1 Ego ko qai nongoronia ira na tinoni tagarunudi beto ira na tinoni pa Jiudia qai vasosotoa na Bangara sa na veveina ira na tinoni karovodi qai teku vakatapia sa na paranga tana Tamasa. 2 Ko totonai sa mule sae pa Jerusalema si Pita, poni sa qai talea ira qai vaporeveveinaia na pobe sisa. 3 Pira qarigunia sisa, <<Ao sa qu lao suvere tadira qaike tapobe beto ko qu teteku tavitiria ira sao,>> qarigunia.

4 Poni sa podalai paranga si Pita ko sa kilipuputu vaniria sira na sakasava vei qai taroiti. Pira sauniria, 5 <<Totonai qa korapa vavara pa gugusu pa Jopa sara, poni sa qa dogoria sa kai dodogoro. Qa batia ara pa dodogoro sa kai sava lavata sa vevei kai poko rerevatana lavata sa sa titi gore lagerenia ka made uquna, sa koko lagere vei pa noka ko sa lagere toga pa kekerequ ara. 6 Qa dogoro viviloto vatalea poni qa batiria pa leona sira na manugu mamade nenedi pa peso, na manugu qai gavere beto qai gotolo, beto ira na manugu qai tatava pa gagale eqa. 7 Beto qa nongoria ara sa kai ovovele pira saunisiu, <Pita, mu turu! Kubolo ko mu teteku!> saunisiu.

8 Ba qa paranga sara, <Tapata jola, Bangara! Ura oqoro isongo pore kai sakasava sa paji babi sake lioso vevei pira sa sa tei kura mai tu pa mangaqu sara,> qau.

9 Poni sa na vinarua totoso sa paranga lagere vei pa noka sa na ovovele, <Ira na sakasava sa tei valiosoria tu na Tamasa, sa ao muke vapajiria,> sau. 10 Ko kue totoso sa sa roiti vei inara beto sa sa tateku vaiolo mule sae pa noka sa doru sakasava.

11 Ko pa totoso tugu isa sa ira kue tinoni sa qai tei turudia tu pa moena na atakamana ruma qa korapa suveria ara; ira sa qai tagarunu koko pa Sizaria ko qai lame nyaqosiu ara. 12 Beto sa pojanisiu na Gagala Tabuna sara ko munake ruarabeke goto mu gore gu ko mu tutiria saunisiu. Ko ira ka vonomo tavitiqu qai vasosotoa na Bangara aipira sa qai somana tutisiu tugu vei ara, ko qe lao kamu ko qe tome sa pa ruma ti Koniliasi. 13 Ko sa ule vanigei isa sa vei sa batia isa kai mateana perangana qi turu pa nona ruma beto pira qiunia, <Mu garunu laoniria pa Jopa sira kaki ko mai kuku valamea si Saimone, kai isongona si Pita. 14 Ko isa mina vavakato vanigo sa na nongoro vei beto muna taalo sao beto doruna na mua tatamana,> qiunia.

15 Ko totonai qa korapa podalai paranga ara, poni sa gore gu tadira sa na Gagala Tabuna, vei puputa tugu totonai sa gore tadagita pa popodalaina. 16 Qa roroqu kamua ara sa na paranga tana Bangara, isa pira sau, <I Jone sa sa vaipaputaisonia na kolo, goto agou sa muna tapaputaisonia na Gagala Tabuna,> sau. 17 Ko vei kai muqisi vaivana tugu isa sa vanigita gita totonai taqe vasosotoa na Bangara i Jisu Karisito sa sa vaniria tugu sira, poni sa i sei sara ko ba kole susulai sa na Tamasa?>> sau si Pita.

18 Ego ko totonai qai nongororia sira na sakasava pira, poni sa qaike vagala sira goto qai vatarasaea gu sa na Tamasa, pira qarigu, <<Koi, sosoto tugu! Ira na tinoni karovodi ba na Tamasa sa vaniria tugu na lolomo ko mai gabala ko mai tekua sa na toa,>> qarigu.

19 Ego ko ira na tinoni qai okoto taqaqata pa ngangangulu sa poraka votu totonai sa tavamate i Sitivini sa qai okoto tapipiara ko kaki qai kamu tu pa Poinikia, pa Saeparasi, beto ko pa Anitioki. Ko qai vavakatonia lekogo ira sa na nongoro, ba qaike vavakato sa tadira na goto tinoni, goto tadira na tinoni Jiu gu. 20 Ba koledia sira kaki tinoni pa Saeparasi beto pa Saerini qai vasosoto, ko ira sa qai lao pa Anitioki ko qai vavakatonia beto qai taraenia tugu vei tadira na tinoni karovodi sa na nongoro jongana na veveina i Jisu na Bangara. 21 Ko na neqi tana Bangara sa sa somana tadira, ko na motadi sira qai vasosoto ko qai gabala tutia na Bangara.

22 Ego ko na nongorodi ira pira sa sa kamu tu pa ekelesia pa Jerusalema, ko qai garunia ira si Banabasi ko sa gore pa Anitioki. 23 Ko totonai sa gore kamu pa Anitioki si Banabasi, sa sa batia sa na roiti vairoqu tana Tamasa tadira na tinoni, ko sa qera jola sisa ko sa sovutu vaneqiria sira doru ko maike munyala goto mai togasa vanabu tana Bangara sauniria. 24 Ura kai tinoni jongana tugu beto sa tavapugelenia na Gagala Tabuna beto na rarange si Banabasi. Ko na motadi sira na tinoni qai tavagabala lao tana Bangara.

25 Ego beto sa sa jola lao tu pa Tasosi si Banabasi ko sa riu nyaqoa si Saula. 26 Ko totonai sa batia si Saula, poni sa sa toni laonia pa Anitioki. Ko kai aoro doruna sa qai suvere tavitiria sira na ekelesia ketakoi beto qai vaivagigalai tadira na minete tinoni ketakoi. Ko pa Anitioki tugu sa ira na tinoni qai tutia i Jisu sa qai tagigala momoe na tinoni Kirisitiani.

27 Ego ko pa totoso tugu ira sa qai taloa pa Jerusalema sira kaki tinoni kokorotai ko qai gore pa Anitioki. 28 Ko kame ira, na isongona i Aqabasi, sa sa turu ko sa poja vakakaberia isa pa neqi tana Gagala sa na veveina na songe lavata mina raja pa kasia gusu doruna sau. (Ko na songe isa sa sa raja pa totoso sa korapa kuta bangara pa Romu i Kolodiasi.) 29 Ko qai vaivaegonia ira na tinoni tana Bangara pa Anitioki sa kai roroqu, ko isa vei qai bokai sa mai okoto vakole kalea sira na tinoni ko mai vasae vaniria ko mai tokaniria sira na tinoni tana Bangara qai suvere pa Jiudia qarigu. 30 Ko qai vagore votua tugu sa na dia roroqu, ko qai vapogosoniria ira Saula i Banabasi sa na dia vaivana ko qai sae vaniria sira ka visa iviva pa Jerusalema.