ลอา โมเซ
พะทัม ลอา โมเซ มัฮ ป เกือฮ เอะ ยุง ไลลวง ป ตึก นึง ซัมคัน แตะ นึง จีวิต ไพรม โม อิซราเอน. มัฮ ไลลวง โอก อื ฮา แปน แตะ ครา นึง เมือง อียิป ละ ซ โฮลฮ อื ตังเมือง ละ อาวต โม โกะ แตะ ไอฮ. พะทัม เฮี ไก ลอวย คัก.
1. มัฮ ไลลวง เกือฮ พะจาว โม ฮีบรู โปน ฮา แปน อื ครา เซีญ ปุย, ไม่ เกือฮ อื ฮอยจ ละ บลาวง ซีไน.
2. มัฮ แม ไลลวง ป ซันญา พะจาว อาึง ไม่ ปุย ไน แตะ นึง เกือฮ อื โกตไม ละ อื. โกตไม เซ ป รกา นึง อื เกว ไม่ กัน ปุก กัน ลอก ป ลัง ยุฮ ปุย ละ ปุ แตะ. โนก ฮา เซ เกว ไม่ โกตไม บั่นเมือง โครยญ เจือ. โฮฮ ฮา เซ โกตไม เซ มัฮ ป เกือฮ อื ยุง ไลลวง ตอก ซ ไมจ อื ยุฮ นึง กัน นัปทื อื พะจาว ยุฮ แตะ.
3. คัก ลอวย นึง อื เกว ไม่ กัน ยุฮ ปุย พากัง ระ ละ ซ เกียฮ ฮอยจ ปุย เคะ พะจาว เบือ อื ละ ซ ไววอน แตะ, ไม่ ไลลวง ซตุ ป ลัง นัม ปุย นึง กัน ฮอยจ อื เคะ พะจาว.
ป ระ ไล ฮา ป ไฮญ นึง อื พะทัม เฮี เปลีฮ กัน ซัมคัน ยุฮ พะจาว นึง เกือฮ อื ปุย ไน แตะ ป มัฮ ครา ปุย เซ โปน ฮา ป โซะ อาวม แตะ. ฟวยจ เซ พะจาว เกือฮ ปุย ไน แตะ โฮลฮ แปน บั่น แปน เมือง แตะ, ไม่ เกือฮ อื ไก ควน ซโอว รพาวม ไม่ ป ไมจ ป ซ โฮลฮ อื ลั่กกา แตะ เซ.
ปุย ป ระ กัน ยุฮ นึง พะทัม เฮี มัฮ ไอ โมเซ. ไอ โมเซ เซ มัฮ ปุย เลือก พะจาว ละ ซ แปน อื ป นัม ปุย ไน แตะ เกือฮ โอก ฮา เมือง อียิป. เมาะ ป ไก นึง พะทัม เฮี มัฮ โกตไม กาว เจือ นึง โบ่ต 20 นึง อื ป ไตม ปุย โฮฮ ฮา โอเอีฮ ไฮญ นึง อื เตือง โอยจ อื.
1
โม อียิป โคมเฮง โม อิซราเอน
มอยฮ กวน ยาโคป ป โฮว อาวต เมือง อียิป ไม่ เปือะ แตะ ไม่ กวน เฌือต แตะ มัฮ ตอก เฮี, มัฮ รูเบ่น, ซิเมโอน, เลวี, ยูด่า, อิตซาคา, เซบู่ลุน, เบ่นยามิน ด่าน, นัปทาลี, กาต, ไม่ อาเชอ. เญือม เซ จัตเจือ ยาโคป เซ เตือง โอยจ อื ไก อาลแฆลฮ ปุย. ป มัฮ โยเซป เอีจ อาวต กา อื นึง เมือง อียิป เซ.
เญือม เอีจ เลี่ญ อื โยเซป ไม่ โม เอียกปุ อื ไม่ ปุย เจน เซ ยุม เตือง โอยจ แตะ. โม จัตเจือ อิซราเอน ปังเมอ เอีจ โฮวน กวน เฌือต อื. พรุฮ เนอึม พรุฮ แนม ปอ นาวก อื ยุฮ เมือง เซ.
