1 เญือม เซ ลปุง พะจาว ฮอยจ แม ละ โยนา แม. แปน ลอา โฮน เตือง เซ. อัฮ เฮี ละ อื, 2 “ไมจ เปอะ โกฮ โฮว ฮอยจ นึง เวียง นีนะเว ป มัฮ เวียง ระ เซ. ไมจ เปอะ รโฮงะ โอเอีฮ ละ ปุย นึง อื ตัม ป ดวน อาึ เปอะ อัฮ,” อัฮ เซ ละ อื พะจาว.

3 โยนา เนอึง เนอึม ป อัฮ พะจาว. โกฮ โฮว เอิน ฆาื อื ฮอยจ เวียง นีนะเว. เวียง นีนะเว เซ มัฮ เวียง ระ ลัมเลือ ปอ เอิน ลอวย ซเงะ คระ เดอึม เลี่ป ยุฮ โบรก นึง อื. 4 โยนา เลียก โตะ โบรก เวียง เซ ตา ติ ซเงะ คระ. ครอฮ อื ละ ปุย ตอก เฮี, “ไก ลั่ง รปาวน ซเงะ โน่ง. ฟวยจ เซ นีนะเว ซ ไลจ ซ โลม,” อัฮ เซ. 5 ปุย เวียง นีนะเว เจือ เอิน ลปุง พะจาว เซ. ดวน ปุ แตะ เออึป ป โซม แตะ. จาวป เครอึง ฮาื ฆัน เตือง ป ระ ป แตวะ.

6 กซัต เมือง นีนะเว เยอ เญือม ฮมอง อื รซอม อัฮ โยนา เซ, โกฮ ฆาื อื ฮา ก งาวม คึ แตะ. ปอยจ โรฮ เครอึง ไมจ แตะ, จาวป เครอึง ฮาื ฆัน, งาวม นึง จะ. 7 กซัต เซ เกือฮ รซอม แตะ ฮอยจ ละ ปุย เลี่ป เวียง นีนะเว เซ ตอก เฮี, “รซอม เฮี มัฮ ป อัฮ กซัต ไม่ โม คารัตชกัน ยุฮ อื ละ ปุย เตือง โอยจ อื. ปุ เกือฮ ปุย โซม โอเอีฮ ติ เจือ เนอึม. ซัตซิง ปุ โรฮ เกือฮ โซม เกือฮ เปือม ติ ตัว เนอึม. รอาวม ปุ โรฮ เกือฮ ญุ อื. 8 เกือฮ ไอฮ เครอึง ฮาื ฆัน เตือง ปุย เตือง ซัตซิง โรฮ. เกือฮ ปุย ปัว เนอึม ปัว แนม พะจาว เลียก พาวม นึง แตะ. เกือฮ ปุย เตือง โอยจ อื เฌาะ ติ แตะ ฮา กัน ฆอก ยุฮ แตะ ไม่ กันไฮะ กันฮอน ยุฮ อื โครยญ เจือ. 9 ไก โตว ป ยุง. เมอ เตือง อื พะจาว ซ เปียน รพาวม แตะ ละ เอะ ฆาื อื ยุ่ง ไม่ โอ อื ซ ฮาวก รพาวม ละ เอะ เดอึม เอะ โอ ซ ยุม ฆาื,” อัฮ เซ นึง รซอม ดวน แตะ ปุย, กซัต เตอ.

10 เญือม ยุ พะจาว ตอก ยุฮ อื ไม่ เฌาะ อื โกะ ลโปลฮ อื พาวม แตะ ฮา กัน ฆอก ยุฮ ไพรม แตะ ตอก เซ พะจาว เปียน เนอึม รพาวม แตะ ฮา กัน ตะ แตะ ยุฮ ไลจ ไม่ เวียง เซ ฆาื อื. ยุฮ เนอึม โตว ไลจ ไม่ อื.