เยเรมี
เยเรมี มัฮ ป ซึป ลปุง พะจาว ละ ปุย เจน แลฮ รอย เนอึม กา ฮอยจ พะเยซู. (ยุฮ กัน เน่อึม นึง เนอึม 626 ฮอยจ ละ เนอึม 586 กา เกิต พะเยซู.) ติ เจน ยุฮ อื กัน นึง เพอึก แตะ ปุย 40 เนอึม เซ, เยเรมี ซตอก ลอป ปุย ไน พะจาว เกือฮ ยุง ไลลวง ซ ลอก แตะ ตุต ฆาื ไว อื ฮุป ไม่ ยุฮ แนฮ อื ป พิต ละ พะจาว. เยเรมี เตือน ยุ อื นึง ไง่ แตะ เญือม ฮอยจ ยุฮ โม บ่าบี่โลน ไลจ ไม่ เยรูซาเลม เมอ. เอีจ เกิต เนอึม ตอก อัฮ เยเรมี อื ซ เกิต เซ. เนบู่คัตเนซา ยุฮ เนอึม ไลจ ไม่ วิฮัน ยุฮ พะจาว ไม่ โรวก อื ปุย โฮวน เตือง กซัต ยุฮ อื ละ ซ แปน อื ครา นึง เมือง บ่าบี่โลน เซ. เยเรมี รโฮงะ โรฮ อาึง ไลลวง ซ โฮลฮ โม ยิว เอีญ เน่อึม นึง แปน แตะ ครา เซ ไม่ ไลลวง ซ เฌาะ ตัง โคระ แม อื เมือง ยูด่า เกือฮ ไมจ แม ติ โฮน.
พะทัม เยเรมี ไก ปาวน คัก. (1) มัฮ ลปุง ซตอก พะจาว ป ฮอยจ ละ โม ยูด่า ไน ซไม แปน โยซียา, เยโฮยาคิม, เยโฮยาคิน, ไม่ เซเด่คียา กซัต เมือง ยูด่า. (2) มัฮ ไลลวง ป ไซฮ บ่ารุก ป มัฮ เลคา ยุฮ เยเรมี. มัฮ ไลลวง ซัมคัน ป เกิต ละ เยเรมี ไม่ ลปุง พะจาว ป ซึป เยเรมี ละ ปุย โฮวน เจือ. (3) มัฮ ลปุง พะจาว ป ฮอยจ ละ ปุย ตังเมือง โฮวน ปะเทต. (4) มัฮ ไลลวง เกว ไม่ ป เอีจ เกิต ละ ปุย เวียง เยรูซาเลม เญือม ไลจ บั่นเมือง ไม่ โฮลฮ ปุย โฮว แปน ครา นึง เมือง บ่าบี่โลน เซ.
เยเรมี มัฮ ปุย ที รพาวม ป ฮรัก เนอึม บั่นเมือง ยุฮ แตะ. โซะ ลัมเลือ ละ อื เญือม จัมเปน อื รโฮงะ ไลลวง เม่ะมั่ก โซะ ป ซ เกิต ละ ปุย นึง เมือง โกะ อื เซ. ไก โฮวน โบ่ต ป เปลีฮ เยเรมี รพาวม โซะ อาวม แตะ นึง กอก พะจาว แตะ แปน ป ซึป ลปุง พะจาว. ลปุง พะจาว ปังเมอ มัฮ ตอก งอ รเออึป โตะ รพาวม อื. เญาะ ปุน คัม โตว โอ แตะ อัฮ ฆาื อื.
