1 เญือม อาวต ลั่ง โยชูวา นึง เมือง ชิตทิม เมอ ดวน ปรเมะ ลอา ปุย, บระ เกือฮ อื โฮว เลียป เมือง คะนาอัน. มัฮ ระ ฆวต เกือฮ อื เลียป เวียง เยรีโค นึง อื. ปุย ลอา เซ โฮว เนอึม, ฮาวก นึง เญือะ ติ, ปุก เญือะ มอจังคึต. มอยฮ กุม เญือะ เซ มัฮ ราฮัป. ตะ ไอจ นา เซ.

2 ซาวม เซ ไก ป โฮว รโฮงะ ละ กซัต เวียง เยรีโค ตอก เฮี, “ไก ปุย อิซราเอน ง่อน, เลียก ละ ซาวป แตะ เลียป แลน ก อาวต เอะ เฮี,” อัฮ เซ ละ อื. 3 กซัต เซ ดวน ปุย โฮว อัฮ อื ละ ราฮัป ตอก เฮี, “ป ฮอยจ เญือะ เปอะ เซ ไมจ เปอะ ตาว ฮอยจ เคะ อาึ. โม เฮี มัฮ ฮอยจ อื ละ ซ ซาวป แตะ เลียป แลน ปลัฮเตะ อาวต เอะ เตือง โอยจ อื,” อัฮ เซ ละ อื.

4-6 ราฮัป อัฮ เฮี ละ โม เซ, “ฮอยจ เนอึม ปรเมะ เคะ เอะ, ปังเมอ โอ ยุง เน่อึม ลั่ก ฮอยจ อื. เมือ กปู อื กา ซอง ปุย รเวือะ ฆรุง เวียง, ปุย โม เซ เอีจ ไฆร. อาึ ยุง โตว คระ โฮว อื. ดัฮ เปอะ ซไจ โฮว อาื เอิน โฮ, ตึน ซ เครอึป ลั่ง เปอะ,” อัฮ เซ ละ อื. ญันได่ มัฮ เม่าะ อื ปุย ลอา เซ เกือฮ อื ฮาวก อาวต ราว พรัง เญือะ แตะ, เกือฮ อื ไอจ ฆรึม โม่ะ ฆัน ฮอก แตะ นึง พรัง เซ. 7 กวนไจ ยุฮ กซัต เซ โอก ฮา เวียง เซ, ซาวป อาื ป เลียป เมือง แตะ เซ, ฮอยจ ละ คระ ก เตือง ปุย โกลง จอแด่น. เญือม เอีจ โอก โม ป โฮว ซาวป อาื เซ ฮา เมือง เงอ, ปุย ซอง เอิน รเวือะ.

8 ซาวม เซ กา ปุน ปุย ไอจ เจอ, ราฮัป ฮาวก อู ไม่ ปุย ลอา เซ นึง พรัง เญือะ แตะ เซ. 9 อัฮ เฮี ละ อื, “อาึ เอีจ ยุง เงอะ เกือฮ พะจาว เมือง เฮี ละ เปอะ. ปุย เมือง เฮี เตือง โอยจ อื, เอีจ อัฮ เตะ ฮรัม ชวง ฆาื ฮลัต ลอน แตะ นึง โม เปะ. 10 เอะ เอีจ ฮมอง เงอะ ไลลวง เกือฮ พะจาว ปลัฮ รอาวม ซครัก ซออฮ ละ โม เปะ เญือม โอก เปอะ ฮา เมือง อียิป โฮ. ฮมอง โรฮ ไลลวง ยุฮ โม เปะ ยุม ไม่ กซัต อาโมไร เตือง ลอา อื ป มัฮ กซัต ซีโฮน ไม่ กซัต โอก, ป อาวต บลัฮ โกลง จอแด่น ลวง โอก ซเงะ ลั่กเติต โฮ. 11 เญือม ฮมอง เอะ โอเอีฮ ตอก เซ, ไก โตว ติ ปุย เนอึม ป โอ ฮลัต เตีจ ฆาื อื. มัฮ ฆาื มัฮ เยโฮวา พะจาว ยุฮ เปอะ ป กุม ปลัฮเตะ ไม่ ปลัฮ มะลอง เตือง โอยจ อื. 12 ปเลี่ย เฮี ปัว เปอะ ซันญา อาึง ละ อาึ นึง มอยฮ พะจาว ยุฮ เปอะ ติ เจือ. อาึ เอีจ เปลีฮ รพาวม เลียก พาวม แตะ นึง โม เปะ. ปัว โรฮ เปอะ ซันญา ซ เปลีฮ เปอะ รพาวม เลียก พาวม แตะ นึง เญือะ เญะ โรฮ, 13 ฮอยจ ละ มะเปือะ เญือะ ม่า เยอะ ไม่ เอียกปุ คระ เฌือต เตอะ เตือง โอยจ อื, เกือฮ อาึ ไก ควน ยุง ซโตฮ ติ เจือ,” อัฮ เซ ละ อื.

