1 Ego na vuvugei jonga na rane momoe pa vuiki, sa qai munu vuvugei lao pa bevi sira na rereko ko qai pogosoria sira na oela umumanga jonga qai vatanai. 2 Ba tonai qai lao kamu poni sa qai batia sa tei tabokili varijo tu pa atakamanana na bevi sa na patu qai pateinia, 3 ko tonai qai tome lao poni qaike batia sa na kokobu tinina na Bangara i Jisu. 4 Tonai qai korapa rurania ira sisa sa vei isa, sa karu marene qai vasaeria na poko kikilangadi sa qai lame turu pa keketaidi. 5 Ko qai matagutu vivikereniria sira na rereko ko qai turu titigore betodia pa peso, poni qai paranga sira karu marene, pira qarigu, <<Ai sa vei ko qu lame nyaqoa na tinoni toana ketakoi qai kokole ira na kokobu tinoni matedi? 6 Nake lani sisa, sa tei turu mule tu. Qu gigilaimiu sisa vei sa pojanigou totonai sa korapa suvere pa Qalili? 7 Sa pojai isa totonai sa na veveina na Tuna na Tinoni sa kode mina tavalao pa limadi ira na tinoni seladi ko mina tavamate pa korosi, ba pa vinaue rane sa kode mina turu mule sau,>> qarigu.

8 Totonai sa qai roroqu kamuria ira sira na paranga tana, 9 ko qai taloa pa bevi ko qai mule vavakato vaniria sira ka manogameka sepele beto ira doru qai tututia i Jisu. 10 Ko ira Mere Magadalene, i Joana, i Mere na tinana i Jekopi beto ira kaki rereko qai tutiria sa qai vavakatonia tadira na tinoni tagarunudi sa na vavakato api. 11 Ba na vavakato api sa vei kai vavakato malivi gu tadira na tinoni tagarunudi, ko qaike vasosotoria sira na rereko. 12 Ba i Pita sa gasa turu ko sa abutu lao sa pa bevi, ko sa ovoro ko sa oviki lao, poni sa batiria na poko gu qai korapa koledia. Ko sa taloa ko sa gabala mule pa ruma sisa beto ko sa kole tugu roroqua sa na sa beka sa podo sau.

13 Ego pa ranena tugu isa sa ira karu sepele tai Jisu sa qai korapa lalaodia pa kai gusu na isongona pa Imeasi, na souna koko pa Jerusalema sa papada vei manogarua kilomita. 14 Ko qai kole vaivavakatoniria ira karu sira doru sakasava qai koni pidoko aipira. 15 Totonai qai korapa vaipaparanga beto qai vaiguaniria ira karu sira na sakasava aipira, sa i Jisu mekana sa lame kamuria ko sa mekarai rerege tavitiria. 16 Ko qai batiadia tugu ira karu sisa ba qaike doro gigalia ira karu sisa.

17 Poni sa nanasa laoria i Jisu sira karu, pira sau, <<Na sa sa na vavakato qu korapa vaigonania agou karu pa miu rerege lame?>> sauniria.

Poni sa qai turu vanoso, korapa doro takulangadi. 18 Beto sa kame ira karu, na isongona i Kiliopasi, sa oe laoa, <<Qokolo, ao gu mekamu sa na tinoni koni kamumu pa Jerusalema? Ko sa vei sa quke gigilaria sira na sakasava qai pidoko pa rane qai koni jola pira?>> saunia.

19 Poni sa nanasaria si Jisu, <<Ai sakasava veveidi sa qu pojaria ao karu?>> sauniria.

Poni pira qarigu sira karu, <<Na veveina i Jisu pa Nazareti. Kai tinoni kokorotai sa neqi pa ona paranga beto na ona roiti pa moena na Tamasa beto ira na tinoni sisa. 20 Ko ira na mei kuta iama beto na mei tinoni mamata sa qai tekua ko qai vaivaegonia na ona mate, ko qai vamatea pa korosi sisa. 21 Agei qe kole rorovenia sa isa tugu sa na tinoni mina aloa sa na bubutu Izireli qeu. Pa riso gu qai taroiti sira doru sakasava aipira. 22 Ego beto sa ira kaki rereko tavitimei agei sa qai varuragei gu mule. Qai lao pa bevi pa ngeni vuvugei jonga 23 ba qaike batia sa na kokobu tinina. Ego beto sa qai mule pojanigei sa qai batiria pa dodogoro sira na mateana, ko ira na mateana qai pojaniria sa sa tei toa mule tu sisa qarigu. 24 Ko ira kaki tavitimei mule sa qai lao pa bevi, poni sa qai batia sa isa tugu vei qai pojai ira na rereko, goto isa sa qaike batia,>> qarigu.

25 Poni pira sauniria i Jisu sira karu, <<Qu duduvili sagou ko na roqumiu sa mamavo vivitigi pa vasosotodi ira doru sakasava qai pojaria ira na tinoni kokorotai! 26 Na tanguti vakolena sa na Karisito sa mina gosororia mai sira na vitigi aipira beto sa mina tavalavata!>> sau.

