1 Ego ira kaki na koko veidi pa Jiudia sa qai gore pa Anitioki ko qai kole vavaivagigalainia tadira na tinoni qai vasosotoa na Bangara sa pira qarigu, <<Vei munake tapobe sagou vei sa pojai na tuti ti Mosese, sa munake taalo sagou,>> qarigu. 2 Ko sa pidoko votu sa kai vaigua na vaigeso lavata pa vaikorapaidi ira Paula i Banabasi beto ko ira na tinoni ira. Poni sa qai vileria sira Paula i Banabasi beto vei tugu ira kaki tinoni tana Bangara pa Anitioki ko mai saenia tadira na tinoni tagarunudi beto na tinoni mamata pa Jerusalema sa na ginugua api qariguniria. 3 Ko totonai sa garunu variuria na ekelesia sira aipira, poni sa qai rerege vei pa Poinikia beto pa Sameria, ko qai kilipuputu vaniria ira pa gugusu pira sa na veveina na gabala tadira na tinoni karovodi lao tana Tamasa. Ko qai qeqera jola sira na tinoni qai vasosotoa na Bangara.

4 Ko totonai qai kamu pa Jerusalema sira, sa qai tavatoga vatale tadira na ekelesia, tadira na tinoni tagarunudi, beto ko tadira na tinoni mamata sira. Beto ko qai ule vaniria ira na ekelesia sira vei sa roitiniria na Tamasa pa dia rerege roiti tadira na tinoni karovodi. 5 Ba ira kaki tinoni na somanadi pa puku minete tadira na Parese qai vasosotoa na Bangara sa qai turu ko pira qarigu, <<Ira na tinoni karovodi sa mai tapobe tugu, beto ko mai tapojaniria ko mai tutia tugu ira sa na Vavanau ti Mosese,>> qarigu.

6 Ko qai vaikamu sira na tinoni tagarunudi beto na tinoni mamata, ko qai doria sa na ginugua api. 7 Qai dori kole vaiguania ira sa na ginugua api, beto sa sa turu si Pita, ko pira sau sa tadira, <<Ka visa tavitiqu, agou sa qu tei vakaberiamiu tu pa visa tu pira sa na Tamasa sa tei vilesiu tu sara. Ko pa vavakato taqu qai nongoria na nongoro jongana ko qai vasosoto sira na tinoni karovodi. 8 Ko na Tamasa isa sa boka tiroa na bulo tinoni sa sa ule votunia sa vajonganai tugu vei sisa ko sa vaniria na Gagala Tabuna vei puputa sa vanigita gita. 9 Sake doro vagotogita na Tamasa sa gita beto ko ira, ko totonai qai vasosoto sira poni sa valiosoria gu sa na bulodi. 10 Ko kopira ai sa vei sa qu korapa podekia na Tamasa, ko qu vapapaniria kai pogoso mamata lavata sira qai tutia na Bangara? Na pogoso mamata isa sa ira tu na tamada pa moa beto gita tu ba tanake boka pogosia. 11 Goto gita ba pa vairoqu vaialona gu ti Jisu na Bangara sa taqe taalo tonai taqe vasosoto, kai muqisi podeke vei tugu qai vei ira pira,>> sau si Pita.

12 Beto qai podalai paranga sira Banabasi i Paula. Ko ira na minete tinoni sa qaike vagala totonai qai kole nonongoro tadira Banabasi beto i Paula qai kilipuputu vaniria sa doru roiti neqidi na vaivagabaradi sa roitiniria na Tamasa tadira na tinoni karovodi ketakoi qai lekogo roiti vei ira karu.

