1 Na'omi hawni Elimelek mak kmati oleka de, rimormiorni ida nwawa Bo'as, maka nh'inde riy ra'unni-ramta'ata yoma la'a re'eni-tniarnu.

2 Noma la'awa lera id na'nama Rut makden Moab de nakot la Na'omi niwra: “Awuak pa alia teka nhyi' ralma totpena arie'ela uwoka wetra' lawna harni maka riy rtetia pa ktuini. Pena alia uwoka wetra' lawan de la' gen mieni maka riy e rsaini a pua edonna rwayotlia a lia hande.”*2:2 La makden Israel deulu-tatarni de riy makakleha-kaplara rolindoinia rla pa rla raliria wetra lawna harni maka makreikia-kwo'ora rtetia pa rhi' atuinia demade raltarga la tanni wawannu. Noma Ruta wniakni de, yananni Na'omi nreiniana pa nhopna nla'a.

3 Dewade Ruta nla'a nhyi' ralam id pa nawoka wetra' lawna harni maka mak kreiki-kwo'ora rhi' atuinia. La'a nhyi' maka ha nla nawoka wetra' lawna har la de, Elimelek hyalli Bo'as de gahani, mere Rut naplin niohora de.

4 La'pa lardoinia jam ida-woru dewade Bo'as nwatiawua Betlehem pa nmai wia noma nwak kalwieda la makreiki-kwo'ora re niwra: “Awuak pa ORGAHI-ORHA'A Nor miy tialla.”

Noma rwak walia kalwieda la Bo'as ora nhyi' de riwra: “Ne ampak wal pia ORGAHI-ORHA'A Ntera-ndem o'a.”

5 Noma Bo'as natian nohora Rut la'a makhi' o'tani la mak kreiki-kwo'ora re niwra: “Hararar de ha nwatiawua he' genni-tienni luwnu-a'nani?”

6 Noma o'tani de nwalolla niwra: “Pat Moab id hadi! Na'nama ha nora Na'om pia rwatiawu Moab pa rmai. 7 Ha nwak ma'u pua nre'ela natopla wetra' lawna harni maka mak kreiki-kwo'ora rtolkiai yeti re, la'a wetra' lawna mak ha ra niutin taru oleka re onni! Ha natopal nek la yawyawar pa na'nama nren la hoiwial die nayanni.”†2:7 Riy dom de rwarora de ayat di nnia'eratni la'a yawala Ibrani de emkadilla: “Ha nwak ma'u pua nre'ela natopla wetra lawna harni maka riy rtokiai yeti re, la'a wetra lawna maka ha ra niutin taru oleka re onni. Ha nkar lia yawyawar memna nodia pa la dodo'ondi!”

8-9 Noma Bo'as nla' pa nakot la Ruta niwra: “Nara, mitlina! Yana mlia mutopla riy meheni dom to'a wetra' lawna harni, mere mlia mutopla la gen miaka mumkek nan de a'na muanke'a mak kar lia handi e rreiki-rwo'ora. Ne pena muor wutga a'na pat mak kar lia handi pa muliria mak ktuini re. Irlol meni-meni de mliernohor reria re. La'pa o tiermu kerna, de muemun nek la'a kekna maka a'na muanke'a mak kar die rhi'targ oleka re wa. A'ukot olek la ir pa yana muanke' ida nkakrom o'a.”

10 La'pa Rut natlin nana Bo'as lirni re dewade nwaltiora-nwalteman la na'nama nakot la niwra: “Amee! A' di de hya' id a' pua a'mu ntutga kalwiedwed lawan de mai a'u?! A' di de dakn id a'u. Nihya' pede a'mu nma nkokan nohora a'u?!”

11 Mere Bo'as nakot la niwra: “A'utlin momuog oleka o nhiolmu-lietmu maka ha mtiutga la yananmu, la'a ler maka o muanke'emu nmat pia la'pa ntutu-nte'ela dodo'ondi. Agat niohora olek walia de omultarga inmu-ammu la'a o nohomu-raimu pa ma mdien wut lia'a makden Israel ri maka ha muplin niohor ma'ta. 12 Pena wuak la ORGAHI-ORHA'A pa E' ed mak kwahla nhioli-liet samomuoumu maka ha mtiutg oleka re. Pen neka ORGAHI-ORHA'A, riy Israel re Uplerlawanni de Nhuri-ntowria pripanni-fa'anni la tiy o'a onnila miy hihi'imu-yapyapmu re, yoma omua pia muiwra mmuori-mdiar lia E nayanni.”

