1 Ego, ka visa tavitiqu, kopira qa nyorogua ule vanigou mule sa isa tugu na nongoro jongana qa tei ule vanigou tu, ko na nongoro jongana tugu isa sa qu tei teku vakatapia tu beto ko ketakoi tugu sa turu vamauru sa na miu rarange. 2 Isa sa na nongoro jongana qa taraenia ara tamugou, ko agou sa isa tugu sa alogou vei muna aru tamana vamauria sisa. Goto vei muneke vei poni sa na miu rarange sa na goborona gu.

3 Qa vakarovo lao vanigou ara sisa na nongoro jongana qa tekua ko na poreveveina jola sapi: i Karisoto sa mate paenia noda sela ko sa gore votu sisa vei sa takuti pana Kukuti Tabuna, 4 ko sa tagolomo beto ko sa turu mule pa vinaue rane sisa vei tugu sa takuti pana Kukuti Tabuna, 5 beto ko sa bola votu pana ti Pita beto sa tadira doru ka manogarua tinoni tagarunudi. 6 Beto sa sa bola votu tadira jola lima gogoto ona sepele pana kai totoso, ko sokudi ira sa qai korapa suveredia gu, goto kaki sa qai tei mate tu. 7 Beto sa bola votu ti Jekopi beto sa tadira doru tinoni tagarunudi. 8 Ko na vinabetona sosoto, sa sa bola votu pana taqu, ara qa vei na melalu sa podo tonai sa oqoro tata kamua nona popu okotona ko qake kamua na tuturuna tadira doru tinoni tagarunudi. 9 Ura ara sa na kepore veveiqu sosoto agei ira na tinoni tagarunumei, ko nake padaqu ko mana tagigala kai tinoni tagarunuqu sara, ura ara sa qa ngangangulia na ekelesia tana Tamasa. 10 Ba pana variroqu vaialona tana Tamasa sa ara sa isa ara kopira, ko na ona vairoqu vaialona isa sa vanisiu ara sa nake goborona. Ba ara tu sa qa pavu tale jolaniria ira doru tinoni tagarunudi, ba nake pana qua boboka sa qa vei, goto na vairoqu vaialona tu tana Tamasa sa sa somana pana taqu. 11 Ko bi ara ba tarae vevelania sa babi ira bai taraenia, ba api tugu sa na nongoro qe tarae vevelania ko agou ba isa tugu sa qu vasosotoa. 12 Ego ko na nongoro sa tatarae sa na Karisito sa tei turu mule tu pana mate, ko ai sa vei sa kaki agou sa qai pojai sa ira na tinoni matedi maike turu mule qarigu? 13 Ba vei ira na tinoni matedi sa maike turu mule, poni sa na Karisito ba sake tavaturu mule tugu sa vei. 14 Ko vei bike turu mule tugu sa na Karisito, poni sa na nongoro qe taraenia agei sa na goborona gu beto ko na rarange tamugou sa sa kepore vagisona. 15 Beto ko mina vei sa agei qe tabata votu gu sa qe sesekenia sa na veveina na Tamasa, ura agei qe vavakatonia sa na Tamasa sa vaturu mulea sa na Karisito pana mate qeu. Ba vei bi sosotona sa ira na tinoni matedi sa maike tavaturu mule, poni sa na Tamasa ba sake vaturu mulea ropi sa na Karisito. 16 Ura vei ira tinoni matedi sa maike tavaturu mule, poni sa na Karisito ba sake turu mule tugu sa vei. 17 Ko vei bi sosotona sake tavaturu mule sa na Karisito, poni sa na miu rarange sa na goborona sagou beto ko agou sa qu korapa pinausu gu pana neqi tana sela sagou. 18 Ko mina vei sa ira qai vasosotoa na Karisito beto ko qai tei mate tu sa qai mate manyao gu sa vei. 19 Bi vei bi pana toa gu api mekana bi tokanigita sa noda totoravusu tana Karisito, poni sa sa pada tugu ko tana vei na tinoni sa vaivaroroqu vivitigi pa kasia gusu api sa gita.