27 Ego beto sa podalai pa kukuti ti Mosese ko sa kamu pa kukuti tadira doru tinoni kokorotai, sa sa kole ruvata vakabere vaniria isa sira doru sakasava qai tapoja pa Kukuti Tabuna na veveina mekana.

28 Ego ko tonai qai lame tata kamua sa na gusu qai korapa rerege laoa, poni sa roiti vei mi jola laona sau sisa, 29 ba qai tepa vivitigia ira karu sisa, pira qarigunia, <<Mu suvere tavitigei, ura sa tei vevelu tu beto mi rodomo gu sau sa na eqa,>> qarigunia. Poni sa lao suvere tavitiria pa ruma.

30 Ego totonai sa lao teteku tavitiria pa tevolo sa sa tekua isa sa na bereti ko sa manania, sa kikipai, beto sa ianiria. 31 Pana totoso tu isa sa revanga sa na matadi sira karu ko qai gigalia sisa, beto sa sa pae gu pa dia dodogoro sisa. 32 Poni qai vaiparanga vei pira sira karu, <<Qokolo, kale pu vei na iku vuvurungu inara pu vei sa na buloda totonai sa kole parangagita pa soana, beto totonai sa kole revanga vanigita na Kukuti Tabuna, oko?>> qarigu.

33 Ko qai gasa turu tugu pa totoso isa sira karu ko qai mule lao sa pa Jerusalema. Qai lao kamu sa qai batiria sira ka manogameka sepele beto ira kaki mule, 34 ko pira qarigu, <<Sosoto! Na Bangara sa sa toa mule, ko sa tei votu mutu tai Saimone!>> qarigu. 35 Ego beto sa ira karu ba qai vavakato vaniria sa isa veveina qai gosoria isa pa soana laona, beto na veveina qai gigalia tonai sa kikipai na bereti.

36 Ego totonai qai korapa vavakatonia ira sa na sakasava aipira, sa i Jisu mekana sa turu pa vaikorapaidi ira doru, beto pira sauniria, <<Na bule mi somana tamugou!>> sauniria.

37 Qai matagutu vivitigi sira, beto qai rorovea sa palu qai batia na onguna kai tinoni qarigu. 38 Poni sa paranga laoria i Jisu sira, <<Ai sa vei ko qu takulanga, beto ai sa vei ko sa rabeke na roqumiu? 39 Mu dororia tu na limaqu na nenequ ko, ura ara tugu sapi! Mu ulisiu beto mu dorosiu, ura na onguna na tinoni sa sa kepore na masana beto na pupudana, goto ara sa koledia masaqu beto na pupudaqu,>> sauniria.

40 Pa liguna sa paranga vei pira, poni sa vadogoroniria na limana beto na nenena. 41 Ego ko tonai qai korapa qera tugu ba qaike boka vasosotoa tugu, poni sa sa nanasaria, <<Ai vei koleona kaki miu tetekuna?>> sau. 42 Poni qai vania kai kipa igana paruguna, 43 ko sa tekua ko sa gania pa moedi ira doru.

44 Beto pira sauniria, <<Aipira sira na qua paranga qa tei ule vanigou tu totonai qa suvere tavitigou. Doru sakasava veveiqu ara qai takuti pa Vavanau ti Mosese, tadira na tinoni kokorotai beto pa Kera Vinatarasae sa mai tavagore votu tugu qaunigou,>> sauniria.

45 Beto sa revangia isa sa na roqudi ko qai boka doro vakabereria sira na ginuadi na paranga pa Kukuti Tabuna, 46 beto pira sauniria, <<Na takuti vakolena pa Kukuti Tabuna sa na Karisito sa mina gosoro vitigi ko mina mate beto na rane vinaue mina turu mule pa mate sisa. 47 Beto ko na nongorona ira na tinoni mai gabala ko na dia sela mi taleosae sa mina tatarae pa nisongona isa tadira doru puku tinoni, podalai tugu pa Jerusalema. 48 Agou sa muna vavakatoniria sira na sakasava qu batiria aipira. 49 Ko ara mana garunu valagere vanigou sa na vaivana sa taringunguti vakole vanigou na Tamaqu. Ba mu suvere pa gusu pa Jerusalema tinganai muna isongia mai tu sa na neqi mina lagere vei pa nulu vavagalo,>> sau si Jisu.

50 Ego beto sa sa toni votu lao veiniria pa Betani i Jisu sira, beto sa alakaniria na limana ko sa mananiria. 51 Totonai sa korapa mananiria poni sa rijo tadira sisa ko sa iolo taloa tadira ko sa sae vei pa noka. 52 Ego ko pa liguna qai vatarasaea, poni sa qai muledia pa Jerusalema beto na qera lavata sa kole pa bulodi. 53 Beto ko qaike noso lao vatarasaea ira pa kakabarena zelepade sa na Tamasa.