2
I Jona Sa Vavara
1 Ego ko pa leo iapana tu na igana sa sa vavara lao tai Iahova na ona Tamasa si Jona, 2 pira sau,
“Tonai qa gosoro tapata qa kiu alili lao tai Iahova,
poni isa sa oesiu;
pa puruna na ia tadira na tinoni matedi
qa kekebo saea na vaitokai,
poni ao qu nongoria na ovovolequ.
3 Qu ipa gorenisiu pa matana na kolo lilisina
ko na nyoro ranebongi sa lilonisiu,
na ololobagea beto na bobogusu qu garunuria
qai tapupujaka tarisiu.
4 Pira qa rove vei sina,
Qa tagona pale pa moemu ao sara;
ai mana vei mana boka enga lao
pa mua zelepade madina, qau.
5 Na kolo sa amu vakujusiu,
na lilisi sa ude dorurusiu.
Na buburu ivere qai pilua na batuqu.
6 Pa totogasadi na kuta kukubo qa gore toga;
ira na toba kole jolana na peso qai patei tarisiu.
Ba, ao Iahova na qua Tamasa,
qu kao votunia pa pou tomate na qua toa.
7 Mi loasiu gu sau na singo
poni ao Iahova qa roqu kamugo.
Na qua vavara sa lao tamu,
sa lao pa mua zelepade madina.
8 Ira qai aru tamanaria na dia beku nyunyaladi
sa qai kilu palenia na dia vairoqu jongana.
9 Goto ara mana ovelainia na paranga jongana
totonai mana vavakukuvu lao tamu.
Isa qa maulu laonia tamu sa mana vagore votua.
Na inalo sa na koko lame veina tai Iahova,” sau si Jona.
10 Poni sa parangia i Iahova sa na igana ko sa lua votunia pa poanana si Jona.