1 Ego pa totoso ira totonai qai kubo tugu lalaodia sira qai vasosotoa na Bangara, poni sa sa pidoko votu sa kai ququmi tadira na tinoni Jiu qai parangania na paranga Qiriki. Qai ququminiria ira sira na tinoni Jiu qai parangania na paranga Hiburu,*Palu na paranga Aramaiki sa sa tagigala na paranga Hiburu. ura ira na tinoni Jiu qai parangania na paranga Qiriki sa qai tadogoro pale pa totoso ia doru rane sira na dia nanaboko rereko. 2 Poni qai kuku vaikamuniria ira ka manogarua tinoni tagarunudi sira doru tinoni qai vasosotoa na Bangara, ko pira qariguniria, <<Sake jongana sa agei mene loa pale na paranga tana Tamasa ko mene kole gu jujunonia na ia gagani na poata. 3 Ko, ka visa tavitimei, mu vileria ka vitu tinoni pa vaikorapaimiu, ira sa pugeleria na Gagala Tabuna beto na tavagigala. Ko ira sa mene udukuniria na roiti vavaiianiria na gagani na poata pira. 4 Goto agei sa mene aru totokai sa na vavara beto na roiti ninabuluna na paranga tana Tamasa,>> qarigu.

5 Ego ko qai qerania ira doru tinoni qai tutia na Bangara sa na roroqu api, ko qai vileria sira pira: i Sitivini (isa na tinoni sa togasa vaneqi pa rarange beto sa pugelia na Gagala Tabuna), i Pilipi, i Porokorosi, i Nikano, i Timoni, i Pamenasi, beto i Nikolasi na tinoni pa Anitioki, isa kai tinoni karovona sa gabala lao pa soana vinatarasae tadira na Jiu mai perangana. 6 Ko ira pira sa qai toni laoniria tadira na tinoni tagarunudi, ko qai vavaraniria beto qai vaoponiria na limadi.

7 Ko na paranga tana Tamasa sa sa tapiara lekogo doru ia beto ko na anyedi ira pa Jerusalema qai tutia na Bangara sa sake ruavo tugu motana. Na motadi ira na iama sa qai vatabea ko qai tutia sa na nongorona na Bangara.

8 Ego i Sitivini, sa pugelia na boboka beto na neqi tana Tamasa, sa sa kole roitiniria soku roiti vaivagabaradi beto na vinagigila lavatadi tadira na tinoni. 9 Ba kaki tinoni ira na somanadi pa ruma vavaikamuna tadira na tinoni qai tagigala Na Tinoni Taruvatadi sa qai podalai vaigua lao ti Sitivini. Ira na tinoni Jiu pira sa na lame veidi pa Sairini, pa Alekezadaria, beto pa pikata gugugusu pa Silisia beto pa Esia. 10 Ba qaike boka kolosia ira sa na gigalai beto na neqi tana Gagala sa isongia i Sitivini totonai sa paranga. 11 Ko qai mavo tabara golomoria sira kaki tinoni ko pira qarigu, <<Qe nongoriamei agei sa sa kole poja vivikeria na tinoni ina si Mosese beto na Tamasa,>> qarigu.

12 Ko pa soana vei isa qai vatagigiriria sira na tinoni, na iviva mamata beto na tinoni qai vaivagigalainia na Vavanau ti Mosese, ko qai lame aru tamania ira si Sitivini ko qai toni laonia pa kauniseli tadira na Jiu. 13 Beto qai tekuria sira na tinoni mai vavakato seseke, ko pira qarigu, <<Na tinoni api sa sake beto tugu poja sasaea sa na zelepade madina api beto ko na Vavanau ti Mosese. 14 Ko qe nongoriamei tugu agei sa pira sau sisa, <Isa i Jisu na tinoni Nazareti api sa kode mina jegara palea sa na zelepade api beto ko mina bei paleria sira na uana tututi i Mosese tu sa vakarovo lame vanigita gita,> sau,>> qarigu.

15 Ego ko totonai sa qai do tari vatotogasia ira doru qai somana toqo pa kauniseli si Sitivini, ura na isumatana sa sa kabere vei na isumatana na mateana.