1 <<Mu kopunia na miu roiti tuvisina ko muke roitinia pa moedi ira na tinoni ko mu vadogoroniria gu ira. Vei muna vei isa sagou, poni sa mina kepore kai pinia muna tekua tana Tamamiu pa noka sagou,>> sau si Jisu.

2 <<Ego tonai muna roitinia ao sa kai vaiia tokania na tinoni vaivasevina sa muke kukuvilinia pa moemu. Isa qai roroiti vei pa leo ruma vavaikamuna beto pa soana lavata sira na tinoni vavabatadi, ko mai vatarasaeria na tinoni qarigu. Ma poja sosotonigou ara sagou: ira sa qai tei tekua tu na dia pinia. 3 Goto ao tonai mu roitinia sa kai vaiia tokania na tinoni vaivasevina poni sa muke vagigilania na lima kale merimu sa isa sa roitinia na lima kale matuamu, 4 ko na mua vaiia tokania na tinoni vaivasevina sa mi taroiti pa paena. Ko na Tamamu sa batia isa qu roitinia pa paena sa mina vanigo na pinia,>> sau si Jisu.

5 <<Ego tonai muna vavara sagou, sa muke vei ira na tinoni vavabatadi! Ura ira sa qai nyonyogua turu vavara pa leo ruma vavaikamuna beto pa vavaikae soana ko mai batiria na tinoni qarigu. Ma poja sosotonigou ara sagou: ira sa qai tei tekua tu na dia pinia. 6 Goto ao tonai mu vavara, sa mu tome lao pa mua lose, mu pateia na mua atakamana, beto sa mu vavara lao tana Tamamu sa suvere pa paena. Ko na Tamamu isa sa batia na roiti qu roitinia pa paena sa mina vanigo na pinia.

7 Ko tonai mu vavara agou sa muke mijimojaniria kubo paranga qai vevei ira na tinoni rodomo, ura qai roroqua sa sa soku vatale na dia paranga ko kode mina nongororia na Tamasa qarigu. 8 Muke doro tutiria sira, ura na Tamamiu sa totonai tu qu oqoro tepai sa sa tei gigilariaona tu isa sira qu qasaniria.

9 Ko agou sa pira mu vavara vei:

14 Ura vei muna taleosoniria agou sira na sela qai roiti lameniria ira na tinoni tamugou, poni sa na Tamamiu pa noka ba mina taleosonigou tugu sagou. 15 Goto vei munake taleosoniria agou sira na tinoni, poni sa na Tamamiu ba minake taleosonigou tugu na miu sela sagou,>> sau si Jisu.

16 <<Ego tonai muna tatabu gagani sagou, sa muke vadoro takulanga veinigou ira na tinoni vavabatadi. Ira sa qai vadoro bati karea na isumatadi ko ira na tinoni mai batiria qai korapa tatabu gagani sira mariguniria qarigu. Ara ma poja sosotonigou sagou: ira sa qai tei tekua tu na dia pinia. 17 Goto ao sa tonai qu tatabu gagani, sa mu lumu vatalea na batumu beto mu subi vatalea na isumatamu. 18 Ko ira na tinoni maike doro gigilai sa ao qu korapa tatabu gagani, goto na Tamamu gu pa paena sa mi gigilai. Ko na Tamamu isa sa batiria na mua roiti qu roitiniria pa paena sa mina vanigo na pinia>>, sau si Jisu.

19 <<Muke boko vavaikamumiu isisongo pa peso ketakoi sa boka gani piararia na tamo beto na obu, beto ketakoi qai boka pipiara tome ikoria ira na tinoni ikikodi. 20 Goto mu boko vavaikamumiu isisongo pa noka tu ketakoi qaike boka gani piararia na tamo beto na obu, beto ketakoi qaike boka pipiara tome ikoria ira na tinoni ikikodi. 21 Ura ketakoi sa kole na mua isisongo sa ketakoi tugu sa kole sa na bulomu,>> sau si Jisu.

22 <<Na jukena na tini sa na mata. Ko vei mina jongana sa na matamu, poni sa na tinimu doruna kode mina tolangania na kabere. 23 Goto vei mina ikere sa na matamu, sa na tinimu doruna kode mina rodomo. Ko vei na kabere sa kole tamu sa na rodomo gu, poni sa kode mina rodomo kukuni sisa,>> sau si Jisu.

24 <<Kepore sa kai tinoni mina mekarai nabuluniria karu bangara. Kame sa minake tavaraguani goto kame sa mina roroqua, babi kame kode mina valavatia goto kame sa mina vakepore veveinai. Ko munake boka mekarai nabuluniria agou sa na Tamasa beto na isisongo.

25 Ko sa vei sa ma pojanigou: muke takulangania na miu toa, na sa muna gania, na sa muna bukua, babi na sa muna pokonia na tinimiu. Na toa tu sa sa poreveveina jolania na gagani, beto na tini tu sa sa poreveveina jolania na poko. 26 Mu dororia tu agou sira na manugu pa vavagalo eqa: ira sa qaike umuma, qaike ababu, beto qaike aqaqono vaikamu pa ruma, ba na Tamamiu pa noka sa vatetekuria gu sira. Ba agou tu sa qu poreveveina jolaniria na manugu. 27 I sei agou sa tonai sa kole takulanga poni sa tei boka vakakasia mai tu iapeki sa na ona toa? Bi mija tugu!

28 Ko ai sa vei qu takulangania tu agou sa na veveina na poko? Mu dororia tu agou sira na avoro beto ai qai vei qai toa ko. Ira sa qaike pavu talea na roiti beto qaike pipitidia poko. 29 Ba ma pojanigou ara sagou: doru poko babata jongadi tai Solomone qaike kamua na babata jongana kame avoro api.

30 Ko na avoro gu sa toa pa ngeni beto vuka sa mateona ko sa tagona lao pale pa iku vavavatununa ba na Tamasa sa vapopoko vababata jongai tu. Ba agou tu sa qu poreveveina jolaniria na avoro. Sa beko ikete na miu rarange! 31 Ko muke takulangania sa: <Na sa tana gania?> babi <Na sa tana bukua?> babi <Na sa tana popokonia?> mukeu. 32 Ura doru sakasava vevei aipira sa ira gu na tinoni rodomo qai kole nyaqo totoniria. Goto agou sa na Tamamiu pa noka sa tei gigilariaona tu sa qai poreveveina muna toaniria agou sa doru sakasa aipira.

33 Goto mu nyaqo momoea sa na binangara tana Tamasa beto na ona tuvisi, beto isa mina tamo vanigou sira doru sakasava vevei pira. 34 Ko muke takulangania sa vuka, ura vuka sa mina takulangania mekana. Ira doru rane qai okoto pogosoria mekadi sa na dia tapata,>> sau si Jisu.