1 Ego pa liguna sa vei inara, sa i Jisu sa karovo lao pa kai kalena na ovuku pa Qalili, kai isongona qai vavakukunia sa pa Tiberiasi. 2 Ko kai minete tinoni lavata sa qai kole tututia isa, ura qai tei batiria tu sira na roiti vinagigila sa roitiniria isa tonai sa salanaria ira qai mo. 3 Poni sa sagere sae pa kukubo si Jisu, ko ketakoi sa toqo tavitiria sira na ona sepele. 4 Ego ko sa tei tata tu sa na totoso vavolo Alokata tadira na Jiu.

5 Ego ko totonai sa vaengaria na matana i Jisu ko sa dogoria sa na minete tinoni lavata sa korapa lame tana, poni sa nanasa laoia si Pilipi, <<Pai sa tana boka vai gagani ko tana vatetekuria sira na tinoni pira?>> sau. 6 (Ba sa paranga vei inara sisa ko mi podekia gu i Pilipi sau, goto isa sa tei gigilaiona tu sisa mina roitinia.)

7 Poni sa oe lao si Pilipi, <<Ura vei mai okoto iqopeki gu ira doru pira ba kode mina jolania tu karu gogoto poata siliva*Kai poata siliva sa padana na tabarana kai rane roiti. Ko karu gogoto poata siliva sa padana kai aoro tabara. sa mina tavaini gagani,>> sau.

8 Azae kame ira na ona sepele, i Aduru, na tasina i Saimone Pita, sa sa paranga, 9 <<Korapa kamea lana sa kai koburu marene ka lima gana bereti beto karu gana igana, ba pa vaikamu tinoni vei pira na sa mina vagavoria sa ka visa momoqasa gagani vevei inara?>> sau.

10 Poni pira sau si Jisu, <<Ego vatoqo betoria sira na tinoni,>> sau. Na ia kubo buburuna sa ketakoi, ko qai toqo beto sira doru tinoni, na anye vaikamudi ira na marene sa sa papada vei lima tina.

11 Beto sa tekuria i Jisu sa na bereti, ko sa paranga jongana laoniria tana Tamasa beto sa ianiria na tinoni qai toqo. Beto sa roiti veinira tugu sa na igana, ko qai pote beto sira doru. 12 Pa liguna qai pote beto ira doru, poni sa parangaria sira na ona sepele, <<Mu buti vaikamu betoniria sira na gagani kole joladi, kita mai taaru vivikere goboro,>> sau. 13 Ko qai buti teku vaikamuniria sira na gagani kole taridi pa lima batu bereti qai teku tariria, ko qai vapugele nyonyoaniria ka manogarua totopa.

14 Ko tonai qai batia ira na tinoni sa na roiti vinagigila sa roitinia i Jisu api, sa qai paranga, <<Api sosoto tugu sa na tinoni kokorotai mina lame pa kasia gusu qarigunia ira,>> qarigu. 15 Ego ko totonai sa gigilai i Jisu sa qai qaqirinia ko mai lame teku vabangaria sisa qarigu, poni sa sa taloa riuona mule mekana pa kubo sisa.

16 Ego totonai sa gore na vevelu, sa qai oqa votu gore pa ovuku pa Qalili sira na sepele ti Jisu. 17 Qai koi pa kai koaka sira, ko qai toka karovo tuvisi lao pa Kepaniami. Ko sa rodomo gu sa na eqa ba i Jisu sa oqoro lame kamuria. 18 Sa podalai gu raja lame sa na gava lavata ko sa nyakili ranebongi sa na kolo. 19 Ko qai tei qelu lao tu pada lima babi vonomo kilomita souna sira na ona sepele beto qai dogoro vaia si Jisu sa korapa rerege lalameona pa kolo. Totonai sa rerege tata lame sisa pa koaka sa qai matagutu vivitigi sira. 20 Poni sa parangaria isa, <<Ara gu sapi, muke matagutu!>> sau.

21 Beto sa qai malumu surania pa koaka ira sisa. Isa tugu sa koi pa koaka i Jisu poni sa qai paro gu sa pa ia ketakoi qai gona toto laoia ira.

22 Ego ko sa rane ligu neqa poni sa qai gigilai ira na minete tinoni lavata qai suvere jola pa kai karovona na ovuku pa Qalili sa kai memekana gu sa na koaka sa titi ketakoi. Beto ko qai batiadia tugu si Jisu ba sake koi tavitiria sira na ona sepele tonai qai toka, goto ira na sepele gu mekadi sa qai koi. 23 Ba kaki koaka na lame veidi pa gugusu Tiberiasi sa qai kamu paro tata pa ia ketakoi sa manania na bereti i Jisu beto sa ianiria na minete tinoni ko qai teteku. 24 Ko totonai qai gigilai ira na minete tinoni sa sake suvere ketakoi si Jisu beto ira na ona sepele, sa qai lao koiria na koaka ko qai toka karovo lao pa Kepaniami ko qai kole nyaqoa si Jisu.

