Yohansi Yamkekni
La' Puk di, de Yohansi Nhorta hya' ed mak ha namkek nan de. Enhorta hadi la' lerni riy liawanni rtota riy Kristen la klieratni pa ramuki-rama'ala, rwunu-rwenna yoma irpesiaya Yesus Kristus, de Orgahi-Orha'a inhatta. Maka rhorat taru ri, totpena nhi' aruri-alai mak kpaikia Puk di totpena rden rer lia pesiayni, la'pa la'awa lerni la riy rtota la klieratni onde rler la yamuki-yama'ala, wniunu-wnienna.
La' Puk di mniotni de e rhi'a la' nhiakra woru. La' id de ed maka rano'a la krei wokni-le'enu, me wornu de e rhorat targa hya' maka Yohansi ndarat nana. Hya' maka Yohansi namkek di pa nhorta, de Kristen dom de rwarora de rhi' nana la'a ler maka itlardoin oleka, dom de rwarora la'a lera-mela ri, mere riy dom to'a wal die takeni rna'erit nana. Mere lira-tunu la' Puk di de ononni de, totpena itto'or doini-ttahnei dioinia it do'oni-halli pa tala it ralamni tetema pa tlernohora Yesus Kristus, kennama itler la yamuki-yama'ala, kropna-krieutu, onde matmiati. Yoma la'pa nla'awa hohoni de Uplerlawna nanpena Naru'u-natowra arwalli re honona ror wutga hegana amlawanni. Ne hota riy honona mak khi' yatyat la mak kpesiay re, de rlernan memna wniahlani yoma ir hihi'ini-yapyapni honona re. Ne hota itler la Uplerlawna genni-tienni mak samomuou muemna mak kamrehi-kamda'ar nohora watu-watu welli wierta, maha, mutiara la'pa Uplerlawna Nmeh'a neka hititni-repreparni. La' ler de de Uplerlawna Nkuh dioin memna it luini-nuhranu, mehrani-maunu honona, ne hota tor E' pa itden wut lia gen id pa nodi liarni.
La' Puk di de e rakot nohor emkadille:
1. Rakot nohora Puk di yala'ani (1:1-8)
2. Wutmueha-Laimieha nnio'oni-niatnu la'a krei wo'itu makden la Asia (1:9-3:22)
3. Yesus de Dum A'na mak ktutrier lia Uplerlawna onni la'a Ilyamou-Watyatoha (4-5)
4. Dum A'na de Nreye'era hiwliai wo'itu (6:1-8:5)
5. Uplerlawna hopopanni ralira noknoka wo'itu (8:6-11:19)
6. Patke'a nora niy lawna (Onni (Pasal) 12)
7. Niy lawna nora hamormiori kapliahan mera (13:1-10)
8. Hamormiori kapliahan mera nora hamormiori mak khi' hihi'a-yapyapi yawiru-yawewla mak kamehi-kayona mak kodi riy lia klieratni (13:11-18)
9. Dum A'na Nor wutga mutnu-rahanu, riy 144,000 (14:1-5)
10. Uplerlawna hopopanni wotelu lirni (14:6-13)
11. Rieiki-wnio'ora la nohkerna (14:14-20)
12. Mehra-mau lawna wo'itu (Onni 15-16)
13. Niukum lawna la'a letlawna Babel (17:1-19:10)
14. Yesus Nmai die Nha'a nana kuda wawahra ida pa Nwatei-nwahapra arwalli honona (19:11-21)
15. Niy lawna rhawlakrernia la hu'ul matmiat liawna me makpesiay Yesus rmori owa'an pa ror Yesus rodi plolli la anni riwnu ida (20:1-6)
16. Niukum lawna hohoni (20:7-15)
17. Lyanit warwuaru nora noha warwuaru (21:1-22:5)
