1 Totonai sa beto pojaria i Jisu sira doru sakasava aipira tadira na tinoni, sa sa taloa lao pa Kepaniami sisa. 2 Ego na suverena tugu ketakoi sa kai tinoni mamata gogoto. Ko koleona sa kai ona nabulu isa sa roroqu vivitigia isa sa mo ko sa tata mate. 3 Totonai sa nongoronia na tinoni mamata gogoto api sa na veveina i Jisu, sa sa garunuria isa sira kaki iviva tadira na tinoni Jiu ko mai lao tepai si Jisu ko mi lame salania na ona nabulu sau. 4 Ko tonai qai kamu sira tai Jisu sa qai tepa totokai sisa, pira qarigu, <<Na bangara api sa sa garo tugu muna lao tokania ao. 5 Ura isa sa roroqugita sa gita na tinoni Jiu beto isa tugu mekana sa roiti vanigita sa na oda ruma vavaikamuna,>> qarigunia.

6 Ego jongana sau si Jisu ko sa tuti laoria sira. Ba totonai sa tata kamua gu isa sa na ruma, poni sa sa garunuria na tinoni mamata gogoto api sira kaki ona baere ko qai lao poja veinia pira si Jisu, <<Bangara, kita mu kole pavu goboro. Ara nake padaqu ko ao muna lame tome pa qua ruma. 7 Ko sa vei tugu isa sa ara ba qake doro vapadanisiu ko mana lame tamu! Goto mu leve lamenia gu tana sa na salana ko mi toaona sa na qua marene. 8 Ura ara ba ira tugu na tinoni sa koleria na neqi qai kopunisiu beto koledia mutugu sira na tinoni vaipera qai takopu pa neqi taqu, ko ara qa gigilaiqua sa ai sa vevei tonai sa isongo neqi na tinoni. Ko vei, <Lao ao!> baunia ara sa kame, poni sa sa lao gu sisa. Beto vei, <Lame!> baunia mule ara sa kame, sa sa lame tugu sisa. Vei pori mu vei qaunia na qua nabulu, poni sa sa roitinia tugu sisa. Goto ao na mua neqi sa na lavatana jola ko muna paranga gu lani, poni kode mina tasalana tugu kopira sisa,>> sau.

9 Totonai sa nongoria i Jisu na paranga tana tinoni mamata sa vei inara sa sa gabara, ko sa gabala ko sa paranga laoria isa sira na minete tinoni qai tutia, <<Ma poja vatalenigou ara sagou: qa oqoro isongo batia ara pa Izireli sa kai tinoni sa isongia na rarange lavatana jola vevei tana tinoni api,>> sau sisa.

10 Beto sa qai gabala mule lao pa ruma tana tinoni mamata sira ka visa qai pogoso nongoro, ko qai lao kamu sa qai batia sa na nabulu sa tei tasalana tu.

11 Ego sa oqoro sovai gu sa jola sa vei inara sa sa taloa lao pa kai gugusu na isongona pa Neini si Jisu. Ko ira na ona sepele beto ko kai minete tinoni lavata sa qai tutia isa. 12 Ko isa tugu sa tata kamua na atakamanana na gugusu lavata isa, poni sa qai pogoso bola lamenia gu ira sa kai tinoni sa mate ko mai riu golomia qarigu. Na tinoni sa mate isa sa isa tugu kai tuna memekai kai nanaboko. Ko kai minete tinoni lavata pa gugusu lavata isa sa qai tutia votu na nanaboko.

13 Ego totonai sa doria na Bangara sa na naboko api sa sa roroqu vivitigia, ko pira saunia, <<Muke lukana!>> saunia. 14 Beto sa rerege lao ko sa arua sa na kokobu tomate taudena, ko ira qai pogosia na kokobu tomate sa qai turu noso. Beto sa paranga laoa isa sa na tinoni matena, <<Koburu marene korega, ara qa parangigo sao ko mu tatakole!>> saunia. 15 Poni sa toa mule ko sa tatakole toqo sa na tinoni sa mate ko sa podalai paranga. Beto sa sa toni laonia i Jisu tana na tinana sa na tinoni api.

