1 Ko sa vei isa sa aria gita ko ta rerege vatuvisi lao ko ta tekuria na vaivagigalai sa padadi ira na tinoni qai matua, ko take kole gu kai muqisi pojaria sira na nongoro qai vagigalai momoenigita na veveina na Karisito. Sake pada ko tana kai vaivagigalainiria mule gita sa na veveina na tinoni mina gabala pana roiti qai roitinia ira sa mate na gagaladi, na veveina ai soana vei mina rangea na Tamasa na tinoni, 2 na vaivagigalaina na veveina na paputaiso beto na vavaoponiria na lima ira qai vasosoto, beto na veveina na turumule pa mate beto na vaipitu bebetona tana Tamasa. 3 Goto aria ko ta rerege vatuvisi lao tu pa vaivagigalai matuana! Ko pira tana roiti vei sa gita vei mina vamalumugita na Tamasa. 4 Ura sa tapata jola na vagabaladi sira qai loa pale na dia rarange. Qai tei batia mai tu ira sa na kabere tana Tamasa, qai tei valilingia tu ira sira na vaivana qai lame vei tana Tamasa, qai somana isongia sa na Gagala Tabuna, 5 qai valilingia ira sa na nongoro jongana tana Tamasa, beto qai tei vagigilai tu ira sa na neqi tana totoso tonai mina bangara sa na Tamasa vuka risa. 6 Ba beto qai loa pale tu na dia rarange tana Karisito. Sa tapata jola na vagabaladi sira, ura na roiti qai roitinia sa sa vei qai kai vamatea mule ko qai kai vatiti vakekea palenia mule ira pa korosi sa na Tuna na Tamasa. 7 Ego na peso sa bukua na okoro sa gorea beto ko sa vatoa vatale vaniria na umuma jojonga sira qai umuma, poni sa mina somana tekua tugu na mana tana Tamasa sa na peso isa. 8 Ba na peso sa vapidokoria na gasoro vavaioka beto na buburu pirudi sa sa kepore na ona vaitokai. Ko na peso isa sa kode mina gosoria na leleve tana Tamasa beto mina piara pale niku sisa.

9 Ka visa qua baere jonga, qe paranga vaneqi vei pira sagei, ba qe gigila vataleamei agei sa na soana poreveveina jola qu isongonia na mana agou, ko na mana isa sa na veveina qu taalo sagou. 10 Na Tamasa sa tutia na tuvisi tonai sa vaipitu, ko kode minake doro paleria isa sira na roiti beto na vairoroqu qu roitiniria agou pa isongona isa tonai qu tokaniria perangana beto ko kopira ba qu korapa tugu tokaniria sira na tinoni tana Tamasa. 11 Qe nyorogua vivitiginia agei sa muke vamako gorea sa na miu ngangali tinganai mina kamua na vinabetona na miu toa, tonai mai gore votu sira na sakasava qu korapa vera vataleniria. 12 Qeke nyoroguania agei ko bi mako gore sa na ngangalina na miu toa rarange, ba qe nyoguania ko mu toa vei ira qai vasosotoa na Tamasa beto qai vera vamomoso, ko pana soana vei isa sa qai teku isongia ira sisa sa taringunguti vakole vaniria na Tamasa.

13 Tonai qi roitinia na Tamasa sa na ona taringunguti pana tai Ebarahami sa sa kepore mule sa kame bi neqi jolania na Tamasa, ko na Tamasa qi maulu pana isongona mekana, 14 pira qiu sisa pana Kukuti Tabuna, <<Qa maulu sara ko mana mana vatalenigo ara sao beto ko mana vavuago ara sao ko mana vasokua ara sa na tutimu ao,>> qiu.Popodalaina 22.17. 15 Ko i Ebarahami qike munyala pana ona totoravusuna na Tamasa tinganai qi vagore votua nona taringunguti, ko sa vei sa qi tekua i Ebarahami sa na taringunguti. 16 Tonai bi roitinia na taringunguti neqina sa kai tinoni sa kode mina maulu sisa pana isongona kai goto tinoni sa poreveveina jolania mekana, ko totonai sa sa tavanoso sa na vaipera paranga tadira na tinoni. 17 Ko tadira mai tekua na taringunguti sa sa nyogua vakabere vatatale vaniria na Tamasa sa minake isongo beia isa sa na roquna sau, ko sa vatavitinia na maulu sa nona taringunguti. 18 Ko ira karu sakasava pira, na ona taringunguti beto na maulu, sa qaike boka bei beto na veveidi ira karu sa na Tamasa ba sake boka seseke. Ko gita taqe tavasare pana tana Tamasa sa taqe tavaneqi vatale ko tana aru tamana vamauria pa buloda sisa sa taringunguti vakole vanigita na Tamasa. 19 Ko isa taqe korapa vera vatalenia sa sa vei na titi pana oda toa. Ko isa taqe verania api sa i Jisu isa sa mauru beto sa vasaregita, beto sa tei tome lao tu pana ia madina jola pa zelepade pa noka. 20 Pana laedagita sa i Jisu sa tei tome lao momoenigita tu sa na ia madina isa. Ko sa tavakuta iama lavata kole jolana pana soana vei sa iama i Melekizedeki sisa.