Ibrani
Horat di de ra'enyatga la makden Yahudi makpesiay Yesus. Makden Yahudi re rwet walia la' riy Ibrani onde Israel upni-a'nani. Ir de de rlernana yamuki-yama'ala, kropna-krieutu, nniahora-nniala'a onnila rpesiaya Yesus. La' hade pede riy dom la' ira riwra rwaldioin pa rhoitio'or doin ir pesiayni la'a Yesus me rlernohor owa'ana agama Yahudi. Pede mak khorta horat di de na'enyatga totpena nhi' aruri ir pesiayni la' ga'a totpena yana rhoitio'or doin ir pesiayni la'a Yesus Kristus.
La'a riy mak khorta horat di de itaplin niohora nanni. Riy dom de riwra Apolsu ed mak khorta, mere riy dom de riwra Barnabas. Mere itaplin niohora.
Mak khorta hadi nakot emkadi: Nnio' warwuaru maka Uplerlawna Nhi'a onnila Yesus matmiatni la'a rimormiori rerieini de narehi-nalawan meman la'a deulu-tatra maka Musa nlernana. Nwagahniorta ira totpena yan memmemna rhoitio'or doin ir pesiayni la'a Yesus yoma hota rlernana niukum lawna.
La' horat di ralamni de niwra Yesus de Uplerlawna A'nani. E' de Narehi-nalawan la makwohorulu-ktatrulu la ulul die, ror wutga Uplerlawna hopopanni-lili'irnu me Musa la'pa imam-imam rora o'ta-mata krei Yahudi honona. Orgahi-Orha'a Yesus Kristus di Nodi plolli la'a nohkerna-rai miaran di. Uplerlawna Nran e' pa Nhi' makpolu-makwak la Uplerlawna la'a rimormior it rerieini. E' ed mak kal inonni emeka hoihoi-tantiani totpena Ntuwu-nhai niana it la do'a-hala ralamni pa nodi liarni.
Pede riy honona mak kpaikia horat di hota rtorrer pitpitga pesiayni. Horat di nakot nohor riy mak kden la ululu pesiayni mak karur lia Uplerlawna, totpena yeher to' pa mak kpaikia horat di pesiayni na'itar rer lia rurni-laini. Horat di nakot nohor walia wniehwa-liakta korni mak kaplol la' it makpesiay.
La' horat di de e rakot nohor emkadille:
1. Orgahi-Orha'a Yesus Kristus Narehi-nalawan la o'ta-mat la Musa deullu-tatarni honona (1:1-7:28)
Yesus Narehi-nalawan la makwohorulu-ktatrulu (1:1-3)
Yesus Narehi-nalawan la Uplerlawna hopopanni-lili'irnu (1:4-2:18)
Yesus Narehi-nalawan la Musa (3:1-4:13)
Yesus Nhi' makpolu-makwak la Uplerlawna la'a rimormior rerieini pa nodi liarni (4:14-7:28)
2. Yesus Nhi' makpolu-makwak la Uplerlawna la rimormior rerieini onnila Uplerlawna nnio' warwuarnu (8:1-9:10)
Uplerlawna nnio' warwuarnu narehi-nalawan la deulu-tatra ululu (8:1-10:18)
Yesus kniarni emeka o'ta lawan makpolu-makwak la Uplerlawna la rimormiori rerieini narehi-nalawan la Yahudi imam-imam o'ta lawanni la' ululu (9:11-10:18)
3. Wniehwa-liakta hihi'a-yapyapi mak kaplol la' riy mak kpesiay olekwa (10:19-13:25)
Itorrer pitpitga it pesiayni totpena yana twalera (10:19-39)
Itlernohora riy mak kpesiayni karuri, mak kmormior lia ler ululu (11:1-40)
La'pa itler la yamuki-yama'ala, nniahora-nniala'a itahan rer niek la it ihranu ralamni me yana itwaler la it pesiayni mak itlernana onnila Uplerlawna nnio' warwuarnu (12:1-29)
Wniehwa-liakta hihi'a-yapyapi mak kla' nana Uplerlawna ralamni me lira nnio'a-wawa niatu la' hohoni (13:1-25)
1
Yesus Enarehi mieman la makwohorulu-ktatrulu
Ina-nara ama-hyali, la' ululu ma'ta de Uplerlawna Naltier rer lia it upni-tgarni de Nlola makwohorulu-ktatrulu. La' ler meni na'nama Uplerlawna Naltier lia makwohorulu-ktatrulu re, Nala deulu-tatra onde ler dom de Nala nnio'oni, ler dom de hihi'a-yapyapi mak kamehi-kayona (mujizat) la'pa dom to' owa'ana. Mere la'pa ntut lia lera-mela ri mak hota kod lia noha niatni, de Enaltier mai ita de Nlol nohor neka E A'nani. La' A'nani de pede Uplerlawna Nakoki-nayapi nohkerna-rai miaran di honona. Ne Uplerlawna Nakot targa de hota A'nani de ed mak kodi plolli la haneknek wawannu. Me E' mana ed maka ktut niana Uplerlawna plolli-mneheni, tutullu-lolo'oni la'pa liplipa-kamka'mani la'a Ilwo'itu-Darwionema. E' ed maka ktolliohora (klernohora) Uplerlawna nhiolli-lietni illu-wniehwani honona. E' ed maka kariwa-kahaiya noh maran di nora mniotni honona de Nnairia lirni-tunnu mak kodi plolli-mneheni. E' ed mak kamou-kawitna rimormiori la do'oni-halli na'nama Nla' Enamtatna la Uplerlawna-Mempulwatnu walli malganna la Ilyamou-Watyatoha totpena Nlernana ya'uli-yawedi.