18. Lira nnio'a-niat lia hohoni (22:6-21)
1
Puka mak kakot nohora hya' ed mak kler pa kmai wia
1 La' puk di de lirni e nwahaur nohora la'a hya' maka Yesus Kristus Nalharia (Nakot nohora) la mak khima-kre'a E kniarni, la'a hya' maka Uplerlawna Netlia de hota kler pa kmai wia. Uplerlawna ed mak kalharia hare honona la A'nani Yesus Kristus ne Ntutmuata-nkewra'a Yesus pa Nalharia hya' mak hota kayamkeka ri la mak khima-kre'a E kniarni. Noma Yesus Kristus Nhopan doinia hopopna mak kwatiawua Ilyamou-Watyatoha pa nma nakot nohor hare honona la a'u, Yohansi mak khima-kre'a E kniarni. 2 Noma Yohansi awuahaur momuoga hya' maka alina-muat nana (umkek nana) re, de Uplerlawna lirni-tunnu maka Nakot taru noma Yesus Kristus Nalharia. 3 Puk di, de makwohorulu-ktatrulu (nabi) lirni hadi, ne he' mak kpaikia puka la nhiopun lawna me mak katlina puk di lirni pa rlernohor reria, de hota rler la unut lawna yoma hota edonna nalo'on wal pia hare honona maka rakot nohora la' puk di de nwakrian wia.
A kalwie'du la krei mutnu re wo'itu
4 Ina-nara ama-hyali mak kler temn olek la mutu krei mandiditu makden la Asia. A'u Yohansi awuaka, de hota Uplerlawna Nala ra'ani-pallu me kalwiedni-paitiotni tiy miy. Uplerlawna ed mak kdena la'a dodo'ondi, E' nekpa ed makden olekwa, ne hota Nden pa nodi liarni. Me awuak pa mliernan walia ra'ani-pallu me kalwieda-paitiota la' (Uplerlawna Nhiw Lululli) mak ha rhoiya la nhiw mandiditu mak kaprir lia Uplerlawna liwangenni gaini. *1:4 Nhiw mandiditu re nnia'eratni de Uplerlawna Nhiw Lululli. Yoma la'pa makden Ibrani riwra “nhiw mandiditu” de nnia'eratni de Uplerlawna Nhiwni mak kat niohora hanek-harahu wuawannu. 5 Me mliernan wal lia' Yesus Kristus mak kdenrer miamaini (setia) pa Nakot nohora Uplerlawna lirni-tunnu mak kaplola. E' ed mak ha ramor ulga la matmiatni ralamni. Ne E' wal pia mak kodi plolli la lodna-hairia noheri woru-lyanti nayanni.
Yesus ed mak ktulla-ksayn ita pede Nala rarni na Ntuwu-nhai nian it pa Nwe'er doin it la do'a-hala ralamni. 6 Ne Enwalir nian it pa tler la hairi ida maka Ntutmuata-nkewra'a pa tla'a imam-imam mak khima-kre'a Uplerlawna, Yesus Amni de. La' hade pede mai pia ta'uli-tawedi Wutmueha-Laimieha Yesus Kristus, makdella tulu-lyanti. La' E' nampena Nmeh'a Nodi plolli pa nodi liarni. Amin (Plola).
7 Mhioratreria! Hota Yesus Nmai die lol kakma ralamni. Riy nohkerna honona ramkek rer wiali E'a, la'pa maka la' ler ululu de kho'ora tera la ihranu matni me kliwra diwdiwra rohmera la lo'mani pa rwunu-rwenn E' mana, hota rden wal pia rwatniar reria. Rimormioria nohkerna wawannu honona hota rapolu-ratniani, rko'a-rkakru. Yah! Plol toto' pa hota emkade. Amin (Plola).
