram ni tamana ne Usaia,
9 ma Usaia ni tamana ne Jotam,
ma Jotam ni tamana ne Eas,
ma Eas ni tamana ne Esekaia,
10 ma Esekaia ni tamana ne Manase,
ma Manase ni tamana ne Amon,
ma Amon ni tamana ne Josaia,
11 ma Josaia ni tamana ne Jekonia midi ebexeton. Teren mo exonaleng exulau esep monak Babilon tiga kike eme Israel lanak Babilon ti kolok papaga kasinge exot kolonu rindi.
12 Memu ren, ne Jekonia ni tamana ne Salatiel,
ma Salatiel ni tamana ne Serubabel,
13 ma Serubabel ni tamana ne Abiut,
ma Abiut ni tamana ne Eliakim,
ma Eliakim ni tamana ne Aso,
14 ma Aso ni tamana ne Sadok,
ma Sadok ni tamana ne Akim,
ma Akim ni tamana ne Eliut,
15 ma Eliut ni tamana ne Eliesa,
ma Eliesa ni tamana ne Matan,
ma Matan ni tamana ne Jakop,
16 ma Jakop ni tamana ne Josep, ga vuke ne Maria, nene Iesu, ti soasing i mi ne Karisito.*1:16 Evasiun te easing Karisito ni “eun loklok ukuing.”
17 Koren ma esongoi ma penevet erunut ga ruut te ne Abaram lanak ki ne Devit, ma esongoi ma penevet erunut pes gok ga ruut te ne Devit ise eme Babilon tiga leke eme Israel lanak Babilon, ma esongoi ma penevet erunut pes gok ga ruut memu teme Babilon tiga leke eme Israel lanak Babilon ise evipisik ke ne Karisito.
Evipisik Ke Ne Iesu
(Luk 2:1-7)
18 Ni na exoxora molonga te evipisik ke ne Iesu Karisito. Maria, nene Iesu tiga lok ukuing ke i kusu ti vuke ne Josep, mado kopbi du tuna kolok eburu, ma ne Maria ga renan emadak mi Eronaan Kaala. 19 Josep, nisino, eradi momoton ma ga mumu asu vukat Erokoxora Xis se ne Moses, koren ma ga lok edoxoma ren kusu na vukupe ne Maria. Mado goxopara lok aminamangai i te emanna emomono axava, koren ma ni ga doxoma ri lok kepe sixim mun i.
20 Ma memu Josep ga doxoma mumui na, teleng miin eangelo te Eradi Vuruk ga vot parav i te marantinabo ma ga ukodek, “Josep evipisik livi te ne Devit. Gus marat ti leke ne Maria ukolonu langan nisom, tevangasa mo ebea madak nini i ruunai monak ke Eronaan Kaala. 21 Nini nabo visik emadak temese ma una soasing i mi ne Iesu,*1:21 Evasiun te easing Iesu ni “Moroa i lok aro di.” tevangasa nini nabo lok aro emomono ren kasinge erominingot tindi.”
22 Na eropanga axava ga vot ti lok arutuna exoxora te Eradi Vuruk ga sixisu te ngusuk ke eradi xoxora livi xodek: 23 “Era evene maxat nabo renan ma nabo visik emadak temese ma tinabo soasing i mi ne Emanuel.”*1:23 Aisa 7:14 Evasiun teren, “Moroa eburu mida.”
24 Texonaleng ne Josep ga rovang, ga mu tarasu te exoxora re eangelo te Eradi Vuruk ga xora dotdoso tebe i min, ma ga vangake ne Maria ukolonu langan eventixin teren. 25 Mado nini goxo midi eburu min, iepovo memu re leng ni ga visik emadak. Ma ni ga soasing i mi ne Iesu.