คอ ป ระ ลัมเลือ ไล นึง พะทัม เยเรมี เฮี ไก ง่อน ป เกว ไม่ เจน เฆียง เฮี นึง อื, มัฮ เญือม ซ เกือฮ พะจาว ลปุง ซันญา โคระ ยุฮ แตะ ละ ปุย. เจน เซ ปุย ซ ยุฮ เนอึม อื ตัม ลปุง ซันญา ยุฮ พะจาว ไม่ แตะ เซ. เญาะ จัมเปน โตว อื ไก ปุย ปลัฮเตะ ป มอง แปน คู ละ ซ เพอึก แตะ โม เซ โบ อื. ลปุง ซันญา โคระ เซ พะจาว ซ ไซฮ อื โตะ รพาวม ปุย, อัฮ เซ. (เยเรมี 31:31-34)
1
1 ลปุง เฮี มัฮ ป อัฮ ป มวยญ เยเรมี ป มัฮ กวน ฮินคียา. เยเรมี เซ มัฮ ไน โม ซตุ ติ ปุย ป อาวต นึง ย่วง อานาโทต นึง เคต เจอ เบ่นยามิน. 2 เญือม เอีจ เติง เนอึม กาว ลอวย นึง กัน โฮลฮ โยซียา กวน อาโมน แปน กซัต เมือง ยูด่า เยอ, ลปุง พะจาว ฮอยจ ละ เยเรมี. 3 กังเคะ เอ ลปุง พะจาว ฮอยจ แม ละ อื เจน มัฮ เยโฮยาคิม ป มัฮ กวน โยซียา เซ กซัต เมือง ยูด่า. ฟวยจ เซ ฮอยจ แม ละ อื โฮวน โฮน ฮอยจ ละ เนอึม กาว โรฮ ติ นึง กัน โฮลฮ เซเด่คียา กวน โยซียา แปน กซัต เมือง ยูด่า. ฮอยจ แม โรฮ ละ เญือม ฮอยจ โฮมวต ปุย ปุย เวียง เยรูซาเลม ไม่ โรวก อื แปน ครา แตะ เซ, ปุก เอิน เคิ พอน นึง เนอึม เซ เอิน.
พะจาว เลือก เยเรมี ละ ซ เกือฮ อื ซึป ลปุง แตะ
4 พะจาว อัฮ เฮี ละ อาึ, 5 “อาึ เอีจ ยุง ป มัฮ ปะ ไม่ เอีจ เลือก อาึง ปะ กา เฆียง ยุฮ แตะ ปะ เน่อึม โตะ เวียก มะ เปอะ ลั่ง. อาึ เอีจ ดุฮ ปะ แปน ป ซึป ลปุง แตะ ละ เมือง ปุย โฮวน เมือง เน่อึม กา เฆียง เกิต เปอะ ลั่ง,” อัฮ เซ เนิ.
6 อาึ อัฮ เฮี ละ พะจาว, “โอ พะจาว เยโฮวา, อาึ มัฮ ลั่ง กวนดุ, ดิ เกียฮ อัฮ เกียฮ อู โตว,” อัฮ เซ ละ.
7 พะจาว ปังเมอ อัฮ เฮี เนิ, “ปุ เญือะ อัฮ ติ เปอะ กวนดุ. ปุย เมาะ ป ดวน อาึ เปอะ โฮว เคะ อื ไมจ เนอึม เปอะ โฮว เคะ อื. เมาะ ป อัฮ อาึ ละ เปอะ ไมจ เนอึม เปอะ รโฮงะ ละ อื. 8 ปุ ฮลัต นึง โม เซ นึง แจง อาวต อาึ ไม่ เปอะ. อาึ ซ เฆีญ ปะ ฮา อื,” อัฮ เซ พะจาว.
9 เญือม เซ พะจาว ซนาว เตะ แตะ จิ มวยญ เญอะ. อัฮ เฮี เนิ, “ปเลี่ย เฮี อาึ เอีจ เกือฮ ลปุง แตะ อาวต นึง มวยญ ปะ. 10 ง่อต แลน, เนาะ เฮี อาึ เอีจ เกือฮ ปะ ไก อัมนัต ละ ซ ยุฮ เปอะ โอเอีฮ ตอก เฮี ละ เมือง ปุย โฮวน เมือง. ซ โฮลฮ เปอะ ตอยจ เกือฮ โอก ง่อน, ซ โฮลฮ เปอะ เญื่อฮ ง่อน, ซ ยุฮ เปอะ ไลจ ไม่ ง่อน, ซ รเคอึป เปอะ ยุฮ ง่อน. ซ โฮลฮ เปอะ โก โคระ ง่อน, ซ โฮลฮ เปอะ ซมา โคระ ง่อน,” อัฮ เซ เนิ พะจาว เยอ.