16 Qai matagutu beto sira doru, ko qai vatarasaea ira sa na Tamasa, pira qarigu, <<Kai tinoni kokorotai lavata sa sa kamugita beto na Tamasa sa sa lame ovikiria ko mi aloria na ona tinoni sau,>> qarigu. 17 Ko isa na nongorona na roiti sa roitinia i Jisu api sa sa tapiara lekogo pa doru eqa pa Jiudia beto ko tadira doru gugusu pa vailivutaina na ia isa.

18 Ego totonai qai vavakato vania ira na ona sepele si Jone sa na veveidi doru roiti sa roitiniria i Jisu, sa sa kuku tekuria isa sira karu ona sepele 19 ko sa garunu laoniria tai Jisu ko pira mai nanasa veinia sauniria, <<<Ao tugu sa isa qai rorovenia na tinoni sa korapa lalameona qarigunia? Ba kai goto tu sa mene verania agei?> munagunia,>> sauniria.

20 Ko tonai qai lao kamu sira karu tai Jisu sa qai nanasia sisa, <<Sa garunugei i Jone Paputaiso sagei karu ko pira muna nanasa veinia saunigei, <Ao tugu sa isa qai rorovenia na tinoni sa korapa lalameona qarigunia? Ba kai goto tu sa mene verania agei?> sau,>> qarigu.

21 Ego totonai tugu qai korapa suveredia ira karu sa i Jisu sa salanaria sira na kubo tinoni qai mo beto qai gosororia na vagauru, beto ko ira qai rajaria na tomate ikikeredi. Beto kubo ira qai leqa sa sa vababataria isa. 22 Ko sa oeria isa sira karu tinoni pogoso nongoro tai Jone, pira sauniria, <<Mu mule lao ko mu vavakato vania i Jone sira vei qu batiria beto qu nongororia. Ira na leqa sa qai babata, ira na qao qai rerege, ira na popoqu sa qai tataloso valioso, ira na kiqili sa qai tavonga, ira qai mate sa qai tavatoa mule, beto ira na golabadi qai tekua na nongoro jongana. 23 Qai tamana sira qaike tatupe talenisiu ara, mugunia,>> sau si Jisu.

24 Pa ligudi qai mule riu sira na sepele tai Jone, sa sa podalai vavakatonia i Jisu tadira na minete tinoni sa na veveina i Jone. Sa paranga sisa, <<Totonai qu lao pa qega ko mu dogoria i Jone qugu sagou, sa na sa sa mu lao dogoria qugu? Kai tinoni sa mamalei vei na equru buburu sa jou vakakanokia na gava? Dai ke! 25 Ko na sa tu sa qu nyogua lao dogoria agou? Kai tinoni sa popokoniria na poko babata jongadi? Ba ira na tinoni qai popoko vatale vei inara sa qaike susuvere pa qega, goto qai kole gu susuvere vatataledia pa ruma tadira na bangara! 26 Ego ko na sa sosoto sa vei qu nyogua lao doria agou? Kai tinoni kokorotai? E, sosoto na tinoni kokorotai tugu sisa, ko sa poreveveina jolaniria ira na tinoni kokorotai sisa. 27 Api sa sa pojai na Kukuti Tabuna na veveina isa, pira sau,

29 Ko tonai qai nongoria i Jone poni sa ira doru tinoni beto ko ira na tinoni teteku takisi qai vasosotoa sa na Tamasa sa tuvisi qarigu, ko qai tapaputaisodia tana. 30 Goto ira na Parese beto ira qai vaivagigalainia na Vavanau sa qaike tavaraguania sa isa vei sa nyoroguania na Tamasa ko bai roitinia, ko qai daidia tapaputaiso ti Jone.