20 Ba na sosotona sa na Karisito sa sa tei tavaturu mule tu pana mate, ko isa sa na vua moedi*Na ginuana isa na vua moedi ira qai tei mate tu sa na Karisito sa sa turu mule momoe pana mate, ko sa vei sa gita ba taqe gigila vatalea sa na Tamasa kode mina vaturu mule veinigita tugu sa veinia na Karisito. ira qai tei mate tu. 21 Ura taqe gigilaioda gita sa pana roiti tana kai tinoni sa tome lame vei sa na mate, ko pana soana vei tugu isa sa pana roiti tana kai goto tinoni mule sa mai tavaturu mule pana mate sira na tinoni. 22 Ko kai muqisi podeke vei pana dia kole kame ti Adama sa dorudi sa qai mate, poni sa pana dia kole kame tana Karisito sa dorudi sa mai tavatoa mule. 23 Ba ira na okokoto tinoni sa mai tavatoa mule pana dia vaitutina tu. Na Karisito sa sa tavaturu mule momoe vei na vua moena, beto sa ira sa isongoria isa sa mai tavaturu mule tonai mina mule lame sisa. 24 Beto sa mina lame sa na vinabebetona na kasia gusu totonai mina vakilasaria sa dorudi na babangara beto dorudi na neqi beto na viva, beto sa mina vakarovo laoa tana Tamasa na Tamada sa na binangara. 25 Ura na Karisito tu sa mina Bangara tinganai na Tamasa mina vakilasaria sira doru ona kana beto ko mina vakole kaurairia tana Karisito. 26 Na kana vinabebetona mina tavakilasa manyao sa na mate. 27 Pira sau sa na Kukuti Tabuna, <<I Tamasa sa tei vakoleria tu sa doru sakasa pa kaurai nenena,>> sau. Ba totonai sa paranga <<doru sakasava sa qai tavakole pa kauraina isa>> sau, poni sa na kaberena gu sa pana paranga <<doru>> sake tavasomana sa na Tamasa, isa sa vakoleria doru sakasa pa kauraina na Karisito.Kera Vinatarasae 8.6. 28 Ba totonai doru sakasava sa qai tei tavakole kaurai tu pana tana Karisito, poni sa na Karisito mekana, na Tuna, sa mina vakole kauraia mekana tana Tamasa, isa sa vakolea doruna sakasava pana kauraina na Tuna. Ko na Tamasa sa mina Bangara betoniria dorudi.

29 Ego, goto ai vei sira na tinoni qai tapaputaiso vaniria ira qai tei mate tu? Na sa qai rove veinia kode mai vapodoa sira? Bi vei ira na tinoni matedi sa maike tavaturu mule sosoto, poni sa ai sa vei sira na tinoni ira ko qai tapaputaiso vaniria tu sira na matedi? 30 Ko vei maike tavaturu mule sira na tinoni matedi, poni sa agei sa ai sa vei ko sa ongongugei na tapata doru totoso? 31 Ka visa tavitiqu, tata gu ba gosoria ara doru rane sa na mate! Na uana vavalavatai qa isongia ara pana veveimiu agou tonai taqe somana kole kame tavitia na Karisito Jisu noda Bangara sa sa roiti veinisiu ko qa ule votu vaneneqinia sapi! 32 Na sa ropi qa vagavoria sara tonai qa taleria ara sira na tinoni pa Episasi qai vei na manugu made nenedi pirudi qai vavarivai. Vei ira na tinoni matedi sa maike tavaturu mule poni sa <<Aria gu ropi ko ta kole gaganigada beto ta kole bukugada gu, ura vuka tana mateoda gu.>>Aisea 22.13; 56.12; Luke 12.19-20. 33 Muke vamalumuria ira na tinoni ko mai valoposogou: ira na baere ikeredi sa qai ngangulia na uana jongadi. 34 Mu mule lame pana miu roroqu tavagigalana beto mu noso toaniria na uana ikikeredi. Ura kaki agou sa quke gigilai na Tamasa, ko na padamiu muna keania tugu agou sa sa vei isa.

35 Ba kode mai nanasa sira kaki, <<Ai mai tavaturu mule vei sira na tinoni matedi? Ai tini vevei sa mai isongia ira?>> marigu. 36 Ao na tinoni rururamu! Totonai qu umania pana peso sa kai kiko, sa sa mate mai tu sisa beto sa sa pidoko. 37 Beto isa qu umania sa nake gogou tinina isa mina vevei tonai mina lavata sae, goto na kiko gagalena gu na vuiti babi kaki goto kiko sa qu umania. 38 Ba na Tamasa tu sa vania na tinina na veveina sa vilea isa sa na kiko isa, ko na okokoto kiko sa vania na goto tinina mekana.