13 Noma Ruta nwahla lirni niwra: “A' di de mak kakleha weli id a'u. Hopopna-lili'iru ata-wa'ara mak kar lia a'mu nek de a'g edon gor la. Mere a'mu nhar lirni mai o hopopanmu a' di, nheik la a ralam kalwiedwe'du pa a ralmu namtiertierun wa. Ne awuakwak pa hota aghi' reri hya' maka kla'nan a'mu ralamni de.”

14 La'pa riwra ra'an wa dewade Bo'as npolga Rut pa niwra: “Ruta! Mmuai pia ta'ana! Mua'ala rot di oke' pa mtio'a la' sidu.”

Dewade Ruta nor rewre'wa makreiki-kwo'ora re pa ra'ana-remun wutu. Bo'as ntania wetra' lawna mak radarni pa Ruta na'an pa npepuehera. La'pa rwairwa mere Ruta ta'ennian na'an momuoga gahani pa nhi' targa. 15-16 Nhorwua noma Ruta nla pa nalir owa'ana wetra' lawna harni maka ha ratuin doinia la. La'pa Ruta nto'or wa noma Bo'as nakot la mak kari re niwra: “La'pa patke' de nalir niana wetra' lawna dom makden la har maka ha ra niutin taru oleka onni mana, de yan mia'ala! Onde yana mpiolliohora, yanhi'pa nmola-nma'a ne yan memmemna miwenan la. Rerehniana mtiotpa mhi' atuinia maka ha mteti oleka re oke'e-oke'ela totpena natopal nana.”

17 Pede Ruta nru'rer niek yatopla pa nodia la lera nheria. La'pa nwaliwra maka ha nawok nana re honona noma nlernana wetra' lawna (jelai) la'pa edonna nhal de kilu termida. 18-19 Nhor pua nla'awa leta noma nala yodni rella la'a yananni, me nal wal lia yamananni maka takenniana na'ana la dodo'ona.

La'pa yananni Na'omi namkek memna wetra' lawna maka nlernan oleka de dewade natian nohora niwa: “Inee! Omliernan hari honona la hanmeni? Me omkar lia' he'a nhyi'ini-elawni? Uplerlawnu nee! Pena Mhilpai-muanatga riy maka khi'a nhioli-liet dilla mai ami.”

Noma Ruta nakot la niwra: “La'a nhyi' maka a'uliria wetra' lawan la de, matromni nwawa Bo'as.”

20 Noma Na'omi ema rtaplelertarga pa niwra: “Hota Bo'as de it nek hade. La' plollolli de e' ed maka kamkek mita. Awuak pa ORGAHI-ORHA'A Ntera-ndem a nar mamni de! Yoma E ed mak ktut reria E ralam kalwiedni la'a mak kmati oleka me mak kmormior mia'ta di.”

21 Noma Ruta nakot nohor wal lia yananni Na'omi niwra: “Ina, hade edon nmeh'a, mere riy de enano'tar wualia a'u niwra pena, agor rewre'wa makreiki re pa a'ulir pia nodi liarni la'pa rieik-wnio'or lerni de nhor muemna.”

22 Noma Na'omi nakot la Ruta niwra: “Ineee! Talan samomuog olek hade tiy o'owa! Totpena nhi'inde omuor wutga inmu-elmu re pa mkiar riere'wa la'a Bo'as nhyi'ini de. Yoma la'pa omkar lia' riy meheni nhyi'ini de yanpa riy rarie'yu.”

23 Pede lera-ler nekpa Rut nlernohor reria patke' mak kar lia la'a Bo'as nhyi'ini pa nodia la'pa rieiki-wnio'or lerni nhorwua.‡2:23 La'a rieik-wnio'or lerni de rreikia wetra lawna mak kyata (jelai) demade rlernana wetra lawna mak samomuou lerni wali. Ne Rut mana edonna nhoitio'or la yananni Na'omi mere rrora rhol wiutu la'a roma ida.