8
Ukugɔng Uwuku Udzowe Idɛm-Num
uwu ibibemuwe-Num iyiki ifa
uwu ibibemuwe-Num iyiki ifa
1 Itsi arherhamɛn ru ubinkpi umɛn iki irherhe unggakpi, umɛn iwemɛn ru Ukugɔng Uwuku Udzowe Idɛm-Num, aka asei nu ubok ugha anang isei Uwuku Ugɔnga ra afã. 2 Unga hã ikɛi ani itɔ̃ itser ri Iya-Num, utsurha idzidzɛrhe uwu Unum, akirakɛ Uteijee unga adzin, asi iwea abok anera.
3 Ubɛn Ukugɔng Uwuku Udzowe Idɛm-Num asɛng unga idzowe izũwã nu idɛm-Num, nggee awu ufang Ukugɔng Uwuku Udzowe Idɛm-Nummɛn hã ikɛi awe ru ubinkpi unga aka idzowe. 4 Unga aba awe ru upfung, unga asi íwea uwuku udzowe idɛm-Num, ubinkutsu ishaisha umbɔ atsu abɔɔ awe abika adzowe ízũwã ri igigɔr Íkpem Umusa. 5 Atɔ̃ itser ri Iya-Num, ikirikɛ iki iwu uzirhzĩ anangkɛ aka awe ra afã. Akɛrɛ ha atsu umbɔ avange Umusa ri ivangyɛ unga aka awuri itar utsurha Unum. Umbɔ agɔr agɛ, <<Ukorhu ubɛn ubina uwe ru nyaka umbɔ aka adɛyiwa ungo ni igũ hã.>>*Àka anyã ikɛi: Idzi 25.40. 6 Bɔr itseryɛ Uyesu aka ayɛi inangge iyi abika adzowe idɛm-Num ru nyaki ibibemuwe-Num iyiki ifa ha unga aka atsu ngge iwe, inangge iyiki agbe ha, ubinkutsu ibibemuwe-Num iyiki ifa ha ikũwa umɛn abin aka azea.
7 Agɛ ibibemuwe-Num iyi inggbaashia isi igbangge, umbɔ asi íbeembɔ iyɔɔ. 8 Bɔr Unum anyã igbigba ra anera na agɛ,
<<Uteijee unga agɔr agɛ, ivanga niyɔ ibarɔ,
umum iwuri ĩbemuwe abi iya Uisrairha
nu iya Uyahuda ibibemuwe-Num iyiki ifa.
9 Isi íwengge ru nyaki ibibemuwe iyiriyɛ umum
iki ĩbemuwe nggu atokambɔ,
ri ivangyɛ umum iki ikpɔm ubokmbɔ
ikũna umbɔ ĩdzek ra abĩ Umasar.
Umbɔ asi ikorhumbɔ ubinkpi umum iki ibee ri iyɛi ibibemuwemum,
ngge itsu umum ĩdzipu undzingmum ru umbɔ,
Uteijee unga agɔr.
10 Iyɛrɛ iwu ibibemuweyɛ
umum iki ĩbemuwe aner Uisrairha ivang iyi ha iba itɔ̃ngge,
Uteijee unga agɔr.
Umum iwuri itsuke Íkpemmum ra amɛnmbɔ,
ikɛi umum iwuri itsɛnge ngge ra amɛnmbɔ.
Umum iwuri iwu Unummbɔ,
umbɔ awu anermum.
11 Asi ímesukumbɔ adɔkambɔ,
use uwɔɔ agɔr ungwɛ̃mbɔ use unapumbɔ agɛ,
<Uhwɛng Uteijee,>
ubinkutsu kishoo awuri ihwɛngmbɔ umum,
udzur ra abika awe ru ugarh ukunjiir uba utsĩ abika awe ru ugarh urhɛrhɛ.
12 Umum iwuri itsũwũkũ iyiki ibewambɔ,
ni isi íbvui iyitumum arhimmbɔ.>>†Àka anyã ikɛi: Uiri 31.31-34.
13 Ivangyɛ unga aka arherha arherhe ibibemuwe-Num iyiki ifa ha, unga aka atsu iyi inggbaashia iwe iyiki igbe, ikɛi ubɛn ubin ukpuku ugbe uku ukɔ̃kpɔ usi ídãrhũkpɔ nu ugwir.