1 Ego kai rane sa ira Pita i Jone sa qai sae pa kakabarena zelepade pa totoso vavara kue koloko gogore tapo. 2 Ko kai tinoni na podo qaona sa sa kai tapogoso kamu mule. Na vaituti rane gu sa qai popogoso lao vavatoqoa pa kakabarena zelepade pa atakamana isa qai vakukunia na Atakamana Babatajonga, ko mi tetepaniria na poata sira mai totome lao pa kakabarena zelepade qarigu. 3 Ko totonai sa batiria sira Pita i Jone mai korapa tome pa kakabarena zelepade qarigu, poni sa sa tepaniria na poata. 4 Poni qai do tari vatotogasia ira i Pita i Jone sisa, beto sa paranga lao tana si Pita, pira sau, <<Mu doro lame tamigei karu!>> saunia. 5 Poni sa doro lao tadira karu sisa, sa rorovea palu mai vanisiu kaki sava sa sau.

6 Ba sa paranga si Pita, <<Na poata siliva beto na qolo sa kepore vavagigila na qua sara, ba isa vei qa isongia sa ma vanigo ao: pa korapa isongona i Jisu Karisito pa Nazareti sa mu turu ko mu rerege!>> saunia. 7 Beto sa lao arua i Pita sa na lima kale matuana na tinoni sa qao api, ko sa bako vaturua. Poni pa totoso tugu isa qai neqi sa na nenena beto na vaijokelai pa kuta nenena na tinoni isa, 8 ko sa gasa turu ko sa podalai rerege gu beto sa tutiria tome pa kakabarena zelepade sira karu. Ko sa rerege, sa sosoqolo beto sa kole vatarasaea isa sa na Tamasa. 9 Ko ira na minete tinoni sa qai batiadia tu sa na kole reregena isa beto isa vei sa kole vatarasaea na Tamasa isa. 10 Beto qai dogoro vatavagigaliadia ira sa isa tugu sa na tinoni sa kokole toqo tetepa kakabarena zelepade pa Atakamana Babatajonga. Ko qai gabara betonia ira sisa vei sa taroiti tana.

11 Ego ko totonai sa korapa aru tamana tadira Pita i Jone sa na tinoni sa tasalana api, poni sa ira doru tinoni sa qai abutu vavaikamu lao tadira kue pa ia ketakoi qai gigalania na Susuverena ti Solomone, ko qai gabara beto pudaladia sira doru. 12 Ko totonai sa batiria i Pita sira na minete tinoni qai vavaikamu, sa sa paranga lao tadira, pira sau, <<Ka visa tinoni Izireli tavitiqu! Ai sa vei ko qu gabarania tu agou sa na ginugua api? Ai vei ko qu dogoro tari veinigei kale tu na mei neqi babi na mei pangagana na Tamasa agei karu sa sa tasalanania ko sa rerege sa na tinoni api? 13 Na Tamasa tadira Ebarahami i Aisake beto i Jekopi, isa na Tamasa tadira na boko tamada pa moa, sa sa tei valavatia tu si Jisu na ona nabulu, isa agou tugu qu loa laonia tana qavuna ko sa tavamate. Ko qu kilu palenia agou sisa pa moena i Paelati, totonai sa nyorogua ruvatia isa. 14 Agou tugu sa qu kilu palenia na tinoni liosona beto na tuvisina, goto qu tepaia tu agou tai Paelati sa na tinoni vavarivai ko sa taruvata vanigou sisa. 15 Na kutana na toa sa qu vamatea agou, ba isa tugu sa na Tamasa sa tei vaturu mulea tu pa mate. Ko pa ona turumule isa sa agei sa na tinoni qe batia ko kopira qe korapa vavakatonia na veveina. 16 Ko pa vinasosotona na isongona isa sa sa tavaneqi bei sa na tinoni qu batiamiu beto qu gigilaimiu api. Ko koko vei pa rangena gu na isongona isa sa sa tasalana vatale sa na tinoni pa moemiu agou doru api.

17 Ba, ka visa tavitiqu, qa gigila vataleaqua ara sa pa rura gu qu roitinia agou beto ira na tinoni qai mamatanigou sa na ginugua aipira. 18 Na Tamasa sa vagore votua sisa vei sa tei pojai tu perangana tadira doru tinoni kokorotai na veveina mina gosoro vitigi vei tugu inara sa na ona Karisito sau. 19 Ko kopira mu loa paleria sira na miu sela ko mu gabala lao tana Tamasa, ko isa mina taleosonigou. 20 Ko muna vei agou poni sa ira na totoso minere pa tapata sa mai lame vei tana Bangara ko mai tavakopele sira na bulomiu, beto mina garunu lamenia sa na Karisito sa tei uduku vanigou tu agou, isa i Jisu. 21 Ba mina suvere mai pa noka sisa tinganai mina kamua mai tu sa na totoso mina vakorega beiria doru sakasava na Tamasa, isa vei sa tei pojai pa moa tu isa tadira na ona tinoni kokorotai madidi. 22 Ura pira sa tei paranga vei tu si Mosese, <Kai tinoni kokorotai vevei ara sa mina vaturua na Bangara na miu Tamasa, ko na tinoni isa sa kame pa tavitimiu sosoto agou. Isa sa muna vatabea agou pa doru sakasava vei pori vei minagunigou isa. 23 Isa na tinoni minake vatabea sa na tinoni kokorotai isa sa mina tapikata pale sosoto tadira na tinoni tana Tamasa sisa,> sau.Vavanau 18.19.

24 Ko ira doru tinoni kokorotai sa podalai ti Samuela ko mi lame sa qai tei paranga vakoleniria tu sira na totoso pira. 25 Agou tu ko na tudia ira na tinoni kokorotai, ko tamugou tugu sa na taringunguti sa roitinia na Tamasa tadira na tamamiu pa moa tonai pira sau ti Ebarahami, <Ko pa kai tutimu ao sa mana mananiria ara sira doru pupuku tinoni pa kasia gusu,>Popodalaina 22.18; 26.4; 12.3; 18.18; Qelesia 3.8. sau. 26 Ko tamugou momoe mai tu sa sa garunu lamenia na Tamasa sa na ona nabulu tonai sa vaturua, ko mi mananigou tonai muna gabala loa paleria sira na miu roiti ikikeredi agou sau,>> sau si Pita.