Ubvur umbɔ aka atsɛnge abi
Uibrani
Utsutson ri itsi ubvur Uibrani
Anasi ihwɛngmbɔ unerwi aka atsɛng ubvur uwurɛ. Anera akaifɛrhkɔ ugɛ aka atsɛngmbɔ ubvur uwurɛ ri Iya-Num ru Urusharhima idɔrhi isipa ra amɛk aki 70 udzur ru unumkpi umbɔ aka amar Uyesu.
Atsɛng ubvur ha ri ivangyɛ abika adɔsa abɔɔ, abi Uyahuda, aka atirhi ikorhe ikpũ amɛn rakɔ ugɛɛ ani irhɛm umbɔ ugɛ umbɔ abɔre imangmangmbɔ. Idɛ̃ɛ̃ iwengge ugɛ abika adɔsa ha awe ru uver. Atsɛng ubvur uwurɛ afituwe ikpũ aner abɛrɛ.
Ubvur uwurɛ udɛyiwe ugɛ igɔng nu ijee Uyesu inangngge iyi ípfu itser-Num, nu Umusa, nu abika asɔm Arherhu-Num, nu Akagɔng Abika Adzowe Idɛm-Num uwu ibibemuwe iyiki igbe. Itser ififɔrhyɛ Unum aka atsu ngge itsuifɛr ru ubok akpe Uyesu ngge iwu udĩ ififɔrh ha Unum aka agbisha udzur ri inggbaashia. Idzowe idɛm-Num nu ízũwã iyi ibibemuwe iyiki igbe kishoo iwe nyaka ri itsi akpe Uyesu. Awu ru ubok ibiba Uyesu umbɔ aka adzowe ibibemuwe iyiki ifa, iyiriyɛ iki iwu iyiki izea. Ri imimasha, ubvur ha ikɛi ufituwe imangmang abika adɔsa nggu iker akarhãrhã ru nyaku nggaa abi imangmang aka akorhe ru utsutson abi Uisrairha.
Abinkɛ aka awe umɔ
Uyesu adɛyiwe iwiwe Unum (1.1-3)
Uyesu ananga ípfu itser-Num (1.4—2.18)
Uyesu ananga abika asɔm Arherhu-Num (3.1—4.13)
Itser iyiki idzowe idɛm-Num iyi Uyesu inangge iyi Uharuna (4.14—7.28)
Ibibemuwe iyiki ifa inangge iyiki igbe (8.1—10.18)
Ugar imangmang (10.19—12.29)
Imimasha (13.1-25)
1
Ungwɛ̃wi aka ananga ípfu itser-Num
1 Isha, Unum arherhe arherhe nggu atokamɛn ra angwĩ abika asɔm Arherhu-Num ri ivanga irhɛirhɛ ra atsĩndĩã arhɛrhɛ. 2 Bɔr ri ivang iyiki imimasha iyɛrɛ unga arherhuwa umɛn arherhe ra angwĩ Ungwɛ̃nga. Unga aka atsũ unga awe uner ukam abina kishoo. Ru ubok ungwɛ̃ hã Unum aka amunu upfunga ikɛi. 3 Ungwɛ̃ hã unga adɛyiwe irhirhang Unum na awe uzirhzĩ Unum, na awu icaica nggu unga. Unga akpɔm abina kishoo ra arherhanga aki ijee. Unga aka amaa igbishu utsĩndĩ uwuku usorhe arhim, unga aseisa ru ubok ugha Uwuku Ugɔnga ra afã. 4 Nggee unga ananga ípfu itser-Num, rimi hã, itsokyɛ umbɔ aka adzowe unga inangke ikimbɔ.
5 Awu ipfu itser-Num iyikisong Unum aka ayisa ngge agɛ,
<<Ungo uwu Ungwɛ̃mum,
irherɛ umum iwu Utɛngo?>>*Àka anyã ikɛi: Amb 2.7.
Use ikɛi unga agɔr ngge agɛ,
<<Umum iwuri iwu Utɛnga
nu unga awu ungwɛ̃mum?>>
6 Nu ikɛi, ivangyɛ Unum aka akũ ukã ungwɛ̃nga aba ru upfung, unga agɔr agɛ,
<<Uneke kishoo ípfu itser-Num idzowe unga igɔng.>>†Àka anyã ikɛi: 2Usm 7.14; 1Ats 17.13.
7 Arherhi ípfu itser-Num, unga agɔr agɛ,
<<Unga atsu ípfu itsernga ngge iwe ru nyaku ugba,
na atsu umbɔ awe ru nyaki ikonrha
ri itseryɛ umbɔ aki itɔ̃we unga.>>‡Àka anyã ikɛi: Amb 104.4.
8 Bɔr ru Ungwɛ̃nga unga agɔr agɛ,
<<A Unum, Iyɛrhango iwuri iwu ugbagbaa,
nu ungo uwuri ikũ igbong iyiki igha Iyɛrhango
ukũ ugha Iyɛrhe idzidzɛrhe.
9 Ungo uku ubemu ubɛn irhirhika nu ukpɛ̃ɔ ubɛn iki ibewe,
nggee, Unumngo aka atsu ungo unango awɛrhango
ri idzukuwa ungo atsei anggɔm.>>§Àka anyã ikɛi: Amb 45.6,7.
10 Ikɛi unga agɔr agɛ,
<<Utirhi ri inggbaashia, A Uteijee,
awu ungo udzin atarh idzin abĩ,
nu afã awu itser abokngo.
11 Umbɔ awuri itsĩme ake,
bɔr ungo uwuri iwe umɔ ubɛn ivang.
Umbɔ awuri ishaka ugɛɛ atorho aka agbe.
12 Ungo uwuri ifeta ake ugɛɛ atorho,
awuri ifara ake ru nyaka umbɔ iki ifaru untama.
Bɔr ungo uwe ru nyaka ungo uku uwe,
nu imɛkngo isi ímaangge.>>*Àka anyã ikɛi: Amb 102.25-27.
13 Ipfu itser-Num iyikisong Unum aka agɔr ngge agɛ,
<<Usei nu ubok ughamum
utsɛku umum iki itsu anggamtsakngo
awe ubin uku utsorhe andaidakngo?>>†Àka anyã ikɛi: Amb 110.1.
14 Bɔr ípfu itser-Num kishoo akpurha awu awɛ itser Unum aka adene ngge iyike abirabɛ aka igha ukam ififɔrh.