Ubvur uwu inggbaashia
Ubitru
aka atsɛng
Utsutson ri itsi ubvur uwu inggbaashia Ubitru aka atsɛng
Awu Ubitru uner itser Uyesu atsɛng ubvur uwurɛ. Abɔɔ akaifɛrhkɔ ugɛ atsɛng ubvur uwurɛ ra amɛk aki 60-68 udzur ru unumkpi umbɔ aka amar Uyesu. Atsɛnge ubvur uwurɛ abika adɔsa, abirabɛ aki iyisa <<abirabɛ Unum aka asɛng umbɔ>>. Unga adzuma atsɛng ubvur ha afituwe abika avarhe, abirabɛ aka awe ru uver nu ayetnum ri itsi imangmangmbɔ. Ubitru atsɛng ubvur ha ayituwe umbɔ Isarhe Iyiki Ize ri itsi Uyesu Ukiristo, uwuruwi akpenga, isisoknga nu ibibemuwe iyiki ibibanga iki iwu ubin ifosa ra abika adɔsa. Unga agɔr agɛ aze umbɔ abima ra ayetnummbɔ na awe ru ikeramɛn ugɛ iwu iviviri iwuri idɛyiwe imangmangmbɔ na agɛ umbɔ awuri iyɛimbɔ ugbɛta ri <<ivangyɛ Uyesu Ukiristo aka idzeka.>>
Ikɛi uner uku utsɛng ubvur ha afituwe abika adɔsa agɛ asei isei ru nyaka abirabɛ aka awu abi Ukiristo.
Abinkɛ aka awe umɔ
Utsutson ri itsi ubvur ha (1.1-2)
Iyiyituwe ififɔrh iyi Unum (1.3-12)
Imesa ri itsi ibibɛk iyiki irhika (1.13—2.10)
Itser abika adɔsa ri ivang ayetnum (2.11—4.19)
Irhɛrhi itsi nu itser abika adɔsa (5.1-11)
Imimasha (5.12-14)
1
1 Ubvur uwurɛ udzeku Ubitru uner itser Uyesu Ukiristo.
Umum itsɛnge abirabɛ Unum aka asɛng umbɔ aka awu atsen ru upfung, asita asei ri inang ra abĩ Ufontu, nu Ugarhatiya, nu Ukafadokiya, nu Uasiya, nu Ubitiniya. 2 Unum Utɛ ri ihwihwɛngnga, unga asɛng umbi ru Ipfunga isare umbi, ngge itsú umbi adɔsu Uyesu Ukiristo, nu isisar ra adzirhnga.
Imimuta nu ididɔɔr irhɛirhɛ iwe nggu umbi.
Ifosa iyi urhɛ
3 Ikpikpoi iwe ru Unum, Utɛ Uteijeemɛn Uyesu Ukiristo! Ru nggaa atorhnga, unga aka amar umɛn iwe abika afa ru ubok isok ra akpe Uyesu Ukiristo, ngge itsú umɛn iwe ru ifosa iki iwe ru urhɛ. 4 Nu ukam hã uku usi íkpekpɔ, usi ídakpɔ use usatukpɔ, uwu ukpumbi ra afã. 5 Ru ubok imangmangmbi Unum akũ ijeenga avina umbi utsɛku umbi ayɛi ififɔrh iyɛrɛ, unga aka iwuri idɛyiwe ngge ri imimasha inum. 6 Ra akɛrɛ ha àka agɔm akarhãrhã, nggayɛ umbi awuri ihwambi ayetnum icɛrɛ ivanga ukunjiir, ri kishoo ikpũ ivivirayɛ umbi aka iwe. 7 Akɛrɛ ha aba, ngge itsú imangmangmbi iwe ru ugarh inangge uzinarhi ukpuku utsutsĩm. Nggakpi umbɔ aka isaka agbisha ukpɔ ru urha ru nyaka umbɔ aki iviri igbishu uzinarhi, nggayɛ imangmangmbi inangge uzinarhi. Nggee ivang imangmangmbi iki idɛ̃ɛ̃ iker ru iviviri irhɛirhɛ, ngge iwuri ikũwã umbi ukpoi urhɛrhɛ nu imor ri ivangyɛ Uyesu Ukiristo aka idzeka. 8 Nggayɛ umbi anasi inyãmbi unga, bɔr umbi abemumbi unga. Nggayɛ umbi asi inyãmbi unga icɛrɛ bɔr umbi awembi ri imangmang ru unga, umbi awembi ri itɛnamɛn akarhãrhã, 9 ubinkutsu umbi ayɛimbi ugbɛtɛ imangmangmbi, ififɔrh ipfumbi.