14 ปรเมะ เซ โลยฮ อื ละ อื, “ปะ เอีจ ฮลัก เนอึม เปอะ กอ จีวิต เอะ. ดัฮ เปอะ โอ อู ไลลวง เอะ ละ ปุย ไฮญ โฮ, เอะ ซันญา อาึง เบือ มอยฮ พะจาว ซ ฮลัก โรฮ แตะ กอ จีวิต โม เปะ เอ. เญือม เอีจ เกือฮ พะจาว เมือง เฮี แปน คอง เงอะ เอะ ซ เปลีฮ รพาวม เลียก พาวม แตะ นึง เปอะ ตัม ป ปัว เปอะ เซ,” อัฮ เซ ละ อื.

15 เญือะ ราฮัป อาวต เอิน นึง ฆรุง เวียง เซ. เญือม เซ ราฮัป ตาึก โลง โม่ะ คระ โตะ นาตัง เญือะ แตะ เซ ฆาื อื, เกือฮ ปุย ลอา เซ เลีฮ นึง อื. 16 ราฮัป อัฮ เฮี ละ ปุย ลอา เซ, “ไมจ เปอะ ฮาวก เม่าะ ติ แตะ นึง บลาวง เซ เมาะ ลอวย ซเงะ เดอึม ปุย โอ ซ ยุ เปอะ. ดัฮ โม ป โฮว อาื เปอะ เซ เอีจ ลเตือฮ แม โฮ, ลอต เปอะ เอีญ แปน,” อัฮ เซ.

17-18 ปุย ลอา เซ เอีจ ซตอก อาึง ราฮัป ซโตฮ ตอก เฮี, “ปะ ไมจ เปอะ ตาึก โลง กอย ซครัก นึง นาตัง ก เลีฮ เอะ เฮี. เกือฮ โม มะเปือะ เอียกปุ ตุเจอ เปอะ อาวต ดิ ไม่ เปอะ โตะ เญือะ เปอะ เฮี เตือง โอยจ อื. ดัฮ เปอะ โอ ยุฮ ตอก เซ เญือม เอีจ เลียก เอะ นึง เมือง เปอะ เฮี, เอะ ปุน ลัปลอง โตว ซ ยุฮ แตะ ตัม ป ซันญา แตะ อาึง ละ เปอะ เซ. 19 ดัฮ ไก ป โฮว ก โบรก โอก ก เตะ โปน ฮา โตะ รเวือะ เญือะ เฮี, เอะ ปุน ลัปลอง โตว. ดัฮ ยุม โฮ, มัฮ ฆาื โกะ อื ไอฮ. ละ โม ป อาวต นึง เญือะ เปอะ เฮี เอะ ลัปลอง เงอะ นึง โกะ แตะ ไอฮ. ไก โตว ป ซ ลอก เปอะ ติ ปุย เนอึม. 20 ปัง มัฮ ตอก เซ, ดัฮ ปะ อู ไลลวง เฮี ละ ปุย โฮ, เอะ เญือะ ซ เกียฮ ยุฮ โตว ตัม ลปุง ซันญา แตะ อาึง เฮี,” อัฮ เซ ละ อื.

21 ราฮัป ญอม เนอึม ยุฮ อื ตัม ป อัฮ ปุย ลอา เซ. เกือฮ อื เอีญ. ปุย ลอา เซ ลอต เอีญ ฮา อื. ราฮัป ตุย เนอึม ตาึก โลง กอย ซครัก เซ นึง นาตัง เญือะ แตะ เซ.

22 ปุย ลอา เซ ฮาวก เม่าะ เนอึม นึง บลาวง. อาวต นา เซ ลอวย ซเงะ ฮอยจ ละ เอีญ โม ป โฮว ซาวป แตะ. โม ป ซาวป เซ ซาวป เนอึม ซาวป แนม อื ติ เจน คระ เซ. เมือต โอ ยุ อื เอีญ ฆาื อื ฮอยจ นึง เวียง เยรีโค. 23 ฟวยจ เซ ปุย ลอา เซ เลีฮ ฮา บลาวง เซ, เตือง โกลง จอแด่น ฮอยจ เคะ โยชูวา. อู ไลลวง ป ยุ ป ฮมอง แตะ ละ อื โครยญ เจือ. 24 อัฮ เฮี, “พะจาว เอีจ เกือฮ เนอึม เมือง เฮี ละ เอะ เตือง โอยจ อื. ปุย นึง อื เตือง โอยจ อื เอีจ อัฮ เตะ ฮรัม ชวง ฆาื ฮลัต ลอน แตะ นึง โม เอะ,” อัฮ เซ.