มาลาคี
พะทัม มาลาคี มัฮ ป ไซฮ ปุย กา เกิต พะเยซู นึง ปลัฮเตะ ปาวน รอย โฮฮ เนอึม. เจน เซ เอีจ ฟวยจ เฌาะ ยุฮ ปุย วิฮัน โคระ โอ. ปาวไม ระ ยุฮ มาลาคี เยอ มัฮ ฆวต ซตอก อื โม ซตุ ไม่ โม ลัปซด่อน ละ ซ เกือฮ อื เนอึม รพาวม ละ พะจาว, ไม่ โตก อื ละ ลปุง ซันญา ยุฮ พะจาว ไม่ ปุย ไน แตะ. ซไม มาลาคี เซ, ปุย เอีจ เกือฮ ติ แตะ ซลัฮ นึง ทื แตะ พะจาว. เอีจ ที นึง พลวย อื จีวิต แตะ ลเลียก รไม่ ไม่ ป ฆอก ป เบร, ไม่ โอ อื เญือะ นัปทื เนอึม พะจาว ตอก ไพรม แตะ. โม ซตุ ไม่ โม ลัปซด่อน โรวต ยุฮ ป บ่วก ละ พะจาว นึง โอ อื เญือะ ญอม ทไว ป ลัง ทไว แตะ ละ อื. เญือะ เกือฮ โตว โรฮ จีวิต แตะ ปุก ตัม ลปุง ซตอก พะจาว ละ แตะ. ปัง มัฮ ตอก เซ มาลาคี รโฮงะ ไลลวง ซ ฮอยจ พะจาว เคะ อื ติ โฮน, ละ ซ รเตีฮ อื โอเอีฮ ละ ปุย ไน แตะ, ไม่ ซ เกือฮ อื ปุย ไน แตะ แปน ปุย ซง่ะ ซงอม. กา เซ ปังเมอ ซ เกือฮ ป ซึป กัม นัม ปัก แตะ ฮอยจ ติ ปุย ละ ซ เพรียง อื อาึง คระ ละ แตะ ลั่กกา แตะ. ปุย เซ ซ เกือฮ ปุย โตก ละ ลปุง ซันญา พะจาว อาึง ไม่ ปุย.
1
1 ลปุง โม เฮี มัฮ ลปุง ระ ไล ยุฮ พะจาว ป ฮอยจ ละ โม อิซราเอน. มัฮ ป ซึป มาลาคี ละ อื.
พะจาว ฮรัก โม อิซราเอน
2 พะจาว อัฮ เฮี, “อาึ เอีจ ฮรัก โม เปะ เตือง โอยจ เปอะ,” อัฮ เซ.
โม เปะ ปังเมอ ไฮมญ เปอะ ตอก เฮี, “ฮรัก เปอะ เอะ ตอก เมอ?” อัฮ เปอะ เซ.
พะจาว โลยฮ อื, “เอซาว ไม่ ยาโคป โม่ มัฮ เอียกปุ ปุ แตะ? อาึ ปังเมอ ฮรัก โม ยาโคป นึง อื. 3 โม เอซาว เยอ อาึ จัง เงอะ. อาึ เอีจ เกือฮ บลาวง ฌื เมือง เอซาว แปน โอยจ ลาึน. เมือง อาวต อื อาึ เอีจ มอป ละ บราวก นึง ลาึน เวือฮ เซ.”
4 โม เมือง เอโด่ม ป มัฮ เมือง อาวต จัตเจือ เอซาว เซ นึง, ปัง อัฮ ติ แตะ ซ เฌาะ โก โคระ แม ย่วง ฮัง นึง เมือง แตะ เซ เกือฮ ไมจ แม ตอก ไพรม แตะ, พะจาว ป กุม ตฮัน มะลอง ปังเมอ อัฮ เฮี,
“เกือฮ โก อื เมิฮ. อาึ ซ เญื่อฮ โคระ แม เยอะ ฮา อื. ปุย ซ อัฮ เมือง เอโด่ม เซ มัฮ เมือง ฆอก เมือง เบร. มัฮ โม ป ซ ลอก ลอป รพาวม ฮาวก ยุฮ พะจาว,” อัฮ เซ พะจาว เยอ. 5 โม เปะ โม อิซราเอน ซ ยุ เปอะ นึง ไง่ แตะ. โม เปะ ซ อัฮ เปอะ ฆาื อื ตอก เฮี, “ระ เนอึม พะจาว. อัมนัต อื พรุ เฮือ ละ ปุย โปน เอิน ม่าื เคต เมือง อิซราเอน ก ซไง อื,” อัฮ เปอะ เซ.
กัน ทื ปุย พะจาว ไม่ รพาวม โอ เนอึม แตะ
6 พะจาว ป กุม ตฮัน มะลอง อัฮ อื ละ โม ซตุ ตอก เฮี, “กวน รเมะ นัปทื เปือะ แตะ. กวนไจ นัปทื ปอเลียง แตะ. ดัฮ อาึ มัฮ เปือะ เปอะ, เมอยุ โอ เปอะ ญอม นัปทื อาึ อื? ดัฮ อาึ มัฮ ปอเลียง เปอะ, เมอยุ โอ เปอะ เนอึง ป อัฮ อาึ อื? โม เปะ ป มัฮ โม ซตุ อู, เอีจ มัฮ โม เปะ ป เพียก แฮม อาึ อื,” อัฮ เซ ละ อื พะจาว.