13 Totonai qai beto paranga ira karu, sa sa paranga si Jekopi, <<Ka visa tavitiqu, mu vainongoro lame! 14 I Saimone sa koni vakaberia gu sisa vei na Tamasa sa roroqua ko sa teku votunia tadira na tinoni karovodi sa kai minete tinoni ko mai valavatia sa nisongona isa. 15 Ko kopira sa lao totoa gu sira na paranga tadira na tinoni kokorotai, isa pira sau,

19 Ko na roroqu taqu sa take vaniria mule kaki tapata sira na tinoni karovodi qai korapa gabala lame tana Tamasa. 20 Goto ta kuti lao vaniria gu ko ta pojaniria ko maike tekuria sira na masadi na manugu qai tavavakukuvu tari lao vaniria na beku, maike toania na toa lulasana, beto ko maike tekuria na masadi na manugu qaike tavanyoa pale na orungudi beto ko maike tekua tugu vei na orungu. 21 Ura podalai pa moa vei tu sa na Vavanau ti Mosese sa sa kole tatarae vevela pa kubo gugusu, ura doru rane Minere gu sa sa tatitiro votu pa ruma vavaikamuna sisa,>> sau si Jekopi.

22 Ego ko qai vaikamu ko qai vaivaegonia ira na tinoni tagarunudi, na tinoni mamata, beto na ekelesia doruna, sa mai vileria sa kaki tinoni tugu ira ko mai tutiria sira Paula i Banabasi qarigu. Ko qai vileria ko qai garunu vatuti goreniria ira Paula i Banabasi pa Anitioki sira karu tinoni mamata tugu tadira na tinoni tana Bangara: ira Jiudasi isa qai kukunia i Basabasi, beto ko i Saelasi. 23 Ko na leta qai kutia beto qai vaaru pogosoniria ira sa pira sau,

30 Ego ko totonai qai loa variuria poni sa qai gore pa Anitioki sira, ko qai vaikamuniria sira na minete tinoni tana Bangara beto qai vakarovo vaniria sa na leta. 31 Ko pa liguna qai tiro votunia sa na leta sa qai qera jolania ira sa na paranga vaivaneqi isa. 32 Ira Jiudasi i Saelasi ba na tinoni kokorotai tugu ko qai dori paranga vamanotoria beto qai vaneqiria sira qai vasosotoa na Bangara ketakoi. 33 Pa liguna qai suvere iapeki totoso ketakoi, sa qai loloa variuria pa bule ira na tinoni qai vasosotoa na Bangara ketakoi ko qai mule riudia tadira qai garunu valagereria.*Na pikata 34 sa sake takuti pa kukuti leludi. Kaki kukuti liligu qai vatomea na pikata 34 sa pira sau, <<Ba i Saelasi sa nyorogua suvere jolaona tugu ketakoi, ko i Jiudasi gu sa sa mule riu.>> 35 Ba ira Paula i Banabasi sa qai suvere sovaidia mai tugu pa Anitioki (beto vei tugu ira kaki mule), ko qai kole vaivagigalainia beto qai kole vavakatonia sa na paranga tana Bangara.

36 Ego sa sovai iapeki sa sa paranga lao ti Banabasi si Paula, <<Aria ta gabala ko ta riu ovikiria sira na tinoni qai vasosotoa na Bangara doru eqa ketakoi taqe taraenia na paranga tana Bangara perangaina, ko ta dororia ai beka qai korapa veveigadia moko,>> sau. 37 Poni i Banabasi sa nyorogua tonia si Jone, isa kai isongona i Maka. 38 Ba i Paula sake doro vapadania ko mina tonia sisa sau, ura na totoso momoe sa isa sa loa paleria pa Pamipilia ko sake tutiria riu pa roitina.

39 Ego ko sa neqi sa na vaitoke tadira karu, ko qai okoto vaipikatai tu sira karu. Ko i Banabasi sa tonia si Maka, ko qai toka lao vei tu pa nusa pa Saeparasi. 40 Goto i Paula sa vile tekua si Saelasi, ko pa liguna qai vakole laoria pa vairoqu vaialona tana Bangara ira na tinoni qai vasosotoa na Bangara ketakoi sira karu, poni sa qai taloa riu. 41 Ko qai lao vei pa Siria beto pa Silisia sira karu, ko qai kole vaneqiria sira na tinoni pa ekelesia.