1 Ko agou na tinoni mu doro veinigei na nabulu tana Karisito gu beto na tinoni qe tavakopunia gu ko qe taraenia na gigalai golomona tana Tamasa sagei. 2 Ko kai sakasa poreveveina sa tanyogua tabata tadira na nabulu sa mai tinoni tarangedi sira. 3 Ba pana taqu sa qake vaporeveveinaia sa agou babi ira na goto tinoni bai pitusiu, beto ko mekaqu ba qake pitu mulenisiu tugu. 4 Kepore sa kai sela qa gigilasiu ba roitinia, ba qake korapa paranga vei ko ara qa tuvisi qakeu sa. Goto na Bangara tu sa isa sa koleona nona tuvisina ko mina pitusiu sara. 5 Ko sa vei sa muke tei roitinia tu na miu vaipitu totonai sa oqoro kamua na ona totoso totonai mina lame na Bangara. Ko mina tolanga vavoturia pa kakaberena isa sira na sakasa qai korapa tagolomo pa rorodomona beto ko mina vabola voturia sira na uana golomodi pa bulodi na tinoni. Ko totonai tu sa mai okoto tekua ira na tinoni pana tana Tamasa tu sa na vinalavata.

6 Ko pana laemiu agou, ka visa tavitiqu, sa qa vavapadanigei agei kao Apolosi sira na sakasa aipira, ko agou mu batia pana tamigei sa na ginuana na vavanau <<Muke tete jolania na pada sa tapoja pana kukuti,>> qeu. Beto ko vei ko agou ba muke vaivagore lao lamenia sa na veveina qu vaporeveveinai kai tinoni mamata goto kame qu vagorea. 7 Ura quke poreveveina jolaniria ira na goto tinoni sao. Na sa mai sa qu isongia ao vei sa goto pana vaivana sa tei vanigo tu na Tamasa? Bi julingai tu! Ego ko vei doruna qu isongoria ao sa na vaivana gu, poni na sa laona qu vavaqata kale pu vei nake vaivana tu sira qu isongoria? 8 Qu rorove veinigou qu tei pote taluangagamiu tu sagou! Qu doro veinigou qu tei isisongomiu tu pana vaivana tana Tamasa sagou! Agei qe oqoro bangara goto agou qu doro veinigou qu tei bangaramiu tu! Ko ara qa nyoguania tugu sa bu bangara sosoto sagou, ko agei ba be boka somana bangara tavitigou sagou qau! 9 Ura ara qa rovea sa na Tamasa sa vanigei na tuturuna kepore veveina sosoto sagei na tinoni tagarunumei ko qe vei ira na tinoni qai tapitu ko mai tavamate vakekea qarigu, ko agei sa na dia avavuna ira na kasia gusu, ira na mateana beto ira na tinoni. 10 Agei na tinoni duduvilimei ura qe vasosotoa na Karisito, goto agou qu tavagigala pana miu tutina na Karisito! Agei na tinoni munyala, goto agou na tinoni neqimiu! Agou qu tavabangara, goto agei qeke tavalavata! 11 Sa kamua tugu pana totoso api sa qe burana, qe kidepe, qai ruaja na mei poko, qe tapoara vakekea, qeke togasa pana kai ia, 12 beto qe pavu taleni limamei mekamei ko qe tekua na gagani. Tonai qai poja tarinigei na sakasa ikeredi ira na tinoni, poni qe tepa vaniria na mana. Tonai qai aru vivitigigei ura qe tutia na Karisito, poni qe mavo gosororia tugu agei sira na vitigi ira. 13 Tonai qai poja vivikeregei, poni sa qe paranga vaivaneqi gu sagei. Ko sa kamua pana totoso api qai veinigei na nyanyao beto na pajidi doru manugu pa kasia gusu sagei.

14 Ara qa kutia na leta api nake vei ko ma vakeagou agou qau sa, goto qa veinigou na qua koburu qa roroquria ko ma vatavagigalaria qau. 15 Ura vei bai soku vivitigi tu sira qai kopunigou na totolinigou sagou, ba kame gu sa na tamamiu agou. Ura pana miu toa tutina na Karisito sa ara gu sa qa vei na tamamiu ko qa pogoso lame vanigou na nongoro jongana. 16 Ko qa tepa vivitigigou ko mu doro tutia agou sa na toa taqu. 17 Ko sa vei puputa isa sa ara qa garunu laonia pana tamugou si Timote, isa sa vei na tuqu qa roqua beto qa rangea pana toa tutina na Bangara. Ko isa sa mina vanonoganigou sira na qua uana pana toa tutina i Jisu Karisito. Ira na uana aipira sa qa vaivagigalainiria pana doru ekelesia doru eqa.

18 Kaki agou sa qai rove veinia manake lame ovikigou ara qarigu, ko qai vavalavatai. 19 Ba ara sa nake sovaina beto sa kode mana lao gu, vei mina nyoroguanisiu na Bangara ko mana lao. Ko tonai sa mana doro votunia mekaqu ara sa nake paranga gu mekana tadira na tinoni vavalavatai goto na dia neqi tugu vei. 20 Ura na binangara tana Tamasa sa nake sakasa sa kole pana paranga, goto sa kole pana neqi sa tabata votu tu pana uana tadira na tinoni. 21 Ko na sa qu nyoroguania? Tonai mana lame poni qu nyoguania mana pogoso tarinigou na piqolo, ba ma lame pana uana vairoqu beto na momosona?