25 Totonai qai lao paro pa kai karovona na ovuku pa Qalili sira na tinoni, sa qai batia si Jisu ketakoi, ko qai nanasia, <<Rabi, pa visa tu qu kamu lani sao?>> qarigunia.

26 Poni sa oeria i Jisu sira, pira sauniria, <<Sosoto pa sosoto ma pojanigou ara sagou: isa vei beto qu korapa nyaqo tutinisiu ara sa nake vei ko qu gigilai agou na ginuadi na qua roiti vinagigila sa, goto ura sa teku jongagou gu na bereti ko qu pote vatale. 27 Nake tetekuna sake ruavo na ikerena sa mu junonia agou, goto na tetekuna tu isa sa kole jola kamua na toa jola. Isa sa na tetekuna mina vanigou na Tuna na Tinoni, ura na Tamasa Tamana sa tei vakolea tu nona vinaego sa tana Tuna,>> sau si Jisu.

28 Poni qai nanasia ira si Jisu, <<Na sa sa mene roitinia agei, ko me roitiniria sira na roiti tana Tamasa?>> qarigu.

29 Poni sa oeria i Jisu sira, pira sauniria, <<Isa na roiti tana Tamasa sa nyoguanigou ko mu roitinia sa mu vasosotoa sisa sa garunia isa sau,>> sau si Jisu.

30 Poni pira qarigunia ira sisa, <<Na roiti vinagigila ai veveina sa muna roitinia ao tamigei ko agei mene batia, beto sa mene soni vasosotogo sao? Na sa sa muna roitinia ao? 31 Ira na oda tite sa qai tekua na mana tetekuna pa qega vei sa pojai na Kukuti Tabuna, pira sau, <Isa sa ianiria na bereti sa lagere vei pa noka sira ko qai teteku,>Kera Vinatarasae 78.24; 105.40. sau,>> qarigu.

32 Poni sa pira sau si Jisu, <<Sosoto pa sosoto ma pojanigou ara sagou: nake i Mosese sa sa ianigou agou na bereti lagere veina pa noka, goto na Tamaqu tu ara sa vanigou sa na bereti sosotona sa lagere vei pa noka. 33 Na bereti tana Tamasa sa isa tugu na lagere veina pa noka, ko sa vania na toa sa na kasia gusu,>> sau si Jisu.

34 Poni pira qarigunia si Jisu, <<Bangara, mu vanigei ropi doru totoso sa na bereti isa,>> qarigu.

35 Poni sa pira sauniria i Jisu, <<Ara tugu sa na bereti toana. Isa mina lame taqu sa minake isongo burana beto isa mina vasosotosiu ara sa minake isongo kidepe. 36 Ba isa tugu vei qa tei pojanigou tugu sa agou sa qu tei batisiumiu tugu ara sagou ba quke vasosotosiu tugu. 37 Ira doru sa vanisiu na Tamaqu sa mai lame tugu taqu, ko ira mai lame taqu sa ara manake isongo tupele paleria ara. 38 Ura ara sa qake lagere vei pa noka ko mana tutia na qua nyorogua mekaqu, goto na nyorogua tu tana isa sa garunusiu ara sa mana tutia. 39 Ko na nyorogua tana sa garunusiu sa ara manake valumua sa kame ira sa tei vanisiu tu isa, goto mana vatoa mule betoria pa rane liligu. 40 Ura isa na nyorogua tana Tamaqu sa ira doru qai batia na Tuna beto qai vasosotoa isa sa mai isongia na toa jola, beto ara mana vatoa muleria pa rane liligu sira,>> sau i Jisu.

41 Poni qai podalai ququminia ira na tinoni Jiu sisa, ura pira sau, <<Ara sa na bereti sa lagere vei pa noka,>> sau. 42 Ko pira qai kole paranga vei sira, <<Qokolo, nake i Jisu na tuna i Josepa sapi? Sakeu ko taqe gigilariaoda sira na tinana na tamana! Ba ai sa vei sa paranga tu, <Ara na lagere veiqu pa noka,> sau?>> qarigu sira.

43 Poni sa oeria i Jisu sira, pira sauniria, <<Mu noso ququmi golomo mekamiu. 44 Kepore sa kai tinoni mina boka lame taqu, vei minake toni lamenia na Tamaqu isa sa garunusiu ara. Ko isa mina lame taqu sa ara mana vatoa mulea pa rane liligu sisa. 45 Pira sau sa qai kutia ira na tinoni kokorotai, <Mai tavavanau tana Tamasa sira doru tinoni,>Aisea 54.13. sau. Isa na tinoni sa nongoria beto sa vakoinonoa na parangana na Tamaqu sa sa lame taqu. 46 Nake vei ko kaki tinoni qai tei batini matadi tu sa na Tamaqu qakeu sa. Goto mekana gu isa na lagere veina tana Tamasa sa sa tei batia tu sa na Tamana.

