1 Ego ko sa tavatuvisi sa mene toka lao pa Itali sagei qarigu. Ko i Paula beto kaki ira na tinoni tapiudi sa qai loa laonia pa kopu ti Jiuliasi, isa kai tinoni mamata gogoto pa kai puku minete vaipera tana kuta bangara pa Romu. 2 Ko qe koi sagei pa kai vaka koko veina pa Adaramuteni ko sa korapa vatana ko mi toka lao vei tinganai vei ole pa Esia sau, ko qe toka riu. Ko sa tutigei tugu agei si Arisitakosi, na tinonina pa gugusu Tesalonika pa ia pa Masidonia.

3 Sa rane neqa sa qe lao paro pa Sidoni. I Jiuliasi sa vajongana lao sa ti Paula, ko sa vamalumia gu ko mina boka paro dogororia sira na ona baere ko mai boka iai pa kaki sakasava bi nyoroguania isa sau. 4 Totonai qe taloa pa Sidoni poni sa sa raja koimoagei sa na gava, ko qe rerege vapae vei tu pa nusa Saeparasi. 5 Ko qe katapa vei tu pa kale Silisia beto pa Pamipilia sa qe toka karovia sa na kolo lavata, ko qe gore paro pa gugusu pa Mura pa ia pa Lukia. 6 Ketakoi sa bati vaia na tinoni mamata gogoto sa kai vaka Alekezadaria sa korapa mi toka lao vei pa Itali sau, ko sa vakoigei mule pa vaka isa. 7 Qe toka mamavo lao na soku rane beto ko pakona beto qe paro pa kekele pa Kinidasi. Na gava sa dori neqi ko qeke boka toka vatuvisi lao, ko qe gabala vapae gore vei gu pa nusa Kiriti ko qe katapa vei pa kekele Salamone. 8 Qe babata kaurai pa nusa Kiriti ko pakona beto qe kamu sa pa kai ia na isongona pa Koqu Bulena tata pa gugusu pa Lasaia.

9 Ego ko qe dori suvere sovai mai tu ketakoi sagei ko sa kamua gu sa na totoso sa tapata mai lekogo na vaka, ura na rane vavakukuvu vuvulasa tadira na Jiu sa tei jola tu ko sa kamua gu sa na totoso rane bongi. Ko sa parangaria i Paula sira, 10 <<Ka visa tavitiqu, ara qa doria sa kode mina kolea na tapata sa na rerege tadagita beto soku sakasava tana aru vikereria. Ko nake susurana gu beto na vaka sa kode tana nganguluria, goto na toa tugu tadira na tinoni vei,>> sau.

11 Ba na tinoni mamata gogoto sake vasosotoa sa na parangana i Paula, goto na kapini beto na tinoni poreona vaka tu sa sa nongororia. 12 Na koqu tititina api sa nake ia jongana mina kole vera vajolania na totoso lomoso. Ko na kubodi ira na tinoni sa qai nyoroguania tugu ko bai taloa rijo tugu pa ia isa ko vei bi boka sa bai lao vajolai na totoso lomoso pa Poinikisi, ura kai koqu tititina pa nusa Kiriti sa sa bata kaurai vei pa kale suvu tapo sa ketakoi qarigu.

13 Ego ko totonai sa podalai ivu mamavo turu vei pa kolo pa kale kauraina na nusa sa na gava, poni sa qai roroqua palu mene boka gu toka lao sagei qarigu, ko qai kaoa sa na titi beto qe mavo babata kakatapa pa nusa pa Kiriti. 14 Ba oqoro sovai, poni sa sa bei mutu sa na gava ko sa turu kokorapa vei mutu pa kale sagere tapo beto pa narena na nusa sa na gava ranebongi. 15 Ko sa pogoso vapirua na gava sa na vaka, ko qe vaipera ko be vakole veinia pa koimoa sa na gava qeu ba qeke boka poni sa qe loa pale gu ko qe kole gu vapopogosonigei na gava. 16 Totonai qe katapa vei pa kai nusa ikete na isongona Kauda, poni sa pakona beto qe surana vamauru vatalea sa na tiqina na vaka. 17 Pa liguna qai ovulu surania ira sa na tiqi, poni sa qai piko pilu vamauru vaililivutainia na gasoro sa na vaka. Beto ko qai matagutunia kita mi lao gona papara pa bobole nagasa pa kolona pa babatana pa Libia sa na vaka qarigu, ko qai vagorea ko sa ragatia na vaka sa na titi beto sa qe vatutinia gu na gava sa na vaka. 18 Sa koi vei neqina sa na gava ko sa iru lao lamenigei, poni sa rane neqa sa qai podalai gogona vole paleniria sa kaki susurana pa vaka, 19 beto na rane vinaue sa qai gona vole paleniria sa kaki sakasavana na vaka. 20 Na tapo beto na seru sa qaike isongo tabata podeke, beto na ranebongi sa rajagei agei sa sake isongo mako gore, ko doru mei rorove vei mene taalo sa qai puju betodia gu sa totonai.