10 Arherhi ififɔrh iyɛrɛ, abika asɔm Arherhu-Num aka angwɛ̃dzɛn na arhisa na arhusa, ivang umbɔ aka arherhe imimuta ha iki iba ru umbi. 11 Ipfu Ukiristo iwe ru umbɔ ni idɛyiwe umbɔ ikpũ ayetnumkɛ Ukiristo aka ihwa nu nggaa imoryɛ umbɔ aka idzowe unga. Nggee umbɔ abee ihwɛng Ukiristo awu ungaa, ikɛi ukang akɛrɛ ha aka ikorhe. 12 Adɛyikumbɔ agɛ umbɔ asi itɔ̃mbɔ itser atsimbɔ bɔr atɔ̃ itser umbi. Icɛrɛ Isarhe Iyiki Ize iyɛrɛ umbɔ aka arherhuwa umbi ra abirabɛ aka adũwã ri ijee Ipfu Isarsatangge umbɔ aka adene ngge idzeka afã. Uko ípfu itser-Num ibeengge inyã ake.
Àka awe asasar
13 Nggee, àka agbisha amɛnmbi atɔ̃ itser, àka akpɔm atsimbi, àka atsu ifosambi kishoo ru umata umbɔ aka idzaa umbi ru unum Uyesu Ukiristo aka idzeka. 14 Àka awe ru nyaka awɛkaci abika adɔsa arherhe, àka niba aneke ikpona abin ake anyanguke amɛnmbi ru nyaka umbi aka awe ru ida ihwihwɛng. 15 Bɔr ru nyaka unga uwuku uyisa umbi awu asasar, àka awe asasar ri itsermbi kishoo. 16 Itsɛng Arherhu-Num igɔrngge ugɛ, <<Àka awe asasar, ubinkutsu umum iwu asasar.>>*Àka anyã ikɛi: Urha 11.44,45; 19.2; 20.7.
17 Umbi aba ayisa ugɛ Utɛ uwu afã uwuku utsu uvau ru ubɛn unera ashia ri itɛngasu, nggee àka asisei iwei iyi atsen nggimi. 18 Ubinkutsu, umbi ahwɛngmbi ugɛ asi ikũmbɔ abin aka atsutsim ugɛɛ uazurhfa use uzinarhi agoimbɔ umbi ra agbeyi atokambi aki ibɛm, 19 bɔr nggu adzirh aka awe ru ugarh aki Ukiristo, uwuruwi aka awe ru nyaku ungwɛ̃ itsurhi iyi idɛm, iyiriyɛ iki ishingge ru uvau use utauu. 20 Atirha asɛng unga na adɔrha amunu upfunga, bɔr unga adzeka ri imimasha ivang iyɛrɛ ri itsimbi. 21 Iwe ru uboknga umbi aka awe ru imangmang ru Unum, uwuku usoyiwe unga ra akpe na akpoi unga, nggee imangmangmbi nu ifosambi iwe ru Unum.
22 Icɛrɛ ri idɔsu idzidzɛrhe umbi awe asasar ngge itsú umbi abema adɔkambi. Àka adzuma abema adɔkambi ra amɛnmbi. 23 Amar umbi imar iyiki ifa ikɛi, asi iwea ri ikpũ imar urhɛ uwuku ukpe, bɔr udzeku ikpũ urhɛ uwu ugbagbaa, ru ubok Arherhu-Num uwu urhɛ ri ibibima. 24 Itsɛng Arherhu-Num igɔr igɛ,
<<Kishoo anera awu ru nyaku ubĩĩ,
nu kishoo ikpikpoimbɔ iwu ru nyaki ifur ubĩĩ idɛɛ,
ubĩĩ uku isaku ukoyi nu ifurngge igba,
25 bɔr Arherhu Uteijee adɛ̃ɛ̃ ugbagbaa.>>†Àka anyã ikɛi: Uish 40.6-8.
Arherha ha awu Isarhe Iyiki Izeyɛ umbɔ aka arherhuwa umbi.