Ubvur Ikikorhe
Abi Itser-Yesu
Abi Itser-Yesu
Utsutson ri itsi ubvur Ikikorhe Abi Itser-Yesu
Abika awe ru ihwihwɛng abemumbɔ ugɛ awu Irhuka uwɛrhu uzãrhã Uburhu uner itser Uyesu unga atsɛng Ubvur Ikikorhe Abi Itser-Yesu nu Ubvur uwu Irhuka (16.10-17; 20.5-15; 21.1-18; 27.1—28.16). Anera arhɛrhɛ aka arherha arherhe ri itsi ivangyɛ umbɔ aka atsɛng ubvur uwurɛ. Abɔɔ abemumbɔ ugɛ atsɛng ubvur ha ivanga unying nggu Ubvur uwu Irhuka.
Ubvur ha udɛyiwe ititirhi agbeyi abika adɔsa ra abi Uyahuda ru Urusharhima nu ititɛ̃rhãngge ra abirabɛ aka asi iwembɔ abi Uyahuda ubɛn ananga ru upfunga.
Ubvur ikikorhe abi itser Uyesu awe ru nyaku udaar ra abinkɛ Uyesu aka akorhe ri ivangyɛ unga aka awe ru upfung nu ikɛi abinkɛ abi itser Uyesu aka adɛ̃ɛ̃ ikorhe. Ipfu Isarsatangge itɔ̃ itser akarhãrhã ri idzowe abi itser Uyesu ijee iyiki idũwũ Isarhe Iyiki Ize ha. Ubvur ha udɛyiwe ra awiya ri itsi ibibɛk nu itsermbɔ Ubitru nggu Uburhu nu abɔɔ abika adzowe Isarhe Uyesu. Ubɛn anangkɛ umbɔ aka adũwũ Isarhe Iyiki Ize iyɛrɛ, anera aki isaka awe ru imangmang, bɔr igha inggbaashi iyɛrɛ iki isaki iba nggu uver.
Abinkɛ aka awe umɔ
Udũwã ri itsi Isarhe Iyiki Ize (1.1-26)
Udũwã ri itsi Isarhe Iyiki Ize ru Urusharhima (2.1—8.3)
Ititɛ̃rhã Isarhe Iyiki Ize ru Uyahuda nu Usamariya (8.4—12.25)
Uzãrhã Uburhu ukpu inggbaashia ukpu idzowe Isarhe Iyiki Ize (13.1—14.28)
Ikikɔng abika adɔsa ru Urusharhima (15.1-35)
Uzãrhã Uburhu ukpu uvaa ukpu idzowe Isarhe Iyiki Ize (15.36—18.22)
Uzãrhã Uburhu ukpu untaar ukpu idzowe Isarhe Iyiki Ize (18.23—21.16)
Adzur uburhu ru Urusharhima (21.17—23.22)
Agbange Uburhu ru Ukasariya (23.23—26.32)
Akũ Uburhu azĩmbɔ Uroma (27.1—28.31)
1
Akũ Uyesu afũ azĩmbɔ ra afã
1 A uze Utiyofirhu, ru ubvurmum uwu inggbaashia, umum itsɛng abina kishoo akirakɛ Uyesu aka atirha akorhe na amesuwe 2 utsɛku unumkpi umbɔ aka ashupa unga afũ azĩ ra afã. Ipfu Isarsatangge iki idarh unga amaa itsu itser ra abi itser Uyesu unga aka asɛng. 3 Unga aka ahwa ayetnum amaa, unga adɛyiwe itsinga ra abi itser Uyesu ha na akorhi ikpũ abinkɛ aka atsu umbɔ anyã unga awea ru urhɛ. Unga adzeyiwa ru umbɔ inuma isɔka inaa na arherhe arherhe Iyɛrhe Unum. 4 Ivanga niyɔ unga aka asei ighigha nggu umbɔ, unga agɔr umbɔ agɛ, <<Àka niba adzembi ru Urusharhima, bɔr àka adzɛu izũwũ Utɛmum aka abemuwa, umum iki irherha ngge ri igigũmbi. 5 Uyohana asorhuwe anera ubɔtisima nggu amɛ̃, bɔr inuma ukunjiir iki iba, awuri isorhuwa umbi ubɔtisima nggu Ipfu Isarsatangge.>>
6 Nggee umbɔ aka akɔng, umbɔ arhusa unga agɛ, <<A Uteijee, awu icɛrɛ ungo iki ibvui udzowe iyɛrhe Uisrairha?>>
7 Bɔr unga agɔr umbɔ agɛ, <<Asi iwea umbi awuri ihwɛng ivanga use inumyɛ Utɛ aka angwɛ̃ ri ijeenga. 8 Bɔr umbi awuri iyɛimbi ijee ri ivangyɛ Ipfu Isarsatangge iki icipuwa nu umbi, umbi awuri iwu idekamum ru Urusharhima, nu kishoo abĩ Uyahudiya nu aki Usamariya, uzĩ utsĩ ra abĩã kishoo.>>