11 ฟวยจ เซ ลปุง พะจาว ฮอยจ แม ละ อาึ ตอก เฮี, “เยเรมี, มัฮ เมอ ป ยุ เปอะ เซ?” อัฮ เซ เนิ.
อาึ โลยฮ ละ อื, “ยุ กัก โคะ อะลมัน ติ,” อัฮ เซ ละ.
12 พะจาว อัฮ แม อื ละ อาึ ตอก เฮี, “เอีจ ปุก ป อัฮ เปอะ เซ. อาึ ควป แลน* 1:12 นึง ลปุง ฮีบรู “ควป แลน” ไม่ “อะลมัน” โอก เซียง ตอก ปุ แตะ. ลปุง แตะ ละ ซ เกือฮ แตะ โอเอีฮ เกิต ตัม ป อัฮ แตะ โครยญ เจือ,” อัฮ เซ เนิ.
13 ฟวยจ เซ พะจาว อัฮ แม อื เนิ ตอก เฮี, “มัฮ เมอ ป ยุ เปอะ เซ?” อัฮ เซ เนิ. อาึ โลยฮ แม ละ อื, “อาึ ยุ โดง รอาวม ปุก ลไล ลลอก อื, ฆิฮ ลวง ลั่กล่าวง,” อัฮ เซ ละ.
14 พะจาว อัฮ แม เฮี, “อาึ ซ เกือฮ ป กอยจ ป ราวม ฮอยจ เน่อึม นึง ลวง ลั่กล่าวง. ซ เกือฮ ลอก ปุย เมือง เฮี เตือง โอยจ อื. 15 อาึ ซ กอก เกอะ ปุย อาวต ลวง ลั่กล่าวง โครยญ เมือง อื. โม กซัต ยุฮ อื ซ ฮอยจ อาึง ก งาวม คึ ยุฮ แตะ โบ รเวือะ ฆรุง เมือง เยรูซาเลม เตือง ไพ เตือง มัน. ซ เกือฮ ตฮัน ยุฮ แตะ แวต เอิน เวียง เซ. ซ ตอซู โรฮ ปุ แตะ ไม่ ปุย นึง เมือง ยูด่า เซ โครยญ ย่วง. 16 ปุย ไน อาึ เอีจ ยุฮ ป ฆอก ป เบร. เอีจ ละ โปวฮ อาึ. ซาวป ตอง ป ซออย ฮงาื ละ พะ ไฮญ. ซาวป โรฮ ไว โอเอีฮ ป ยุฮ แตะ นึง เตะ โกะ แตะ ไอฮ. มัฮ ฆาื เซ ป ซ รเตีฮ อาึ ปุย ไน แตะ เกือฮ ลอก ตุต แตะ ฆาื อื,” อัฮ เซ พะจาว.
17 อัฮ โรฮ เฮี เนิ, “เยเรมี, ไมจ เปอะ เพรียง ติ แตะ. โอเอีฮ เมาะ ป ดวน อาึ เปอะ รโฮงะ เซ ไมจ เปอะ โฮว รโฮงะ เนอึม ละ อื โครยญ เจือ. ปุ ฮลัต นึง, เดอึม อาึ โอ ซ เกือฮ เปอะ โฮว ละ ฮลัต แตะ ซองนา อื. 18 โม กซัต ยูด่า ไม่ โม จาวไน ยุฮ อื ไม่ โม ซตุ นึง อื เตือง โม ลัปซด่อน ตึน ซ ตอซู ปุ แตะ ไม่ ปะ. อาึ ปังเมอ ซ เกือฮ ปะ แปน ตอก เวียง ไก ฆรุง ตอน ฮมัน. ซ เกือฮ ปะ ตอก ด่อง ไร ระ ละ อื. ซ เกือฮ โรฮ ปะ แปน ตอก ฆรุง ไร ซเงี ละ ซ เกียฮ อาวต ตอน อาวต ฮมัน เปอะ ซองนา อื. 19 ปัง ฮอยจ ตอซู ปุย โม เซ ไม่ เปอะ ซ เกียฮ เป โตว ปะ เฟือฮ เอิน นึง อาวต อาึ ไม่ เปอะ. อาึ ซ เกือฮ ปะ โปน ฮา อื,” อัฮ เซ พะจาว.