3 Yohansi
Yohansi horatni re'eni wotellu di, ed maka Yohansi makla' krei o'tani-matni ida na'enyatga la krei o'tani matni id wali de nwawa Gayus.
La' Yohansi horatni di, de ena'ulia Gayus, yoma la'a himimni-rere'eni la Kristen walli maka rla rakot nohora Uplerlawna lirni-tunnu la' riy mak edon katlin ma'ta, ne nwak pa Gayus nodi liarni la himima-rere'a mak emkade. Yoma la'pa itala himima-rere'a la maka kakot nohora Uplerlawna lirni-tunnu de emekwalima itre'ela pa takot nohora Uplerlawna lirni-tunnu wali.
Yohansi e nwagahniorat walia Gayus la'a muanke' id la hande, de nwawa Diotrefes. Diotrefes di ntota inonni emeka o'ta-mata krei me nahmen memna nlernohora Yohansi lirni mak enakot nohora itsima-tre'a it makpesiay wialli mak kakot nohora Uplerlawna lirni-tunnu.
La' puk di de e rakot nohora emkadille:
1. Wniak kalwieda (1-4)
2. Yohansi na'uli-nawedia Gayus. (5-8)
3. Yohansi nakot nohora Diotrefes hihi'a-yapyapi yatyatni. (9-10)
4. Yohansi na'uli-nawedi Demetrius (11-12)
5. Wniak kalwieda hohoni. (13-15)
1
Wniak kalwieda
Hya'lu Gayus mak kden rer lia a ralmu!
A'g ed mak khi' nana horat di lirni. A' di de mak khi' o'ta-mat la krei wokni-le'enu, me mak kal toto' memna ralamni tiy o'a.
Asiumbain de awuakwak pa hya'lu nden la kalwiedwedni me inonmu yana namehra mere mururi pa emekwalima pesiaymu naruri olek wali. A'ukot hadi yoma a'uhepur meman la'a makpesiay doma rmai pia rwahaur nohora o' de, riwra omdien rer lia Uplerlawna lirni-tunnu mak kaplola. Ne plollolli de o mormiormu de nlernohora Uplerlawna wniatutnu-wniaye'eni. La'pa a'utlin nana a u'pu-a'nu he' to'a makpesiay pa rlernohor reria Uplerlawna talanni de, ed maka katota-kariei pia a ralmu nahepur memna.
Mhima-mrie'a makod kiota-kal de'eta Yesus lirni-tunnu
Hya'lu makden rer lia a ralmu, o kalwiedmu pa mdien rer lia ra'amu-palmu himimmu-rere'emu la mutwualmu makpesiay, mak kla'a-kmai re, kennama o edon muat niohor ma'ta hare. It mutwualli re rwahaur momuog oleka o kalwiedmu honona la krei mutnu mai handi. Awuak hota mtiulan owa'an la ira totpena rlernan talan pa rodi liarni la'a Uplerlawna kniarni ralamni. Emkade pede mhi' samomuou ira yoma hade ed maka kla' nana Uplerlawna ralamni. Yoma rla' pa rod kiota-ral de'et la Yesus Kristus lirni-tunnu la riy mak edon kpesiay ma'ta. Mere rahmena rwak pa riy mak edon kpesiay ma'ta re rala kniar die wniahlani la ira. La' hade pede it makpesiay, de tre' pa tara'a-tapalga tsima-tre'a ita mutwualli mak kakot nohora Yesus lirni-tunnu totpena la' talan emkade pede itre' wal lia ir pa takot nohora Uplerlawna wniatutu plollolli.
Yana rtolliohora nhioli-liet yatyata
A'g u'enyatg oleka horta id la krei mutnu la' hande, mere Diotrefes mak kiwra kla o'tani la krei mutnu, nahmena nlernohor ami. 10 La' hade pede pena atiy pia a'ukot nohora Diotrefes hihi'ini-yapyapni yatyatni totpena krei mutnu rat niohora de nhi'inde enapolu-naliella ami. Ne hade edon nmeh'a mere la lera it mutwualli mak rod kiota-ral de'eta Yesus lirni-tunnu rmai, noma Diotrefes edonna nreiniana re. Ne la'pa it inni-narni mak kiwra kreiniana mak kod kiota-kal de'eta Yesus lirni re, Diotrefes la npolliohora ina-nara re me nhopan pa rlergot la roma-krei.
11 Hyalia mak kden la a ralmu, yan memmemna mtiolliohora nhioli-liet yatyata. Mere mliernohora hya' maka kodia kalwiedni. Riy maka kholi-klet kalwiedweda re, Uplerlawna gahani hare. Mere riy maka khi'a-kyapia yatyatni-halalli de, hare raplin mua'ta Uplerlawna. 12 Mere hyalia, makpesiay honona re ra'ulia Demetrius. Ne e' mana nlernohor mamaini Uplerlawna lirni mak kaplola pede ntutga e' de riy samomuou e'a. Am miana ma'uli wiali e'a. Ne totpa hya'lu nat wualia, de hya' maka amakota re de riy rpesiaya re yoma ha plollola re.
La' hohoni la horat di ampak kalwieda
13 Harahu memna agiwa ukot nohora tiy o'a mere awuarora de yana akenia la horta. 14 Awuak de hota edon nalo'on wali ne itwatroma, ne totpena itapal wiut mueman pa twahauru.
15 Awuak de Orgahi-Orha'a pena Ntemna kalwiedni-paitiotni (damai sejahtera) la limmu ralamni. Mutwualmu makden la handi, rwak walia kalwieda tiy o'a. Mpuak walia a kalwie'du nenenan la makpesiay makden la hande.
A kalwie'du,
Yohansi