1 Ara Paula, pana nyorogua tana Tamasa qa kai tinoni tagarunuqu ti Jisu Karisito, beto ko i Timote na tasida.

Na leta api sa sa lao tamugou na ekelesia tana Tamasa pa Koriniti beto ko tadira dorudi na tinoni tana Karisito qai suvere doru eqa pa pikata ia pa Akaia.

2 Na vairoqu vaialona mi kole somana tamugou beto vei tugu na bule tana Tamasa na Tamada beto na Bangara i Jisu Karisito.

3 Aria ko ta vatarasaea gita sa na Tamasa, na Tamana na oda Bangara i Jisu Karisito. Isa sa na Tamada sa kopu vatalenigita beto na Tamasa sa vanigita doruna na manoto. 4 Isa sa vamanotogita pa dorudi na oda tapata, ko sa vei sa gita ba tana boka vamanotoria sira qai gosoro tapata. Ko tonai tana varoitia sa na manoto gita mekada sa tei vamanotonigita tu na Tamasa, poni sa tana boka vamanotoria sira. 5 Ura kai muqisi podeke vei tugu qai pugele tarigita sira na vitigi ura taqe vasosotoa na Karisito, poni sa pana oda kole kame tavitia na Karisito sa na manoto lavata tana Tamasa ba sa pugele tarigita tugu. 6 Vei be gosoro vitigi sa agei sa na ginuana sa vei ko agou mu tavamanoto beto mu vasosoto ko mu taalo agou. Vei be tavamanoto sa agei, poni agou ba qu tavamanoto tugu sagou beto qu turu vangajuria sira tugu na vitigi qe gosororia agei. 7 Na mei rangemiu agou sa sa oqoro rijo; ura agei qe gigilai sa kai muqisi podeke vei qu somana gosororia agou sira na vitigi qe gosororia, poni sa kode muna somana isongia tugu vei agou sa na manoto qe isongia. 8 Ura agei qeke nyoroguania ko bu mumaniria, agou ka visa tavitimei, sira na tapata qe gosororia agei pa pikata gusu pa Esia. Na pogoso mamatadi qai vanigei sa qai lavata jola beto qai bogata jola ko agei qe tei munyalania tu sa na rorovena mene toa lalaomei. 9 Goto qe rove veinia qe tei tavapogosonia tu agei sa na lelevena na mate. Ba na ginuana sa vei api sa vei ko meneke totoravusu mulenigei mekamei sagei, goto me totoravusia na Tamasa tu isa sa boka vatoa muleria sira qai tei mate tu. 10 Ko pana tapata vaivamatedi, isa sa sa vasaregei beto ko isa tugu mina vasaregei. Ko pana tana qe vakolea agei sa na mei totoravusu ko kode isa mina vasare ligugei mutu, 11 vei muna mekarai vavara tokanigei sagei. Ko mai taoe sira na soku vavara ira ko na Tamasa mina mananigei, poni sa ira na soku sa mai paranga jongananigei sagei.

12 Agei qe vaqatania sa na monanamei mekamei sa gigila vatalea sa agei pana mei uana pa kasia gusu api sa qe toania na bulo tuvisina beto na bulo liosona qai lame vei tana Tamasa. Ko pana mei baere lao tamugou ba qe toa vei tugu isa. Ba nake pana gigigalai tana tinoni goto pana vairoqu vaialona tu tana Tamasa sa qe boka roiti vei aipira sagei. 13 Ura kepore na ginua golomodi sira na sakasa qe kuti lao vanigou goto isa tugu na veveina qu boka tiroa ko qu vakaberia agou. Ara qa rovea sa kode muna vakabere vatatale 14 veinia isa qu tei vagigilaimiu tu na kobudi. Ko agou muna boka vaqatanigei sagei kai muqisi podeke vei agei ba mene vaqatanigou sagou pana rane mina lame noda Bangara i Jisu.

15 Ura qa gigila vataleaqua ara sa na miu qeqera vei isa ko sa vei sa ara qa nyoroguania tu ko ba lame momoe tu tamugou, ko agou bu tamana karu totoso qau. 16 Qa nyorogua lao ovikigou sagou tonai mana rerege jola lao sae vei pa Masidonia, beto tonai mana mule lagere sa mana jola vei tugu tamugou ko mana boka tekua kaki vaitokai pana tamugou pana qua rererege lao pa Jiudia sau sa na qua nyorogua momoe. 17 Ai vei qa vei na tinoni sa rabeke sara totonai qa nyorogua roiti vei isa? Ai vei qa roitiniria na qua nguti vei kai tinoni pa kasia gusu api ko qa vanaqiti mekarai pojaria na <<E, e>> beto na <<Dai, dai>>? 18 Na Tamasa sake boka teteria nona paranga, ko agei na mei ngunguti lao tamugou ba sake vaisomanai <<E>> beto na <<Dai>>. 19 Ura na Tuna na Tamasa, i Jisu Karisito, isa na veveina qe taraenia tamugou agei Silovanosi i Timote beto ara tugu, sa nake vaisomanai <<E>> beto na <<Dai.>> Ba pana tana sa doru totoso sa na <<E>> gu. 20 Ura dorudi na taringunguti tana Tamasa sa qai gagale <<E>> pana tana. Ko inara sa vei sa pana ti Jisu Karisito na <<Agua>> sa sa tapoja ko na valavatana na Tamasa. 21 Ko na Tamasa tu mekana sa vamauru tavitinigei agou sagei pana oda kole kame tavitia na Karisito beto ko isa tu mekana sa uduku garunugei. 22 Isa sa tei vakolenigita tu na vinagigila ko na ona isa sa gita beto sa vanigita na ona Gagala pa buloda ko na kolena na Gagala isa sa na vinasosotona sa gita sa na ona isa.

23 Ara qa kukua na Tamasa ko mi vasekesiu vei bake ulenia ara sa na sosotona. Ura isa sa gigilai na buloqu! Na ginuana qake mule lao ligu pa Koriniti sa ura qake nyorogua vatakulangagou mule sagou. 24 Nake vei ko agei qe kukuta uanania na sakasa muna vasosotoria sa, ura agou qu turu vamauru pana miu rarange. Goto agei qe mekarai roiti tavitigou ko na vaqeragou agou.