1 Ego totonai sa taloa pa kubo ko sa gore si Jisu, sa ira na minete tinoni lavata sa qai tutia sisa. 2 Ko api sa kai tinoni popoqu sa lame toqo sori tutungu pa moena isa, ko pira sau, <<Bangara, vei bu malumu ao, sa muna boka valiososiu gu sara,>> sau.

3 Poni sa kaqamania na limana ko sa ulia i Jisu sa na tinoni isa beto pira saunia, <<Qa malumu gu sara. Ko mu lioso tu ao!>> saunia. Na totoso tugu isa sa sa tataloso valioso gu sa na popoquna isa. 4 Beto sa pira sa poja veinia i Jisu sisa, <<Kopunia ko munake vavavakato vania kai tinoni, goto mu lao vatuvisi tana iama ko mi doro vivilotigo beto sa muna roitinia ao sa na mua vavakukuvu vei sa vaigarununia i Mosese, ko ira doru mai gigilai sa ao qu tei lioso tu,>> sau sisa.

5 Totonai sa tome lao pa Kepaniami si Jisu, sa sa lame tana sa kai tinoni mamata gogoto, ko sa tepa totokani vaitokai, 6 pira sau, <<Bangara, na qua nabulu sa korapa kole momoona pa ruma, sa mate kale tinina beto sa kamua na vitigi lavata,>> sau.

7 Poni pira saunia i Jisu sisa, <<Ara mana lao salania sisa,>> sau.

8 Ba sa paranga sa na tinoni mamata gogoto isa, pira sau, <<Bangara, ara nake tinoni garoqu ko bu lame tome pa ruma taqu ara sao. Goto mu leve tarinia gu na paranga, beto kode mina tasalanaona gu sa na qua nabulu. 9 Ura ara ba kai tinoni qa kole kaurai tugu pa neqi tadira na qua bangara beto ko koledia sira na tinoni vaipera qai kole kaurai pa neqi taqu. Ko tonai qa parangia sapi, <Mu lao,> qaunia, poni sa laona tugu, beto qa parangia sa poni, <Mu lame,> qaunia, poni sa lameona tugu. Ko na qua nabulu isa, <Roitinia api,> qaunia, sa sa roitinia gu,>> saunia si Jisu.

10 Totonai sa nongoria i Jisu poni sa sa gabara vivitigi, ko pira sauniria sira qai kole tututia isa, <<Ma poja sosotonigou ara sagou: oqoro pore tana kai tinoni pa Izireli ba batinia ara sa na rarange lavatana vei api. 11 Ko ma pojanigou ara: kode kubo tinoni sa mai lame vei keta pa sagere tapo beto pa suvu tapo, ko mai toqo tavitiria pa vavolo pa binangara pa noka sira Ebarahami, i Aisake beto ko i Jekopi. 12 Goto ira na tuni binangara sa mai tagona votu pale pa peguru rorodomona. Ketakoi mai lukana uui beto mai ngingisi tu na livodi,>> sau.

13 Beto i Jisu sa parangia na tinoni mamata gogoto, pira saunia, <<Mu riumua. Isa vei qu vasosotoa ao sa mi gore votu,>> sau sisa. Pa totoso tugu isa sa sa tasalana sa na nabulu tana tinoni mamata gogoto isa.

14 Ego tonai sa kamu pa ruma tai Pita si Jisu, sa sa batia sa na qoele roana i Pita sa mangini na tinina ko sa korapa kole momoona pa lovu. 15 Ko sa arua i Jisu sa na limana, poni sa taloa tana sa na mo mangini ko sa tatakole vatana vania na tetekuna isa si Jisu.