47 Sosoto pa sosoto ma pojanigou ara sagou: isa sa vasosoto sa sa isongia na toa jola. 48 Ara sa na bereti toana. 49 Ira na miu tite sa qai tekua tugu na bereti mana pa qega, ba beto qai tei mate tu sira. 50 Api tu sa na bereti sa lagere vei pa noka, ko isa na tinoni mina tekua sisa sa minake mate. 51 Ara sa na bereti toana na gore lagere veina pa noka. Na tinoni mina tekua sa na bereti api sa mina toa kamua na kamua. Ko na bereti isa mana vaiiania ara sa na masaqu, ko isa sa na toa tana kasia gusu,>> sau si Jisu.

52 Poni sa qai vaigua mekadi sira na tinoni Jiu, pira qarigu, <<Ai mina vei beto mina vaganinigita na tinoni api sa na masana?>> qarigu.

53 Poni pira sauniria i Jisu sira, <<Sosoto pa sosoto ma pojanigou ara sagou: vei munake gania agou sa na masana na Tuna na Tinoni beto vei munake bukua na orunguna isa, sa agou munake isongia sa na toa. 54 Isa sa nyapulia na masaqu beto sa bukua na orunguqu ara, sa sa isongia isa sa na toa jola beto ara mana vaturu mulea pa rane liligu sisa. 55 Ura na masaqu ara sa na gagani sosotona, na orunguqu ara sa na buku sosotona. 56 Isa sa nyapulia na masaqu beto sa bukua na orunguqu ara sa sa togasa taqu sisa, beto ara qa togasa tana. 57 Kai muqisi podeke vei tugu na Tamaqu sa garunusiu ara sa na toana ko ara ba qa tavatoa tugu vei tana, poni sa na tinoni sa nyapulusiu ara sa mina toa tugu sisa, ura na toaqu sara. 58 Api sisa na bereti sa gore lagere vei pa noka; na bereti api sa sake vevei na bereti qai tekua ira na miu tite beto pa liguna qai matedia. Goto isa mina tekua na bereti api sa mina toa kamua na kamua,>> sau si Jisu.

59 Inara sa na paranga sa pojaria i Jisu totonai sa vaivagigalai isa pa ruma vavaikamuna pa Kepaniami.

60 Ego ko kubodi ira na ona sepele sa qai nongoria na paranga sa pojai isa sa qai paranga, <<Qokolo, sa tapata na ponyolona sa na vaivagigalai api! I sei mina boka gigilai na ginuana sapi!>> qarigu.

61 Ba sa tei gigilaiona tu i Jisu mekana sa isa vei qai kole ququminia ira na ona sepele, ko pira sauniria, <<Ai sa vei, qu vatapatia tu agou sapi, ko qu nyorogua taloamiu tu? 62 Ai sa vei, vei totonai bu batia agou bi mule sae pa noka sa na Tuna na Tinoni ketakoi sa susuvere mai perangana, poni ai bu vei? 63 Na Gagalana gu na Tamasa sa sa vaivatoa. Na tinoni mekana sa sake boka vapodoa kai sa. Ira na paranga qa paranga laoniria ara tamugou sa na Gagala beto na toa. 64 Ba kaki agou sa quke vasosoto,>> sauniria. (Ura sa tei gigilariaona tu i Jisu pa podalaina sosoto tu sira qaike vasosoto, beto i sei ira sa mina gabala kanai isa.)

65 Beto sa paranga sisa, <<Ko sa vei sa qa tei pojanigou tugu, kepore sa kai tinoni mina boka lame taqu, koi vei tu mina vamalumia na Tamaqu,>> sau. 66 Tonai inara sa paranga vei sisa, poni sa na motadi ira na sepele tana sa qai gabala muledia ko qaike tuti ligua sisa. 67 Poni sa pira sauniria i Jisu sira ka manogarua sepele, <<Ai vei agou? Agou ba muna taloa riumiu mutugu?>> sauniria.

68 Poni sa oe lao si Saimone Pita, <<Bangara, tai sei sa mene lao sagei? Ura ao gu qu isongia sa na paranga sa kolea na toa jola. 69 Beto agei sa qe tei vasosoto tu beto qe tei gigilaia tu sa ao gu sa na Liosona tana Tamasa,>> sau.

70 Poni sa oeria si Jisu, <<Qa tei vilegou tu ara sa agou ka manogarua, oko? E, ba kame agou sa na bangaradi na tomate,>> sau. 71 (I Jiudasi gu, na tuna i Saimone Isikarioti, sa saunia isa, ura isa tugu sa kame ira manogarua sepele mina gabala kanai i Jisu.)