9 Unga aka arherha akɛrɛ ha amaa, umbɔ ashupa unga ra asumbɔ afũ afafã, nu amɛɛ atsirke unga ri inyĩnyãmbɔ.
10 Umbɔ aka atsu asumbɔ arhi izizĩnga ra afã, kanying inera ivaa itsim atorho akika aterha idɛ̃ɛ̃ ikhapa nggu umbɔ. 11 Iner ha igɔr umbɔ ugɛ, <<Umbi abi Ugarhirhi, awu use utsu umbi adɛ̃ɛ̃ nggimi anu irhi afã? Uyesu ha umbɔ aka ashupa ru umbi ha akũ azĩmbɔ ra afã, awuri ibvui abanga ru nyaka umbi aka anyã ififũnga ra afã.>>
Asɛng Umatiya unga ayɛi itser Uyahuda
12 Mɔcɛ umbɔ abvui azĩ Urusharhima adzeku Igũ Acucii Uzaitun, iyiriyɛ iki ikhapa ru Urusharhima, iderngge iki iyongge ukirhomita unying. 13 Umbɔ aka azĩ atsĩ, umbɔ afũmbɔ ru ubã afã ra anangkɛ umbɔ aka asei. Awu umbɔ Ubitru, Uyohana, Uyaku nu Uandarawu, Ufirhibu nu Utoma, Ubatorhomi nu Umatiyu, Uyaku ungwɛ̃ Uharhfa nu Usiman Uzarhoti, nu Uyahuda ungwɛ̃ Uyaku. 14 Abɛrɛ ha kishoo aka isaka atsu atsimbɔ akɔng ri ifɛn-Num nggu amɛn unying, nggu akatsɛrh abɔɔ nu Umaryamu, uyisa Uyesu, nu angwɛ̃mbɔ Uyesu.
15 Inum hã niyɔ Ubitru aka asok adɛ̃ɛ̃ ri ikikɔng abika adɔsa, iyiriyɛ iki iyongge inera unaka ni isɔka ivaa, na agɛ, 16 <<Umbi angwɛ̃mɛn nu anapumɛn, awu ufang ngge iki itsuifɛr Arherhu-Num aki Ipfu Isarsatangge iki irherhe ishaisha ra angwĩ Udauda, ri itsi Uyahuda, unga aka agbaashia ra abika adzur Uyesu. 17 Unga uwi awe ru umɛn, awea ri itser ri itser iyɛrɛ.>>
18 Nggu itosayɛ unga aka akpo iyi amɛn aka abewe, Uyahuda akũ agoi idɛɛ, umɔ unga aka agba nggu itsia, iyora iyar iyanga, abina anaanga kishoo adzeka awiya. 19 Kishoo anera ru Urusharhima agũmbɔ akɛrɛ ha, nggee umbɔ ayisi idɛɛ ha agɛ <<Uakarhdama,>> ri idũmbɔ agbena agburh <<Idɛɛ Adzirh.>>
20 Unga agɔr agɛ, <<Ubinkutsu atsɛngmbɔ ru Ubvur Ambom ugɛ,
<< <Uneke iyanga ima iwu arhang,
utsur unera aseisa umɔ,>*Àka anyã ikɛi: Amb 69.25.
nu,
<< <Uneke itsernga ikɛi uner uwɔɔ ama anyangu ukam.>†Àka anyã ikɛi: Amb 109.8.
21 Nggee awu ufang umɛn isɛng unera unying ra aner abɛrɛ aka awu nggu umɛn ri ivanga kishoo Uteijee Uyesu aka awu nggu umɛn, 22 udzur ri ivangyɛ Uyohana aka asorhuwe unga ubɔtisima uba utsĩ ri ivangyɛ umbɔ aka ashupuwe unga ra ateumɛn. Awu ufang umɛn isɛng unera aka awe ru ideka isisoknga ra akpe nggu umɛn.>>
23 Nggee umbɔ aden inera ivaa, Uyusuf umbɔ iki iyisa Ubarsabba, ikɛi umbɔ iki iyisa Ujustu, nu Umatiya. 24 Mɔcɛ umbɔ afɛn-Num agɛ, <<A Uteijee, ungo uhwɛng amɛn anera kishoo. Ra abɛrɛ ikivarhambɔ, udɛyiwa uwuruwi ungo uku usɛng 25 unga anyangi itser uner itser Uyesu, iyi Uyahuda aka aneke na azĩã anang hã aka awe akinga.>> 26 Mɔcɛ umbɔ atang isɛng ru umbɔ. Umatiya unga agha, nggee umbɔ atoma unga nggu abi itser Uyesu, udom hã.