8 Uplerlawna Orgahi-Orha'a ed mak kdena la' dodo'ondi, mak kden olekwa ne mak kden pa nodi liarni. E' ed mak ktorna nohkerna tirni me, krautia lyanit marna ga'arni. E' ed mak kharlirni pa Nakot emkadi: “A'g e ed mak ha rweta la Alpa nor Omega yoma A'g ed mak kala' ulu me A' wal pia ed mak kden la li'iru.”
Yohansi ndarat nana Yesus Kristus
9 Inmi-narmi Yohansi a'u, it hononita tler la liewr ida la'a it pesiayni la Yesus Kristus pa reiniande tler la kropna-krieutu, lui-nuhru, mere tarur niekpa tatahan it ralamni. It rewre'wa pa tla' riy mak Uplerlawna Nodi plolli la emeka Ray. Itler la hari honona yoma itler wutg olek la Yesus. Ina-nara, rolin targa a lia'a noha Patmos yoma awuahaur nohora Uplerlawna lirni-tunnu maka Nakot taru, noma Yesus Nalharia mai a'u. 10 La'awa krei lerni, dewade Uplerlawna Nhiwni Nhu'ru ralm a'u noma utlin nana lira ida nhaun de emolmolla noknoka ida pa e naltier lia a to'oru. 11 Lir de niwra: “Mhuorat lolola hya' ed maka mumkeka ne mu'enyatga la krei mandiditu la leta-leta ri, de Epsus, Smirna, Pergamus, Tiatira, Sardis, Filadelfia, me Laodikia.
12 Noma a'ukillia a to'oru pa utapnia he' ed mak kaltier lia a' diena. Noma umkek nana wa'du wniatatgenni wo'itu maka rhi' nana la maha. 13 La' letgar la wa'du wniatatgenni re de, riy ida e Ntutrier lia de yamkekni emeknekama mak ha rweta la Rimormiori A'na. Naniayarni de raini plalahwa. La'a ihranu de rala maha ra rwowa. 14 Moratnu wahrani emekneka duma wullu ne matni lomarni-dainni emeka ai mormiori. 15 Lakni lipa-nka'ma pa emeka pi'ra maka ai ha na'an nana. Lirni emeka ger wawuau mak kayorni. 16 Limni malganna Ntorreria wtiona wo'itu ne la'a nurnu de nage'gota wehla ya'ara ida, naplokra la to'orni-gaini. Gaini reprepar momuou pa emeka lera hititni-repreparni la lera nwawuau ro'onni.
17 La'pa umkek tutga de upru'ru tar lia gaini ralamni de ukleh lira wawa. Mere Nlapra limni malganan la a wawnu pa Niwra: “Yan mumta'ata. Mak kden ulu A'u me mak kden li'iru A'u. 18 Mak kmormiori pia nodi liarni. Amuati olekwa, mere oh! Dodo'ondi Amuor pia nodi liarni. A'g e ed mak kodi plolli la matmiati ne god plolli la noh mati-rai miolu pa A'umori owa'ana riy mak kmati olekwa re pa emolmolan nekama riy mak ktorna konsi, de nodi plolli pa nharia nhiari totpa riy rlergot la roma nhio'la.
19 La' hade pede mhuorta momuoga hare honona maka mumkeka re; la'a hya' maka ha mumkeka ri, me mak hota mumkek owa'ana. 20 Wtiona re wo'itu de nnia'eratni, de Uplerlawna hopopanni-lili'irnu la'a krei wokni re wo'itu, ne wa'du wniatatgenni re wo'itu re, de nnia'eratni krei wokni wo'itu irhatta. Hade de nnia'eratni la' wtion mandiditu mak omumkek oleka la A li'mu walli malganan de, ne la'a wa'du wniatatgenni wo'itu mak ha rwewal nana la maha.”
*1:4 1:4 Nhiw mandiditu re nnia'eratni de Uplerlawna Nhiw Lululli. Yoma la'pa makden Ibrani riwra “nhiw mandiditu” de nnia'eratni de Uplerlawna Nhiwni mak kat niohora hanek-harahu wuawannu.