3
Uyohana Uner Ubɔtisima
agbishu utsĩndĩã
agbishu utsĩndĩã
(Umat 3.1-12; Umar 1.1-8; Uyoh 1.19-28)
1 Ri imɛka iyi usɔka ni imɛka itɔ̃ɔ̃ iyi iyɛrhe Ukaisar Utibariya, Ubuntu Ubirhatu awu ugomna Uyahudiya. Uhiridu atɔ̃ itser iyɛrhe Ugarhirhi, ungwɛ̃mbɔ Ufirhibu unga agha iyɛrhe Uiturhiya nu Utarakunita, nu Urhisaniya atɔ̃ itser iyɛrhe Uabirhene. 2 Ri ivang hã umbɔ Uhanana nggu Ukayafa aka awu Ukugɔng Uwuku Udzowe Idɛm-Num. Arherhu-Num aba ru Uyohana ungwɛ̃ Uzakariya ra arhum. 3 Nggee Uyohana aba, asorhuwe ubɔtisima ru Azɛ̃ Urdun na adzowe isarhe iyi idzidzipa iyiki itsũwe arhim. 4 Ru nyaka ngge iki itsɛng ru ubvur uner uwuku usɔm Arherhu-Num Uishaya igɛ,
<<Urhɛm uner udũwã ra arhum ugɛ,
<Àka agbisha anang Uteijee,
àka agbisha atsĩndĩnga uku urhirhiki.
5 Awuri itsu abĩ atɔke ubɛn izɛ̃rhĩ,
na asim ifũrhã ni igũ asituwe,
awuri ivii atsĩndĩ akika anyɔsha awe uku urhirhiki.
Na agbisha atsĩndĩ akika arhurhuta ake aghwɔrhe.
6 Nu anera kishoo awuri inyãmbɔ ififɔrh Unum.> >>*Àka anyã ikɛi: Uish 40.3-5.
7 Uyohana agɔr anera kishoo aka akɔng aba ru unga asorhuwe umbɔ ubɔtisima agɛ, <<Umbi angwɛ̃ ibvui! Ungaa adɛyiwa umbi itĩ avɔm Unum aka iba unuma? 8 Àka atɔ̃ itseryɛ iki idɛyiwe idzidzipambi. Àka aneke igɔr ra amɛnmbi agɛ, <Uibrahim unga awu utɛmɛn.> Ubinkutsu, umum idɛyiwa umbi Unum awea ri ijee unga aka itsu atarh akɛrɛ ake awe awɛkaci ru Uibrahim. 9 Icɛrɛ anggãi iki idɛ̃ɛ̃ngge ra anũnang acucii, ubɛn ucucii uku usi ighwɛr umgbɔ ikpũrhã iyiki ize umbɔ awuri igbɛr umgbɔ atsuku urha.>>
10 Ikikɔnga kishoo irhusa unga igɛ, <<Ude umɛn ikorhi uguse?>>
11 Uyohana agɔr umbɔ agɛ, <<Unera aka awu ra atorho avaa, unga agaar unying adzowe undɔkanga aka ashia, nu uwuruwi aka awu ru ubingha, akorhe rimi hã.>>
12 Abika ayɛsu ikirbi abĩ, aba umbɔ isorhu ubɔtisima arhusa unga ikɛi agɛ, <<A uner imesa, umɛn igamɛn ikorhu ugusemɛn?>>
13 Unga agɔr umbɔ agɛ, <<Niba ayɛi agarmbi ubinkpi umbɔ aka atsuka umbi.>>
14 Umɔ abi iwa arhusa unga agɛ, <<Umɛn igamɛn ikorhu ugusemɛn?>>
Unga agɔr umbɔ agɛ, <<Niba avurmbi uhwɛk, niba agbɛrangwĩ atsukukumbi anera, àka ashur nggu ugbɛtambi.>>
15 Anera aka afosi ibiba Ukiristo, arhusa adɔkambɔ agɛ, <<Awu Uyohana unga Ukiristo ha?>> 16 Uyohana agɔr umbɔ kishoo agɛ, <<Umum isorhuwa umbi ubɔtisima nggu amɛ̃, bɔr uwɔɔ ruwɔ abarɔ, awuri ijee ananga umum. Abadaknga umum isi ídɛ̃ɛ̃ inggarhukũ arhisa. Unga awuri isorhuwa umbi ubɔtisima nggu Ipfu Isarsatangge nu urha. 17 Utak ukpuku utsɛku itsemnga uwu ru uboknga. Awuri itsɛki ishaa itsemnga itɛtɛnangge azĩ atsuku ungbanga, na akpĩĩwe uhwenga ru urhakpi uku usi írhimkpɔ.>> 18 Nu irhɛm iyɔɔ irhɛirhɛ Uyohana aka akũ adam anera na adzowe Isarhe Iyiki Ize ra anera.
19 Uyohana atsɛrhu uyɛrhe Uhiridu, ri itsi Uhirudiya utsɛrha ungwɛ̃mbɔ, nu kishoo amɛn akatãrhã akɔɔ Uhiridu aka akorhe. 20 Uhiridu ashɔi arherhe akɔɔ atoma ikɛi, agbange Uyohana Uner Ubɔtisima ru ugborzĩ.