Yesus Enarehi-nalawan la Uplerlawna hopopanni-lili'irnu (malaikat)
Ina-nara ama-hyali, la'a A'na de ed maka klernana liwangen tiutul die, pede hota Enareh dioinia Uplerlawna hopopanni-lili'irnu (malaikat) honona. Pede emeknekama E genni-tienni maka Uplerlawna Nala la de, de nareh mieman la Uplerlawna hopopanni-lili'irnu re genni-tienni.
Itat niohora hade, yoma Uplerlawna Niwra:
“A A'nu O'a. La'pa ler di de A'ukota de Aghi' Am tiy O'a.” *1:5 Masmur 2:7
Uplerlawna mana Nakota Niwra:
“A' die de E Amni. E' de A A'nu.” 1:5 2 Samuel 7:14
Mere edon Nakot memna lir mak emkade la hopopna-lili'iru id wali. Mere Nakot nek hade la Yesus.
Ne la'pa Uplerlawna Nhopan doinia Wutmueha-Laimieh de pa Nerun la nohkerna-rai miaran di, E' mana Niwra:
“A hopopnu-lili'iru miy hononmi, mriu' pua miuh' idma-mriama A A'nu lia'arni.” 1:6 Masmur 97:7
Mere la' Uplerlawna hopopanni-lili'irnu re de, Uplerlawna Nakot nohora Niwra:
“Aghopan doin A hopopnu-lili'iru rpa hota e rhima-rre'a A' die emeka anni mak kteni me ai mak kmori.” §1:7 Yoma Uplerlawna hopopanni-lili'irnu re plet pa rlernohora Uplerlawna nhiopanni emeka anni maka kteni. Me Uplerlawna hopopanni re rukmua rira rlernohor memna riy de do'oni-halli de emekwalima ai mak kmori. **1:7 Masmur 104:4
Mere la A'nani de de Uplerlawna Nakot la:
“Uplerlawnu ne, lodanmu-hairmu nawniau kdededa pa nodi liarni. Omtiorna-mriautu de nodi plola-mneha.
Rhi'ina-rella (hya' mak kaplola) nden rer lia O ralammu, yoma O' edonna Mkaw niana yatyatni. La' hade pede Orgahi-Orha'a O Uplerlawanmu, Nwaliri O'a pa Omdiella tutullu-lolo'oni totpa rira ratota-rawaw O'a, rahepru-rayak niohor O'a. Genmu-tienmu de nareh dioinia mutwualmu re.” ††1:9 Masmur 45:7-8
10 Uplerlawna Enakot walia la A'nani:
“O' de Orgahi-Orha'a O'a. La'a nomlerni la' noha gergera-tatiah'i ma'ta de O' ed mak kakoki-kayapia noh maran di me O orgahamu ed maka khi' nana lyanti.
11 Hota hare honona re rmol wua, emeka raini mak kawnial wia, mere O' di de Omdiella genmu.
12 Nohkerna-rai miaran di hota Omhi'a pa rmolu wa emeknekama rain maka rti'ila pa edon rnairi owa'ana. Na'nama O ed mak kala warwuarnu ma Mhuerun doinia. Mere O' edonna Mhuerun doinia oke' eti. Me O mormiormu edonna la ntutu-la nte'ewa mere nodia pa la nodi liarni.” ‡‡1:12 Masmur 102:26-28
13 La A'nani nampena Uplerlawna Nakota Niwra:
“Muliwna (Mumtatnu) la A wa'lu malganna, la'pa A'utowar arwalmu re honona la lakmu nayanni.” §§1:13 Masmur 110:1
La'pa la Uplerlawna hopopanni-lili'irnu (malaikta) id mana Uplerlawna edonna Nakot lir mak emkare.
14 Pede hota itwarora de hya' er Uplerlawna hopopanni (malaikta) rina? Ir honona de nhiw maka khima-kre' Uplerlawna, maka Enhopan pa rma rtulan la' riy maka hota klernana mormiori-lewlewna.

*1:5 1:5 Masmur 2:7

1:5 1:5 2 Samuel 7:14

1:6 1:6 Masmur 97:7

§1:7 1:7 Yoma Uplerlawna hopopanni-lili'irnu re plet pa rlernohora Uplerlawna nhiopanni emeka anni maka kteni. Me Uplerlawna hopopanni re rukmua rira rlernohor memna riy de do'oni-halli de emekwalima ai mak kmori.

**1:7 1:7 Masmur 104:4

††1:9 1:9 Masmur 45:7-8

‡‡1:12 1:12 Masmur 102:26-28

§§1:13 1:13 Masmur 110:1