1 Tiopilasi, pa qua buka momoe qa tei kuti valao vanigo tu sa qa vavakatoniria sira doru sakasava sa roitiniria beto sa vaivagigalainiria i Jisu podalai tu totonai sa podalainia na ona roiti 2 ko tinganai sa kamua na ranena sa tateku sae pa noka sisa. Totonai sa oqoro tateku sae sisa, sa sa ule vaniria isa pa neqi tana Gagala Tabuna sira na tinoni tagarunudi sa tei vileria tu. 3 Tadira sa sa vovotu tabata kubo totoso pa gogoto soana pa leona ka madengavuluputa rane pa liguna na ona mate. Ko sa tavasosoto vatale sa na toana sosoto tugu sisa, beto ko pa totoso tugu ira sa vavavakato vaniria isa sa na veveina na binangara tana Tamasa. 4 Ego totonai qai korapa mekarai teteku ira sa sa pojaniria i Jisu sira, pira sauniria, <<Muneke taloa pa Jerusalema sagou, goto muna verania sa na neqi isa sa taringungutinia na Tamaqu, isa vei qu tei nongoria tu qa pojanigou ara. 5 Ura i Jone Paputaiso sa sa vaipaputaisonia na kolo, goto agou sa ka vivisa rane gu qai kole pa moemiu pira sa kode muna tapaputaisonia na Gagala Tabuna tu,>> sau si Jisu.

6 Ego ko totonai tugu qai korapa suvere vaikamudia ira doru, poni sa qai kole nanasia si Jisu, pira qarigunia, <<Bangara, ai vei pa totoso kopira sa muna vamule vania na bubutu tinoni Izireli ao sa na binangara?>> qarigunia.

7 Poni sa pira sauniria i Jisu sira, <<Nake miu laona agou ko muna gigilaria sira na rane na totoso, goto na Tamaqu tu pa ona neqi mekana sa vileria. 8 Goto agou sa muna tekua sa na neqi totonai mina lageregou na Gagala Tabuna, ko muna vavakatonisiu sara pa Jerusalema, doru eqa pa Jiudia, pa Sameria, ko tinganai muna kamua tu na vinabebetona na abana,>> sau si Jisu.

9 Ego ko sa beto tugu paranga vei inara isa, poni sa tonai tugu qai korapa dodogorodia ira sa sa tateku sae pa noka sisa, beto sa sa lame kai lei ko sa vapaea ko qaike batia sa totonai.

10 Ego ko qai korapa tugu enga doro tututia ira sa na saena isa pa noka, poni sa qai votu vasiboro turu tavitiria sa karu tinoni qai popoko keala, 11 ko pira qarigu, <<Boko minete tinoni Qalili! Ai sa vei ko qu korapa tu turu enga sae vei pa noka sagou? Isa tugu i Jisu api, isa sa tapikata tamugou ko sa tateku sae pa noka, sa mina mule lagere pa soana vei tugu qu batia sa sae pa noka sisa,>> qarigu.

12 Ego pa liguna isa sa qai taloa pa kubo pa Olive ko qai gabala muledia pa Jerusalema, na souna sa na padana kai kilomita. 13 Ko tonai qai kamu pa Jerusalema, poni sa qai sae pa lose pa nulu ko ketakoi qai susuvere. Ira na tinoni aipira sira Pita, i Jone, i Jekopi, i Aduru, i Pilipi, i Tomasi, i Batolomiu, i Matiu, beto i Jekopi na tuna i Alepiasi, i Saimone isa perangana na somanana tadira qai nyorogua adu palea na qavuna pa Romu, beto ko i Jiudasi na tuna i Jekopi. 14 Ko ira doru aipira sa qai mekarai suvere vavaikamu ko qai aru totokai na vavara, tataviti ira na rereko beto i Mere na tinana i Jisu beto vei tugu ira na tasina marene.

15 Ego ko kai rane vevei ira totonai qai vaikamu (na padana kai gogoto rabeteputa tinoni sira qai vaikamu), sa sa turu si Pita pa vaikorapaidi ira, ko pira sau, 16 <<Boko tavitiqu, sa tei gore votu tu sa na Kukuti Tabuna, isa perangana tu sa pojai na Gagala Tabuna ti Devita, na veveina i Jiudasi isa sa koimataniria ira qai aru tamania i Jisu. 17 Isa sa somana taanye tavitigita mai tugu gita ko sa somana aru tugu pa roiti ninabulu api,>> sau.

18 (Ko isa tugu na tinoni api sa sa vainia kai kobu peso sa na poata sa tekunia pa ona roiti ikikerena, beto sa gona tulusu tapukania ko sa votu beto pudala tu na borina. 19 Ko qai gigila betoa ira doru tinoni qai suvere pa Jerusalema sisa sa vei inara, ko na kobu peso isa sa pa dia parangana qai vaisongonia Akeledama, na ginuana isa sa na Kobu Peso Orungu.)

20 <<Ura na takuti kolena pa buka Kera Vinatarasae sa pira sau,

23 Ko qai vileria sira karu: ira Josepa, isa qai vakukunia i Basabasi (i Jasitasi tugu vei sa kai isongo qai vakukunia), beto i Mateasi. 24 Beto sa qai vavara, pira qarigu, <<Bangara, ao qu gigila betoria sa na bulodi doru tinoni. Ko mu ule vanigei i sei ira karu pira sa qu vilea ao 25 ko mina aru tokai sa na roiti ninabulu tana tinoni tagarununa, isa sa loa pale i Jiudasi ko sa laona pa ia vaivakilasana sa taiania,>> qarigu. 26 Beto qai gonania ira sa na patu vivile poni sa tauduku si Mateasi, ko isa sa sa somana taanye tavitiria ira ka manogameka tinoni tagarunudi.