31 Ko sa paranga si Jisu, <<Ego, ko na sa mana vapopodekeniria ara sira na sasae tinoni pa rane pa ngeni api? Ai tinoni veveidi sira? 32 Ira na sasae tinoni pa rane pa ngeni api sa qai vaitoto vei tugu ira na koburu qai kole toqo leleodia pa ia mamaketina. Ko qai kole vavaikuku karovo, pira qarigu,

36 Ego sa beto gu sa vei inara beto sa sa sorua kai Parese si Jisu ko mi lao teteku tavitia pa nona ruma sau. Ko sa lao tugu pa ruma tana si Jisu, ko sa kole teteku tavitia sisa. 37 Ego ko na suverena tugu pa gugusu isa sa kai rereko sa toania na toa selana. Tonai sa nongoronia isa si Jisu sa korapa teteku pa ruma tana Parese sa sa pogosia isa sa kai jagi alabasita sa pugelia na lumu umumanga jonga. 38 Sa pogoso lao turu lulukanania pa liguna i Jisu tata pa nenena, beto sa vaoni tariniria na kolo matana isa sa karu nenena i Jisu, beto sa puqa vapidiliniria na vurunguna. Beto sa aoria sa na nenena i Jisu, beto sa sa vuva tariniria na nenena i Jisu sa na lumu umumanga jonga.

39 Totonai sa batia na Parese sa vei isa inara, sa pira sau golomo mekana, <<Bi vei kai tinoni kokorotai sosoto sa na bangara api, sa bi tei gigilaiona tu ai rereko veveina sa sa korapa ulia isa ina ura na rereko selana sa ina!>> sau.

40 Poni sa paranga lao si Jisu tana, <<Saimone! Ara qa nyogua pojanigo kai sava,>> saunia.

<<Ego tu ao Tinoni vaivagigalai, mu pojai tu,>> sau si Saimone.

41 Poni sa parangia i Jisu sisa, pira saunia, <<Koledia sa karu tinoni poredia lilipu tana kai tinoni poreona poata. Kame ira karu sa ka lima gogoto poata siliva, goto kame sa ka limangavuluputa. 42 Ba ira karu doru sa qaike boka vamatea na dia lilipu ko sa taleosoniria gu na tinoni poreona poata sira karu beto sa anyu paleria gu sa na dia lilipu. Ego ko ai ira karu pira sa qu roroqua ao sa kode mina roroqu vivitigia sa na tinoni poreona poata?>> sau si Jisu.

43 Poni sa oe lao si Saimone, pira sau, <<Pana rorove taqu sa isa sa lavata jola na ona lilipu ba sa taleosonia na tinoni poreona poata,>> sau.

<<Qu sotomua tugu sao,>> sau si Jisu.

44 Beto sa sa balinga mule sa tana rereko, ko sa paranga laoa si Saimone, <<Qu batiamua sa na rereko api? Qu sorusiu ara sao, ba totonai qa tome lame pa mua ruma sara, sa quke vanisiu na pie ao ko ba loqaria na nenequ. Goto na rereko api sa sa vatubulunia na kolo matana sa karu nenequ beto sa puqa vapidiliniria na vurunguna. 45 Ao sa quke ao vakamusiu sara, goto na rereko api sa totonai vei qa kamu ara lani sa sa oqoro beto aoria na nenequ. 46 Ao sa quke lumunia na oela olive na batuqu tonai qu vakamusiu, goto isa sa vuva tatariniria na lumu umanga jonga pore vaina sa na nenequ. 47 Ko ara pira ma poja veinigo sao Saimone: ira na sela tana qai kubo jola sa qai tei taleoso beto tu, ko na ona roroqu sa roiti votunia isa taqu sa ulenia sa sa tei taleoso tu sisa. Ba isa sake kubo ona sela sa taleoso sa nake lavatana tugu sa nona roroqu sa roiti votunia,>> sau si Jisu.

48 Beto sa pira saunia i Jisu sa na rereko, <<Qai tei taleoso tu sira na mua sela,>> saunia. 49 Totonai qai nongoria ira na tinoni qai somana teteku pa tevolo sa paranga vei inara isa sa qai kole ququmi gogolomo, pira qarigu, <<Ai na tinoni veveina sapi ko na sela ba sa taleosoniria?>> qarigu.

50 Beto pira saunia i Jisu sa na rereko, <<Na mua rarange sa sa tei alogo tu. Mu lao pa bule,>> saunia.