ฟวยจ เซ ไก แม กซัต โคระ นึง ติ ปุย ป เตียง เมือง อียิป เซ. กซัต เซ ยุง โตว ไลลวง โยเซป เฟือฮ. กซัต เซ อัฮ เฮี ละ โม ลัปซด่อน ยุฮ แตะ, “โม อิซราเอน เฮี เอีจ พรุฮ โฮวน ฮา เอะ. เกง โรฮ ฮา เอะ ไม่ อื. 10 ดัฮ เกิต กัน ชุ เมือง นึง โฮ, โม เฮี ตึน ซ พาวม ดิ ไม่ โม ป ฮอยจ ตอซู ไม่ เอะ ยุ่ง. ดัฮ ตอซู ไม่ เอะ โฮ, อาึ ฮอ นึง ซ ไป โม เอะ นึง, ไม่ ลอต เอิน อื โอก ฮา เมือง เอะ ฆาื อื. ไมจ เอะ ง่อต อาึง เฮียง แตะ ละ โอ แตะ ซ เกือฮ พรุฮ,” อัฮ เซ ละ ปุย.
11 เญือม เซ โม อียิป เกือฮ โม ป มัฮ ไนกุม โคมเฮง อื, คนัป อื ยุฮ กัน โซะ. โม อิซราเอน โฮลฮ ยุฮ เวียง ปิโทม ไม่ เวียง ราอัมเซต ละ กซัต. มัฮ นา ก แฮรน ฟาโร คาวคอง ยุฮ แตะ. 12 โม อิซราเอน โฮว ปุย ละ โคมเฮง แตะ, ปังเมอ โฮว ละ พรุฮ แตะ ไม่ เวือฮ โรฮ ก อาวต อื ปุๆ. โม อียิป ฮลัต นึง อื ฆาื อื. 13-14 คนัป อื ยุฮ กัน โก ตึก นึง เตะ ตอง ไม่ ปุน, ไม่ ยุฮ กัน นึง ชิจ นึง รปึม. โซะ เนอึม ป อาวม โม อิซราเอน เซ นึง คนัป ลอน โม อียิป อื. เลียก พาวม โตว นึง อื เฟือฮ.
15 ไก มะปโกวน ป โซวต กวนงัก ไน โม อิซราเอน ลอา ปุย. มอยฮ อื มัฮ ชิฟรา ไม่ ปูอา. กซัต เมือง อียิป กอก ปุย ลอา เซ เอีญ เคะ แตะ, อัฮ เฮี ละ อื, 16 “เญือม มอง เปอะ โซวต กวน โม ปรโปวน ฮีบรู เญือม ซ เกิต กวน อื เซ, ดัฮ กวน อื มัฮ ปรเมะ โฮ เกือฮ ยุม. ดัฮ มัฮ ปรโปวน เกือฮ ไอม,” อัฮ เซ ละ อื. 17 มะปโกวน ลอา ปุย เซ ปังเมอ ไก รพาวม ฮลัต นึง พะจาว. เนอึง โตว ป อัฮ กซัต เซ ฆาื อื. เกือฮ ลั่ง กวนดุ รเมะ เกิต เซ ไอม. 18 เญือม เซ กซัต เซ กอก แม มะปโกวน ลอา เซ เอีญ เคะ แตะ ฆาื อื. ไฮมญ อื, “เมอยุ ยุฮ เปอะ ตอก เซ? เกียฮ เกือฮ โน่ง เปอะ กวนงัก รเมะ เซ ไอม ลั่ง เมอ?” อัฮ เซ ละ อื.
19 โม เซ โลยฮ อื, “ปรโปวน ฮีบรู ตอก โตว ปรโปวน อียิป. ไกลจ ลัมเลือ ไก กวน. กวน อื เซ เอีจ เกิต เอิน กา เฆียง ฮอยจ เอะ เคะ อื,” อัฮ เซ. 20-21 พะจาว เลียก พาวม นึง มะปโกวน ลอา เซ ฆาื อื. เกือฮ อื โฮลฮ กวน เฌือต แตะ โฮวน, นึง มัฮ อื ปุย นัปทื เนอึม พะจาว ไม่ ฮลัต แตะ นึง. โม อิซราเอน เซ พรุฮ แนฮ ปุ ปุ. เกง โรฮ ไม่ อื.
22 ฟวยจ เซ ฟาโร ดวน แม ปุย ไน แตะ ตอก เฮี, “เมาะ ป มัฮ กวนงัก รเมะ ไน โม ฮีบรู เซ, ไมจ เปอะ โปวฮ โตะ โกลงไน โครยญ โฆะ อื. กวนงัก รโปวน นึง อื ละ เกือฮ ไอม,” อัฮ เซ ละ โม ลัปซด่อน ยุฮ แตะ เตือง โอยจ อื.