Ubɔtisima Uyesu
(Umat 3.13-17; Umar 1.9-11)
21 Ivangyɛ anera kishoo aka asorhu ubɔtisima, Uyesu asorhunga iganga. Unga aka adɛ̃ɛ̃ ifɛn-Num, afã adiki iyanga, 22 Ipfu Isarsatangge ru nyaku unurhɛu icipuwa ni itsinga, urhɛm udzeka afã ugɔr ugɛ, <<Ungo uwu Ungwɛ̃mum uwuruwi umum iki ibema. Nggu ungo umum igũibɛn.>>
Atoku Uyesu
(Umat 1.1-17)
23 Ivangyɛ Uyesu aka ayoka imɛka isɔka itaar, unga aka atirhi itsernga. Anera akaifɛrhkɔ unga awu ungwɛ̃ Uyusuf ungwɛ̃ Uherhi,
24 Uherhi ungwɛ̃ Umatat, Umatat ungwɛ̃ Urhawi,
Urhawi ungwɛ̃ Umarhki, Umarhki ungwɛ̃ Uyanna,
Uyanna ungwɛ̃ Uyusuf, 25 Uyusuf ungwɛ̃ Umatatiya,
Umatatiya ungwɛ̃ Uamos, Uamos ungwɛ̃ Unahum,
Unahum ungwɛ̃ Uhasrhi, Uhasrhi ungwɛ̃ Unajaya,
26 Unajaya ungwɛ̃ Umaata, Umaata ungwɛ̃ Umatatiya,
Umatatiya ungwɛ̃ Ushimeya, Ushimeya ungwɛ̃ Ujosek,
Ujosek ungwɛ̃ Ujoda, 27 Ujoda ungwɛ̃ Ujowanan,
Ujowanan ungwɛ̃ Uresa, Uresa ungwɛ̃ Uzerubaberh,
Uzerubaberh ungwɛ̃ Usheyarhtiyerh, Usheyarhtiyerh ungwɛ̃ Uniri,
28 Uniri ungwɛ̃ Umarhki, Umarhki ungwɛ̃ Uaddi,
Uaddi ungwɛ̃ Ukosama, Ukosama ungwɛ̃ Uerhmadama,
Uerhmadama ungwɛ̃ Uer, 29 Uer ungwɛ̃ Ujoshuwa,
Ujoshuwa ungwɛ̃ Uerhiyeza, Uerhiyeza ungwɛ̃ Ujorima,
Ujorima ungwɛ̃ Umatat, Umatat ungwɛ̃ Urhawi,
30 Urhawi ungwɛ̃ Usiman, Usiman ungwɛ̃ Uyahuda,
Uyahuda ungwɛ̃ Uyusuf, Uyusuf ungwɛ̃ Uyonam,
Uyonam ungwɛ̃ Uerhiyakim, 31 Uerhiyakim ungwɛ̃ Umerheya,
Umerheya ungwɛ̃ Umena, Umena ungwɛ̃ Umattata,
Umattata ungwɛ̃ Unatan, Unatan ungwɛ̃ Udauda,
32 Udauda ungwɛ̃ Ujesse, Ujesse ungwɛ̃ Uobida,
Uobida ungwɛ̃ Ubo'aza, Ubo'aza ungwɛ̃ Usarhmon,
Usarhmon ungwɛ̃ Unashon, 33 Unashon ungwɛ̃ Uamminadab,
Uamminadab ungwɛ̃ Uaram, Uaram ungwɛ̃ Uhezuron,
Uhezuron ungwɛ̃ Ufereza, Ufereza ungwɛ̃ Uyahuda,
34 Uyahuda ungwɛ̃ Uyakubu, Uyakubu ungwɛ̃ Uishaku,
Uishaku ungwɛ̃ Uibrahim, Uibrahim ungwɛ̃ Utera,
Utera ungwɛ̃ Unahor, 35 Unahor ungwɛ̃ Userug,
Userug ungwɛ̃ Ureyu, Ureyu ungwɛ̃ Uferheg,
Uferheg ungwɛ̃ Ueber, Ueber ungwɛ̃ Usherha,
36 Usherha ungwɛ̃ Ukenan, Ukenan ungwɛ̃ Uarfakshad,
Uarfakshad ungwɛ̃ Ushem, Ushem ungwɛ̃ Unuhu,
Unuhu ungwɛ̃ Urhamek, 37 Urhamek ungwɛ̃ Umetuserha,
Umetuserha ungwɛ̃ Uenɔk, Uenɔk ungwɛ̃ Uyared,
Uyared ungwɛ̃ Umaharharherh, Umaharharherh ungwɛ̃ Ukenan,
38 Ukenan ungwɛ̃ Uenosh, Uenosh ungwɛ̃ Usɛt,
Usɛt ungwɛ̃ Uadamu, Uadamu ungwɛ̃ Unum.