3
I Jisu sa poreveveina jolania i Mosese
1 Ko inara sa vei sa, ka visa tinoni tana Tamasa, agou sa sa tei sorugou tu na Tamasa! Mu dogoro vatogasia si Jisu isa sa garunu lagerenia na Tamasa ko isa sa na kuta iama lavata sa tokanigita pa noda vinasosoto. 2 Isa sa rangea na Tamasa sisa ko sa vei sa na Tamasa tu sa vilea sisa ko sa roitinia sa na roiti alepi, kai muqisi podeke vei i Mosese ba sa tarange pana ona roiti tolidi ira na tinoni tana Tamasa. 3 Na tinoni sa roitinia na ruma sa sa tadoro vaporeveveina jolania na ruma sa roitinia isa. Ko pana soana vei isa sa i Jisu ba sa tadoro pada jolania si Mosese. 4 Sa sosoto tugu sa dorudi na ruma sa koledia tugu sira na tinoni qai roitinia, ko na Tamasa sa isa sa roitinia doru sakasava. 5 I Mosese sa kai tinoni tarangena pana ona nabuluna na Tamasa, sa vei na nabulu sa roiti vatale vania nona bangara; ko na ona roiti sa uduku lao momoeria sira na sakasava qi poja liliguria na Tamasa na veveina i Jisu. 6 Ba na Karisito sa na tinoni tarangena sa vei na tuna marene sa kopu vataleniria sira na tinoni tana Tamasa. Ko gita sa na tinoni tana Tamasa, vei tana aru tamana vamauru pana oda vinasosoto neqina taqe isongia tonai taqe korapa kukuliniria na sakasava qai korapa lame pa moeda.
Na minere tadira na tinoni tana Tamasa
7 Ko sa vei isa sa pira sau sa na Gagala Tabuna pana Kukuti Tabuna,
<<Pa ngeni api sa tonai muna nongoria na ovovelena na Tamasa, poni sa pira sau sa na Tamasa,
8 <Muke vaduduvilia na bulomiu qai vei ira na miu tite qai daidia vatabesiu sara
tonai qai podekesiu tonai qai korapa pa qega.
9 Ketakoi sa qai podekesiu soku totoso ara sira na miu tite,
ba qai batiadia ira sira na roiti qa roiti vaniria ara pa korapana madengavulu aoro ba qai kilunisiu tu.
10 Ko qa kokoraniria ara sira na sasae tinoni pira ko pira qau:
Qai kilunisiu ara doru totoso beto ko qai dainiadia vatabea na soana tuvisi taqu sa aipira.
11 Ko maike isongo tomea ira sa na ia miminerena qa vanaqiti vakole vaniria ara, qau sara.
Qa maulu vakole vei inara sara ura qa tagigiriniria,> sau sa na Tamasa,>> sau sa na Gagala Tabuna.Kera Vinatarasae 95.7-11.
12 Ka visa tavitiqu, mu vabalau sagou kita kame pa vaikorapaimiu agou mi kolea na roroqu ikeredi ko mike vasosoto beto ko mi gabala loa pale sa na Tamasa toana. 13 Goto isa tu sa poreveveina jola sa mu mekarai paranga vaivaneqi lao lame doru rane sagou tonai sa korapa koleona sa na rane <<Pa ngeni.>> Ko muna vei agou sa kode minake boka toni vapirugou na miu sela qu roitiniria beto minake duduvili na roqumiu sagou. 14 Ura gita sa na tinoni taqe somana isongia sisa vei sa roiti vanigita na Karisito podalai tu tonai taqe vasosoto pa podalaina ko mina kamua na vinabebetona noda toa.
15 Tonai sa paranga sa na Kukuti Tabuna,
<<Pa ngeni api sa tonai muna nongoria na ovovelena na Tamasa,
sa muke vaduduvilia na bulomiu qai vei ira na miu tite qai daidia vatabea sa na Tamasa,>> sau.Kera Vinatarasae 95.7-8; Giburu 3.7-8.
16 Poni sa ira sei sira na tinoni qai nongoriadia sa na ovovelena na Tamasa ba qai daidia tugu vatabea sa na Tamasa? Ira doru tinoni tugu qai batia na neqi tana Tamasa tonai sa toni votuniria pa Ijipi i Mosese ke! 17 Ira sei sa kole tagigiriniria ka madengavuluputa aoro na Tamasa? Ira tugu qai vukele pa sela ko na vuana sa qai mate tugu pa qega. 18 Ko tonai sa maulu sa na Tamasa ko <<Maike isongo tomea ira sa na ia miminerena qa vanaqiti vakole vaniria ara>> sau, poni sa ira sei sa saunia isa? Ira na tinoni Izireli tugu qai daidia vatabea isa ke!Kera Vinatarasae 95.11; Giburu 3.11; Anye 14.22-23. 19 Ego ko kopira taqe bati vatalea sa na ginuana qaike boka tomea na ia miminerena ira sa ura qaike vasosoto gu ke!