21 Ego ko pa liguna kubo rane ko qai oqoro tugu ganiadia pu gania sira na tinoni, poni sa turu pa moedi ira si Paula, ko sa paranga, <<Ka visa tavitiqu! Vei bu nongorosiu ara ko tabeke taloa pa nusa Kiriti sa gita, poni sa tabeke gosoria gita sa na tapata api beto tabeke gona pale vivikereria sira na sakasava. 22 Ba kopira qa tepagou ara sagou ko mu varene pa roroqu! Kepore kame agou sa mina saivia nona toa, goto na vaka gu sa kode mina tapiara. 23 Ura pa bongi gu sa jola ina, sa sa lame turu tata taqu sa kai mateana tana Tamasa, isa na Tamasa sa isongosiu beto ko qa nabulunia ara, 24 ko pira saunisiu, <Paula! Muke matagutu, kode pa moena tu i Siza muna lao turu sao! Beto ko na Tamasa sa vasare vanigo ao sira doru qai koi tavitigo ao,> saunisiu. 25 Ko mu varene sagou, ka visa tavitiqu! Ura ara na qua vinasosoto tana Tamasa sa kode mina gore votu vei puputa tugu isa sa ule vanisiu isa. 26 Ba kode mina pogoso vapaparagita tugu na gava pa kai nusa pa peso sa gita,>> sau si Paula.

27 Ego ko sa kamua na bongi vinamanogamade sa kole pogoso lao lamenigei na ranebongi pa kolo Adiria ko sa tata vei pa korapa bongi, poni sa qai rorove sira na tinoni roiti pa vaka palu taqe tei ole paro tu pa abana sa gita qarigu. 28 Ko qai vadururu gorea sa kai gasoro sa tapikonia kai mamata pa kai uquna, poni sa qai gigilai sa sa rabeteputa savanga na lilisi gorena sa na kolo. Sa oqoro sovai poni sa qai vagorea mule sa na papadana poni sa qai gigilai sa manogalima savanga na lilisi gorena sa na kolo. 29 Ko qai matagutu kita me kole ole papara pa kaki ia papatuna qarigu, poni sa qai vagoreria pa tatava sa ka made titi beto sa qai kole vavara ko bi sisiqarai tu rane qarigu. 30 Ira na tinoni roiti pa vaka sa qai matagutu ko mai uku loa pale sa na vaka qarigu, ko qai vagorea pa ivere sa na tiqi beto sa qai kole roiti seseke vei mai vagore titi pa kale koimoa qarigu. 31 Poni sa paranga lao tana tinoni mamata gogoto beto ira na solodia si Paula, <<Vei maike suvere pa vaka sira na tinoni roiti aipira, poni sa kode munake boka tavasare sagou,>> saunia. 32 Poni qai lao tu ira na solodia ko qai koroto paleria sa na gasoro qai pikoni tiqi ko qai vaole palea sa na tiqi.

33 Ego ko totonai sa tata na rane poni sa sa garunuria i Paula sira doru ko mai mekarai teteku mai sauniria. Ko pira sauniria sira doru, <<Pa ngeni api sa na vinamanogamade raneda taqe kole vera sa gita, beto ko agou qu oqoro isongo tekua kai sa. 34 Ko sa vei sa qa tepa vivitigigou ara sagou ko mu somana teteku, ura muna vei tugu agou sa kode minake apulugou kai sa. Kode kepore kame agou sa mina saivia kai memeka lili vurungu pa batuna,>> sauniria.

35 Ko totonai sa beto paranga vei inara si Paula, poni sa tekua sa na bereti ko sa paranga jongana laonia tana Tamasa pa moedi ira doru, sa kipai beto sa tekua. 36 Poni qai tavaneqi sira doru ko qai somana teteku. 37 (Agei doru qe koi pa vaka sa agei karu gogoto vitungavulu vonomo.) 38 Pa liguna qai teteku vapote vatale, poni sa qai gona vovoleniria sa na vuiti sa tasurana pa vaka ko mi kopele na vaka qarigu.

39 Ego totonai sa koni sae sa na vovola rane, sa qaike dogoro pikatia ira na tinoni roiti pa vaka sa na ole poanana ketakoi, ba qai dogoro vaia sa kai koqu nanagasana ko vei mai boka sa ketakoi gu sa mai gore vapapara pale sa na vaka qarigu. 40 Ko qai maja rarabutu vadururu paleria pa kolo sa na titi, qai ruvata paleria sa na gasoro piko tarina na qelu tana gaiti, beto qai kao vasaea pa gava sa na tepe koimoa ko qai gona totoa gore sa na paparona. 41 Ba na vaka sa gore jule makelenia pa kai bobole nagasa pa kolona, ko na koimoana na vaka sa sake kanoko goto na voloso tatavana sa qai taloloku taria ko qai pipiaria na tovogo lalavata.

42 Ira na solodia sa qai roitinia sa kai roroqu ko mai vamate paleria sira na tinoni tapiudi qarigu, ura kita mai oqa paro ko mai uku riudia qarigu. 43 Ba na tinoni mamata gogoto sa nyorogua vasarea si Paula ko sa vanosoria ko qaike roitinia sa na roiti isa. Goto sa garunuria sira qai boka ponyu ko mai oqa momoe ko mai ponyu gore paro pa peso, 44 goto ira na suvere joladi sa mai aleria kaki papene babi na papene kakalesena na vaka beto mai ponyu tuti gore sauniria. Ko inara qai vei poni sa beto qai soni kamu vatale beto pa peso sira doru.