1 Ego ko qai kanoko lao tai Jisu sira na soku tinoni teteku takisi beto ko ira na tinoni seladi, ko mai nonongorodia tana qarigu. 2 Poni qai podalai ququminia ira qai vaivagigalainia na Vavanau beto ira na Parese sisa, pira qarigu, <<Na tinoni api sa sa vatataria tu sira na tinoni seladi beto ko sa teteku tavitiria tugu vei!>> qarigu.

3 Poni sa pojaniria i Jisu sa na vavakato vavapada api, pira sau, 4 <<Vei kame agou sa bi isongia kai gogoto ona sipi ko tonai kame ira na sipi pira sa bi muma, poni na sa mina roitinia sisa? Na tinoni isa sa loa vasuvereria pa qega sira ka siangavulu ka sia sipi, beto sa lao nyaqoa sisa sa muma tinganai ko sa batia tu. 5 Totonai sa batia sa sa qera vivitigi, ko sa kovaria pa varana. 6 Beto sa sugara mulenia pa nona ruma, sa kuku vavaikamuniria sira na ona baere beto na tavitina, ko pira sauniria, <Mei agou ko mu somana qeqera tavitisiu! Ura kopira qa tei batia tu ara sisa na qua sipi mumana,> sau.

7 Ma pojanigou ara sa kai muqisi podeke puputa vei inara sa na qeqera pa noka sa votunia na gabala mulena kai tinoni selana sa mina jolania na qeqera sa votunia ira ka siangavulu sia tinoni tuvisidi nake padadi ko mai gabala mule,>> sau si Jisu.

8 <<Bi koleona sa kai rereko sa isongia ka manogaputa ona poata siliva ko kame sa sa vamumai, poni na sa mina roitinia sisa? Na rereko isa sa vurungia na juke, beto sa burungia na ruma beto sa nyaqo beto palea isa sa na leo ruma ko tinganai sa batia tu. 9 Totonai sa batia isa sa na poata sa vamumai, sa sa kuku vaikamuniria sira na ona baere na tavitina, ko pira sauniria, <Mei agou ko mu somana qeqera tavitisiu! Ura kopira qa tei batia tu ara sa na qua poata isa qa vamumai,> sau sisa.

10 Ma poja vatalenigou ara, kai muqisi podeke vei tugu isa sa ira na mateana tana Tamasa sa qai qeqera tonai sa gabala mule kai tinoni selana,>> sau si Jisu.

11 <<Koleona sa kai tinoni karu na tuna marene. 12 Ko na tuna marene pa ligu sa pira saunia na tamadi, <Tamaqu, mu vanisiu gu kopira sa isa na iaqu pa mua isisongo,> sau. Poni sa okoto pikata vaniria na tamadi tadira karu tuna marene sira na ona isisongo.

13 Ego sa jola gu ka vivisa rane sa sa vavainiria na koburu marene pa ligu api sira doru ona sakasava, ko sa tekuniria na poata, beto sa sa taloa riu pa kai gugusu pa souna. Ketakoi sa lao vanyanyala paleria isa pa toa ikikeredi sira doru ona poata. 14 Totonai sa vabetoria isa sira doru vei sa isongoria, sa sa kamu pa gugusu isa sa kai songe lavata, ko sa kepore kai sa bi boka toania sisa. 15 Ko sa lao tepa roiti tana kai tinoni pa gugusu isa, poni sa garunia na tinoni isa ko sa lao kopu vania na ona borogo. 16 Sa vaivasevi ko sa kole dodoro nyonyoroguaniria tugu isa sira na gagani tadira na borogo, ba kepore kai tinoni bi iani gagani.

17 Ko totonai sa roqu kamua isa sa na roroqu tavagigala, poni pira sau, <Kei, ira doru nabulu tana tamaqu kisa ba sa pugele nyonyoa na gadi gagani goto na sa qa mate talea ko qa suvere vaivasevi burana lani ara! 18 Jongana, ma sisiqarai gu mule lao tana tamaqu ara, ko pira mana vavaja vei: Tamaqu, qa sela sara pa moena na Tamasa pa noka beto pa moemu ao. 19 Kopira nake padaqu ko muna kukunisiu na tumu sara, goto mu veinisiu gu ira na mua tinoni roiti managu,> sau. 20 Ko sa gasa turu ko sa taloa mule lao tana tamana sisa.

Ba totonai sa oqoro tata kamua na ruma isa sa sa dogoro vaia na tamana, ko sa roroqu vivitigia sisa, ko sa abutu lao borua beto sa aoa sa na tuna.

21 Poni sa pira sau sa na tuna, <Tamaqu, qa sela sara pa moena na Tamasa pa noka beto pa moemu ao. Kopira nake padaqu ko muna kukunisiu na tumu sara,> sau.

22 Ba sa kuku tekuria na tamana sira na ona nabulu, <Mu sisiqarai! Tekua na poko babata jongana ko mu vasaenia, beto mu vasolapania na ringi na kakarusuna, beto mu vasaenia tugu na sadolo na nenena, 23 beto sa mu lao kubolia na tuni bulumakau nyonyobokona, ko ta vavolo qeqerania! 24 Ura na tuqu api sa sa tei mate tu, ba kopira sa toa mule; sa tei muma tu sisa, ba kopira sa tabata ligu!> sau. Ko qai podalai roitinia ira sa na vavolo qeqera.

25 Ego totonai sa korapa tu pa inuma sa na tuna marene pa moa. Ko totonai sa mule ko sa tata kamu pa ruma, sa sa nongoria sa na mimike beto na pepeka. 26 Poni sa kuku tekua isa sa kai nabulu ko sa nanasia, <Na sa sa podo lani, qokolo!> saunia.

27 Poni pira sau sa na nabulu, <Na tasimu sa sa koni mule kamu ko na tamamu sa sa kubolia na tuni bulumakau nyonyobokona ko qai vavolo qeqera, ura sa mule kamu vatale sisa,> saunia.

28 Ba sa tagigiri sa na tuna pa moa, ko sa daiona tome pa ruma. Poni sa votu sa na tamana ko sa mamana totokai ko mi tome saunia. 29 Ba sa oea sa na tamana, <Doro! Na kubo jola aoro pira sa qa kole pinausu vanigo ara sao beto qake isongo maja podekia tugu ara sa kai mua garunu. Ba na sa mai qu tei vanisiu tu sara? Bi kai qoti ikete gu bu vanisiu ko ba teteku tavitiria ira na qua baere, ba kepore vavagila tugu! 30 Goto na tumu inana sa sa riu vamanyao betoria tadira na tugele sira na mua sakasava, ba tonai sa mule kamu sa qu kubolo vania tu na tuni bulumakau nyonyobokona ao!> sau sisa.

31 Poni pira saunia na tamana sisa, <Tuqu, ao sa na suveremu gu taqu doru totoso, ko dorudi vei qa isongoria ara sa na mua gu ao. 32 Ba sa jongana tugu sa taqe roiti gagani ko taqe qeqera gita, ura na tasimu api sa sa tei mate tu, ba kopira sa toa mule; sa tei muma tu sisa, ba kopira sa tabata ligu!> sau.>>