3
Uyesu ananga Umusa
1 Nggee, asarkasar angwɛ̃mɛn nu anapumɛn, abirabɛ umɛn iki iwu awɛrhɛ ru ubok iyiyisa iyi Unum, àka atsu ifɛrhkɔmbi ru Uyesu, uwuruwi umɛn iki ĩdekuwe ugɛ unga awu nggaa uner itser Unum na awu Ukugɔng Uwuku Udzowe Idɛm-Num. 2 Unga akorhunga kishoo abinkɛ uwuku usɛng unga aka abee unga akorhe, ru nyaku Umusa aka akorhe abinkɛ aka amɛ̃ɛ̃ unga akorhe ri iyike abi Unum. 3 Uyesu amɛ̃ɛ̃ ikpo nggaa imor ananga Umusa, ru nyaku uner uwuku udzin iya aka awe ru imor ananga iya ha. 4 Ubɛn iya awu unera adzin ike, bɔr Unum unga adzin ubɛn ubin. 5 Umusa akorhe abinkɛ aka amɛ̃ɛ̃ ugãrhã akorhe ri iyike abi Unum, ri adzowe ideka ra abinkɛ Unum aka irherhe unuma. 6 Bɔr Ukiristo ani ikorhe ubɛn ubinkpi uku umɛ̃ɛ̃ Ungwɛ̃ akorhe ra abi Unum kishoo. Nu umɛn iwe abi Unum, umɛn ĩba ikpɔmɛn ubinkpi umɛn iki ifosa nggu ikeramɛn nu isheri iwei.
Igbiite ato abika asheri imangmang
7 Nggee, Ipfu Isarsatangge igɔr igɛ,
<<Irherɛ, umbi aba agũmbi urhɛm Unum,
8 àka niba awembi abi ikertsi
ru nyaka atokambi aka akorhe ri ivang isoyi amɛn hã,
ri ivang iviviri ra arhum.
9 Nggɔɔ ha atokambi aka avira umum,
imɛka isɔka inaa, umbɔ anyãmbɔ ubinkpi umum iki ikorhe.
10 Ngge itsu umum igũ avɔm nggu udan ukpɔrɔ ha,
umum igɔr igɛ, <Ubɛn ivang amɛnmbɔ ani iyapa,
na asi ihwɛngmbɔ atsĩndĩmum.>
11 Nggee umum itsu ra avɔmmum iyirh ĩgɛ, <Umbɔ asi ítsĩmbɔ ri iwiwoshamum.> >>*Àka anyã ikɛi: Amb 95.7-11.
12 Àka angwɛ̃dzɛn, umbi angwɛ̃mɛn nu anapumɛn, utsur unera ru umbi awe ra amɛn aka abewe akika isheri imangmang atsu unga adzipu undzingnga ru Unum uwu urhɛ. 13 Bɔr àka afituwe adɔka ubɛn unum, ubɛn unumkpi umbɔ iki iyisa <<Irherɛ,>> ngge itsú unying ru umbi asi íwea uner ikertsi ri itsi irhirhɛm iyi arhim. 14 Umɛn iwu awɛrha nggu Ukiristo umɛn ĩba ikpɔmmɛn imangmangmɛn iyi inggbaashia izĩ itsĩmɛn imimasha. 15 Ru nyaka ngge iki igɔr ugɛ,
<<Irherɛ, umbi aba agũmbi urhɛm Unum,
àka niba awembi abi ikertsi
ru nyaka atokambi aka akorhe ri ivang isoyi amɛn hã.>>†Àka anyã ikɛi: Amb 95.7,8.
16 Awu umbɔ ungamɔ agũ urhɛm Unum na asoyi amɛn? Asi iwea umbɔ ha kishoo Umusa aka akũna umbɔ adzek ra abĩ Umasar? 17 Awu nggu umbɔ ungamɔ unga aka agũ avɔm imɛka isɔka inaa? Asi iwea nggu abika akorha arhim, ayormbɔ aka akpe ra arhum? 18 Awu umbɔ ungamɔ Unum aka ayirh uyirh ugɛ umbɔ asi ítsĩmbɔ ri iwiwoshanga? Asi iwea umbɔ abika akpɛ̃ ididɔsa? 19 Nggee umɛn inyãmɛn umbɔ asi idɛ̃ɛ̃ atsĩmbɔ, ubinkutsu ida imangmangmbɔ itsu.