โม เปะ อัฮ เปอะ ฆาื อื ตอก เฮี, “เอะ เพียก แฮม ปะ ตอก เมอ?” อัฮ เปอะ เซ.
7 พะจาว โลยฮ อื ตอก เฮี, “มัฮ เฮี ป ยุฮ เปอะ. โม เปะ เอีจ ทไว เปอะ โอเอีฮ ป รแอม ละ อาึ นึง คัน นึง วิฮัน ยุฮ ฮุ,” อัฮ เซ พะจาว.
“เอะ ทไว โอเอีฮ รแอม ละ เปอะ ตอก เมอ?” ตึน ซ อัฮ เปอะ เซ.
พะจาว อัฮ เฮี, “เอีจ มัฮ พลิฮ เปอะ คัน ซง่ะ ซงอม ยุฮ ฮุ. 8 เญือม ตาว เปอะ ซัตซิง จัก ไง่ โบวก เตะ โบวก ชวง ไม่ ป โซะ อื ละ ทไว เปอะ ละ อาึ อัม มัฮ อัฮ เปอะ โอ พิต? ลอง แลน เกือฮ โอเอีฮ ตอก เซ ละ จาวเมือง ยุฮ เปอะ ตัม ไอฮ อื ละ เปอะ. อัม ซ ปุก อื รพาวม อื? แจง โอ อื ซ ปุก เกอ,” อัฮ เซ พะจาว ป กุม ตฮัน มะลอง เงอ.
9 “ปัว พะจาว เลียก พาวม นึง เอะ,” อัฮ ลอป เปอะ เซ.
เญือม ทไว เปอะ ป โอ ไมจ ละ อื ตอก เซ อัม ซ เกียฮ เลียก พาวม นึง เปอะ? อัม ซ เกียฮ โพต อื ป ไมจ ละ เปอะ? แจง โอ อื เกียฮ ฮา. พะจาว กุม ตฮัน มะลอง อัฮ เฮี, 10 “ฮา ซ เกือฮ เปอะ ปุย ยุฮ ป โอ ปุก ตอก เซ อาึ ฆวต เกือฮ เอิน ปุย ซอง แปฮ รเวือะ วิฮัน เซ ฮา. เญือะ ฆวต เกือฮ โตว ปุย ทไว ป โอ ไมจ ตอก เซ. เญือะ ฆวต เกือฮ โตว ปุย แพรฮ งอ นึง คัน ยุฮ แตะ เฟือฮ เอิน. มัฮ เนอึม ป โอ ไก ป มัฮ โอเอีฮ ตอก เซ เยอ. ป ยุฮ โม เปะ ปุก โตว รพาวม เมอะ. อาึ เญือะ ซ รัป โตว ป ทไว เปอะ,” อัฮ เซ พะจาว กุม ตฮัน มะลอง.
11 “เน่อึม นึง ลั่ก โอก ซเงะ ฮอยจ ละ ลั่ก เลียก ซเงะ เอ มอยฮ อาึ มัฮ ป ระ ไล ละ ปุย โครยญ เมือง. เอีจ ไก ป ทไว ป ซออย ฮงาื ละ อาึ อื ไม่ ป ซง่ะ ซงอม ละ ทื อื มอยฮ อาึ โครยญ โดฮ. มอยฮ อาึ อื มัฮ เนอึม ป ระ ไล ละ ปุย โครยญ เมือง,” อัฮ เซ พะจาว กุม ตฮัน มะลอง.
12 “โม เปะ ปังเมอ พามัต เปอะ อาึ นึง เกือฮ เปอะ คัน ยุฮ อาึ แปน ป โอ ซัมคัน, ไม่ เกือฮ เปอะ ปุย ทไว ซัตซิง โละพริ นึง. 13 โม เปะ เอีจ พามัต โรฮ เปอะ กัน ทไว ปุย โอเอีฮ ละ อาึ. อัฮ เปอะ ติ แตะ เตือ ออป นึง. ดัฮ เปอะ โรวก ทไว ซัตซิง ป บระ แตะ ไม่ ป คาโด่ อื ไม่ ป อาวม อื ป โซะ, อาึ อัม ซ ปุน รัป เน่อึม นึง เปอะ?
14 “อาึ มัฮ กซัต ระ. เญือม ซันญา ปุย อาึง ละ ซ ทไว แตะ แกะ ปิ โปก ไมจ ยุฮ แตะ ละ อาึ, ดัฮ ลเตือฮ แม โรวก ป ไก ตอก โละพริ อื, ปุย บ่วก ตอก เซ ซ ลอก ป โอยจ นึง โซะ แตะ ฆาื อื. ปุย โครยญ เมือง ไมจ อื ฮลัต นึง อาึ ไม่ นัปทื เนอึม แตะ อาึ,” อัฮ เซ พะจาว กุม ตฮัน มะลอง.