1 Ka visa tavitiqu, agou mekamiu qu gigilaimiu sa na mei lame agei tamugou sa nake goborona. 2 Qe gosoro taleni vitigi perangana beto qe takomiti vivikere pa Pilipae sagei, isa tu vei qu tei gigilaimiu tu agou, ba na oda Tamasa sa vavarenegei ko qai raja kokolosogei tu ba qe ule vanigou tu sa na nongoro jongana tana Tamasa.

3 Ko na mei tepa lao tamugou sa nake vei ko me vasianagou babi me roitinia pana uana ikeredi babi me veloposogou qekeu sa. 4 Goto na Tamasa tu sa viloto vaegogei ko sa varangenigei sa na nongoro jongana api ko sa vei sa qe vavakatonia. Ko nake tinoni sa qe nyorogua vaqerai agei, goto na Tamasa tu isa sa vilotia na bulomei.

5 Ko qu tei gigila vataleamiu tu agou sa agei qeke lame paranga valolomosogou babe pojaria kaki paranga ko be tekumei isisongo tamugou qekeu. Na Tamasa sa bati gigila vatalegei agei. 6 Qeke nyaqoa na vinatarasae tadira na tinoni, bi tamugou babi tadira goto tinoni. 7 Be boka vapogosonigou gu na mamata sa agou ura na tinoni tagarunumei tana Karisito sa agei, ba qe vakoburugei tonai qe suvere tavitigou. Qe suvere vei gu na rereko sa kopu vataleniria na tuna. 8 Qe kukuli vivitigigou sa agou, ko sa vei sa qe ngangali ianigou agei sa nake mekana gu na nongoro jongana tana Tamasa goto na mei toa tugu vei, ura qu bulomei agei sa agou. 9 Qu roqu vakoititiria agou, ka visa tavitimei, sira na roiti manginidi beto na tapatadi qe roitiniria agei. Na rane na bongi sa qe roiti ko meke vatapatianagou agou pana kopumei agei tonai qe taraenia tamugou sa na nongoro jongana tana Tamasa qeu. 10 Agou beto na Tamasa sa gigila vataleaona sa na uana qe toania agei pa moemiu agou qu vasosoto sa sa lioso, sa tuvisi beto sa kepore opopuna. 11 Ko agou qu gigilaimiu sa agei qe veinigou na tamana sa veiniria na ona koburu sagou 12 ko qe paranga vaneqigou, qe vamanotogou, beto qe paranga vamaurugou ko mu toania na toa sa garo tana na Tamasa isa sa kuku tomenigou pa ona binangara beto na vinalavata qeu.

13 Ko agei ba qeke koroto paranga jongana lao tana Tamasa ura agou tonai qu nongoronia pana vavakato tamigei sa na paranga tana Tamasa, poni sa quke teku veinia na paranga tana tinoni goto qu teku vakatapa veinia tu na paranga sosoto tana Tamasa sisa, isa na Tamasa sa korapa roiti tamugou qu vasosoto. 14 Ka visa tavitimei, agou qu doro tutiria sira na ekelesia tana Tamasa pa Jiudia, ira na tinoni tana Karisito. Ura agou ba qai aru vitigigou tugu ira na tinonimiu gu mekamiu, kai muqisi podeke vei tugu ira na Jiu qaike vasosoto sa qai nganganguluria sira na ekelesia pa Jiudia. 15 Ira tugu na Jiu ira sa qai vamatea sa na Bangara i Jisu beto ira na tinoni kokorotai pa moa beto agei ba qai ngangulugei tugu vei. Ko na Tamasa ba qaike vaqerai beto doru tinoni sa qai kana betoria. 16 Agei qai suqutugei ko meke vavakato vaniria ira na tinoni karovodi sa na nongoro jongana isa mai taalonia ira qarigu. Ko tonai qai roiti vei aipira sa ira sa qai korapa vaikamu vapugele vasokua sa na dia sela. Na kokora tana Tamasa sa kopira sa togaria sira.

17 Ka visa tavitimei, pa iapeki totoso qe suvere tapikata tamugou (ba qu tapikata pana tinimei, nake pana bulomei), sa qe kukuli laonigou gu sa agou ko qe popodeke vivitigia ko be dogororia na isumatamiu qeu. 18 Qe nyorogua vivitigi lao kamugou sa agou ko ara mekaqu qa popodeke tu kame karu totoso, ba i Setani sa kokolosogei. 19 Ura i sei sa na ginuana qe vera gegele, qe qeqera, beto mene tekuni pinia agei tonai mina mule lame na Bangara i Jisu Karisito? Agou tugu vei ke! 20 Ura agou sa na mei vinalavata beto na mei qeqera.