16 Totonai sa gore na vevelu poni sa qai toni kamuniria tai Jisu sira na mota tinoni sa tomeria na tomate ikikeredi. Ko sa iju paleniria na ona paranga i Jisu sira na gagala ikikeredi, beto sa salanaria sira qai mo. 17 Ko sa gore votu sa na paranga sa pojai i Aisea na tinoni kokorotai, pira sau,

18 Ego ko tonai sa batia i Jisu sa na minete tinoni qai lame vailivutainia, sa sa garunu sira na ona sepele ko mai toka lao pa kai karovona na ovuku Qalili sauniria. 19 Ego beto kame isa sa vaivagigalainia na Vavanau sa sa lame ko pira saunia si Jisu, <<Tinoni vaivagigalai, ara mana tutigo ao doru eqa muna lao vei ao,>> sau.

20 Poni pira saunia i Jisu, <<Ira na pokese koleona na dia baongo beto ira na manugu pa vavagalo eqa koleona na dia vovori, goto na Tuna na Tinoni sa kepore na ona ia mina vamineria na batuna,>> sau.

21 Kai goto ona sepele pira saunia sisa, <<Bangara, vamalumusiu ko ma mule lao golomia mai na tamaqu,>> sau.

22 Poni pira saunia i Jisu sisa, <<Tutisiu ara ao. Loaria sira na matedi ko mai vaigolomo mekadi,>> saunia.

23 Ego sa koi pa kai koaka si Jisu beto ira na ona sepele, ko mai toka lao pa kai karovona na ovuku Qalili qarigu. 24 Poni sa raja vasiboro pa kolo sa kai ranebongi, ko sa vavapoara tarinia na ololobagea sa na koaka. Ba i Jisu sa kole putagana tugu. 25 Ko qai lao vadoravia ira na ona sepele sisa, pira qarigunia, Mu alogita, Bangara! Ta dururu mate taqeu sa gita! qarigunia.

26 Poni sa oeria i Jisu sira, Ai sa vei ko qu matagutu tu sagou? Sa beko ikete na miu rarange! sauniria. Beto sa tatakole sisa ko sa tokea sa na gava beto na kolo, poni sa bule elava sa neqa.

27 Poni sa qai gabara beto sira doru, ko qai kole vavaiparanga mule mekadi, Koi, ai tu tinoni veveina sapi? Ko na gava beto na ololobagea tu ba qai nongoria tu! qarigu sira.

28 Ego totonai sa paro pa kai kalena tata pa gugusu pa Qadara si Jisu, sa qai koko lame vei pa bevi vavaigolomona ketakoi sa karu tinoni sa tomeria na tomate ikikeredi ko qai lame gosoria si Jisu. Qai aru tapata, ko kepore kai tinoni sa nyogua tonia sa na soana sa lao vei ketakoi. 29 Tonai qai batia ira karu si Jisu sa qai vevela votu, pira qarigu, <<Na sa qu nyogua roitinia tamigei sao, na Tuna na Tamasa? Ai vei, qu lame ko mu pipiaragei agei totonai sa oqoro kamua na mei totoso qugu?>> qarigu sira karu.

30 Ego nake souna pa ia isa sa kai godo borogo lavata qai korapa nyunyubelegadia. 31 Ko ira na gagala ikikeredi qai tepa vivitigia si Jisu, pira qarigu, <<Vei muna iju variugei, poni sa mu garunu valaonigei gu pa godo borogo pori,>> qarigunia.

32 Poni pira sauniria i Jisu, <<Mu lao tu!>> sauniria. Ko qai taloa riu tadira karu tinoni pira sira na tomate ikikeredi, ko qai lao tome tadira na borogo. Ura ko qai sasuru turu taloa riu gu mule sira na borogo pira, ko qai tulai gore sa na taba mamavarana, ko qai tulusu gore pa leo kolo ko qai kuju mate beto pudaladia.

33 Ego ko sa vei isa poni sa qai uku muledia pa gugusu sira na tinoni qai kopuniria na borogo, ko qai vavakato beto vaniria ira sira doru sakasava qari taroiti tadira karu sa tomeria na tomate ikikeredi. 34 Ko qai lao gosoria ira doru tinoni pa gugusu isa si Jisu. Tonai qai batia, poni sa qai tepa vivitigia sisa ko mi loai na dia gugusu isa qarigunia.