39 Na tinidi doru sakasa toadi sa qaike vavaitoto. Koleona sa na tini tinoni, sa goto tu sa na tinidi na manugu mamade nenedi, goto tu sa na tinidi ira na manugu tatava, beto goto tu sa na tinidi na igana. 40 Koledia sa na tinidi sakasa pana oka beto koledia sa na tinidi sakasa pa peso. Ba na babata jongadi na tini pana oka sa kame, beto na babata jongadi na tini pa peso sa sa kai goto tu. 41 Na babata jongana na tapo sa kame, na babata jongana na popu sa goto tu, beto na babata jongadi ira na seru sa kai goto mutu. Ko ira na seru gu ba sa gogoto tu na babata jongadi.

42 Ko inara mina vei sa tonai mai turu mule ira na tinoni matedi. Na tini sa tagolomo sa sa vei na kiko sa boka nyabo mate, ba na tini mina tavaturu mule sa minake mate. 43 Na tini sa tagolomo sa na babati karena, ba tonai mina tavaturu mule sa mina babata jonga. Isa sa tagolomo sa munyala, ba tonai mina tavaturu mule sa mina kolea na neqi. 44 Na tini sa tagolomo sa na masa norungu, ba totonai mina tavaturu mule na tini gagala sisa. Sa koleona sa na tini masa norungu, ko na tini gagala ba sa kolena tugu. 45 Ko sa vei sa pira sau sa na Kukuti Tabuna, <<Na tinoni momoe i Adama sa na tini tinoni toana,>> sau; ba na Adama vinabebetona sa na Gagala vaivatoana.Popodalaina 2.7. 46 Nake toa gagala sa sa lame momoe, ba na toa tini mai tu, beto sa sa lame liligu sa na toa gagala. 47 Na tinoni momoe sa sa taroiti pana kavuru peso, ko na koko lame veina pa peso, goto na tinoni vinarua sa sa lagere vei pa noka. 48 Ira tana na peso sa qai vei tugu isa sa taroiti pana peso, ira tana pana oka sa qai vei tugu isa sa lagere vei pa noka. 49 Ko kopira sa taqe popokonia na kirena na tinoni sa taroiti pana kavuru peso, ba kode sa tana vasaea na kirena na tinoni sa lagere vei pa noka.

50 Na ginuana qa paranga vei api, ka visa tavitiqu, sa na masa na orungu maike teku isongia sa na binangara tana Tamasa beto ko na tini mina boka mate sa minake teku isongia sisa sake boka mate. 51 Mu vainongoro lame ko! Ma pojanigou sa na sosoto sa kole golomona api: gita sa tanake mate beto, goto tana tabei beto, 52 pana leona iapeki peki totoso vei kai vakipu mata, tonai mina vaqoro sa na kuvili bebetona. Ura tonai mina vaqoro sa na kuvili bebetona, poni sa mai tavaturu mule sira na tinoni matedi ko maike boka mate ligu, beto sa gita tana tabei. 53 Na tini sa boka nyabo api sa mina tabei lao tu pa tini minake boka nyabo, beto ko isa mina mate sa mina tabei lao tu pana tini minake boka mate. 54 Ko totonai na tini sa boka nyabo sa mina bei lao pana tini sake boka nyabo, beto ko totonai isa mina mate sa mina bei lao pana tini minake boka mate, poni sa beto mina gore votu sisa na paranga pa Kukuti Tabuna, pira sau,

56 Na neqi vavaigaratana tana mate sa na sela beto na neqi tana sela sa na Vavanau. 57 Ba gita ta paranga jongana lao tana Tamasa isa sa vanigita na boboka ko taqe vakilasia noda kana pana roiti sa roitinia na oda Bangara i Jisu Karisito. 58 Ko inara sa vei, ka visa tavitiqu jojonga, mu turu vamauru beto muke tavarijo pana miu rarange. Mu jujunonia na roiti tana Bangara, ura qu gigilaimiu agou sa kepore sa kai roiti qu roiti vania na Bangara sa na goborona.