1 Ego totonai sa beto vaivagigalainiria i Jisu sira doru sakasava pira, sa pira sauniria ira nona sepele, 2 <<Qu tei gigilaimiu tu agou sa karu rane gu sa kole beto mina kamua sa na rane vavolo Alokata, ko totonai sa kode mina tavalao pa limadi ira na tinoni sa na Tuna na Tinoni ko mina tavamate pa korosi,>> sau.

3 Ko na totoso tugu isa sa ira na kuta iama beto ira na iviva mamata tadira na tinoni sa qai vaikamu pa ruma ti Kaiapasi isa na kuta iama lavata. 4 Ko qai roitiniria kaki roroqu vei beto mai aru tamana golomia ko mai vamatea si Jisu qarigu. 5 Ba pira qai kole vaiparanga vei sira, <<Dai, taneke roitinia na roiti isa pa totoso vavolo Alokata, ura kita ta kole vaiperaniria ira na tinoni,>> qarigu.

6 Ego sa lao suvereona pa Betani si Jisu, pa ruma ti Saimone isa sa rajai na popoqu perangana. 7 Ko tonai sa korapa teteku i Jisu sa sa tome lao sa kai rereko sa pogosia kai tototona sa taroiti pa kai patu babata jongana. Sa pugelia na lumu umumanga jonga beto na pore vaina sa na tototona isa. Ko sa lobitia, beto sa vuvania pa batuna i Jisu.

8 Poni ira na sepele sa totonai qai batia sa roiti vei inara isa, sa qai tagigiri sira ko qai paranga, <<Ai sa vei ko sa korapa aru vivikeria na lumu sina! 9 Isa bi boka tatekuni poata lavatana sina, ko bi ianiria ira na tinoni vaivasevidi!>> qarigu.

10 Ba sa tei gigilaiona tu i Jisu sa na paranga qai pojai ira, ko pira sauniria, <<Ai sa vei ko qu korapa tu poja vivikeria agou sa na rereko api? Kai roiti jongana sa sa roiti lamenia isa taqu. 11 Ura qu suvere tavitiriamiu gu agou doru totoso sira na tinoni vaivasevidi, goto ara sa maneke suvere tavitigou lalaoqua. 12 Tonai sa vuvania na lumu na rereko api sa na tiniqu ara, sa sa vatanania isa ko mina tagolomo sa na tiniqu ara. 13 Ma poja sosotonigou ara sagou: doru eqa pa kasia gusu mina tatarae na nongoro jongana api, sa mina tavavavakato tugu sa na roiti sa roitinia na rereko api taqu, ko minake tamuma sa na rereko isa,>> sau si Jisu.

14 Pa liguna isa sa kame ira ka manogarua sepele, na isongona i Jiudasi Isikarioti, sa sa lao tadira na kuta iama, 15 ko pira sauniria, <<Na sa sa muna vanisiu ara agou, ko mana boka tokanigou ko muna boka aru tamania agou si Jisu?>> sauniria. Poni qai anye tekuria sa ka uengavuluputa poata siliva, ko qai vania. 16 Ko sa podalai tugu na totoso isa sa sa podalai nyanyaqoa i Jiudasi sa kai lolomo jongana vei beto mina tokaniria ko mai boka aru tamania ira si Jisu sau.

17 Tonai sa kamua sa na rane momoe tonai mina taroiti sa na vavolona na Bereti Nake Kovuruna, sa qai lao sira na ona sepele ko qai nanasia si Jisu, <<Pai sa qu nyoguania ao ketakoi mene vatana vanigo agei sa na vavolo Alokata?>> qarigunia.

18 Poni pira sauniria, <<Mu lao tana tinoni api pa Jerusalema, ko pira munagunia, <Pira sau sa na tinoni vaivagigalai, sa kamua sa na qua totoso. Ko kopira sa ara beto ira na qua sepele sa mene tekua na vavolo Alokata pa ruma tamu sau,> munagunia,>> sau si Jisu. 19 Ko qai lao tugu sira na sepele ko qai vatanania sa na tetekuna Alokata isa vei sa pojaniria i Jisu.

20 Ego ko totonai sa gore na vevelu sa sa toqo teteku tavitiria i Jisu sira ka manogarua ona sepele. 21 Ko tonai qai korapa teteku ira sa sa paranga si Jisu, <<Ma poja sosotonigou ara sagou: kame agou pira sa mina gabala kanasiu ara,>> sau.

22 Poni sa qai takulanga beto sira na sepele, ko qai okoto nananasa memekai sisa, <<Bangara, nake ara sa qugunisiu ao, oko?>> qai okoto qarigu.

23 Poni sa oeria i Jisu, pira sauniria, <<Isa sa somana totogolo tavitisiu pa baolo ara na gana bereti sa isa tugu sa mina gabala kanasiu ara. 24 Na Tuna na Tinoni sa mina tavamate vei tugu isa sa pojai na Kukuti Tabuna, ba mina gana na takulanga sa na tinoni sa gabala kanai isa! Sa jongana jola sa bike pavu tavapodo sa na tinoni isa!>> sau si Jisu.

25 Poni sa paranga si Jiudasi, isa na tinoni sa malumu ko mina gabala kanai si Jisu, <<Rabi, nake ara sa qugunisiu ao, oko?>> sau.

Poni sa oea i Jisu sisa, <<Isa mekamu qu pojai sisa,>> saunia.

26 Ego totonai qai korapa teteku ira, sa sa tekua i Jisu sa na bereti, ko sa manania, beto sa kikipai ko sa ianiria ira na ona sepele, beto sa paranga, <<Pia ko mu tekua, api sa na tiniqu,>> sau.

27 Beto isa sa sa ovulia sa na kapa, ko sa paranga jongana laonia tana Tamasa, ko sa vaniria ira na ona sepele beto sa paranga, <<Mu bukua agou doru sapi; 28 na orunguqu sapi, isa na vamauruna na taringunguti tana Tamasa tadira nona tinoni. Na orunguqu api sa sa nyoro ko na vulasadi na sela tadira na tinoni. 29 Ma poja vatalenigou: kode maneke buku ligua ara sa na vaini api, tinganai tu mina kamua na rane mana buku tavitinigou ara na vaini korega pa binangara tana Tamaqu,>> sau si Jisu.

30 Beto sa jola gu sa vei inara, sa qai kerania kai kera, beto qai votu ko qai taloa lao pa kubo pa Olive.

31 Ego ketakoi sa parangaria i Jisu sira na ona sepele, <<Pana veveiqu ara sa kode bongi sa agou doru kode muna uku loa pale betonisiu sara, ura pira sau sa na Kukuti Tabuna,

33 Poni sa pira sau si Pita, <<Goto ara sa vei mai uku loa palego tu ira doru, ba maneke uku loa palego sara!>> sau.

34 Poni sa pira saunia i Jisu aza, <<Ma poja sosotonigo ara sao: kode bongi tugu tonai mina oqoro piranga na kokorako sa kode muna kilu palenisiu kue totoso ara sao,>> saunia.

35 Poni sa paranga si Pita, <<Vei mana mate tavitigo tugu ao, ba maneke isongo kilu palenigo tugu sara,>> sau. Ko ira doru sepele sa qai paranga vei beto tugu inara.

36 Ego beto sa sa toniria i Jisu sira na ona sepele, ko qai lao pa kai ia na isongona pa Qetisemani. Beto sa poja veiniria pira, <<Mu toqo lani sagou, goto ara ma jola lao vavara pata lao pa poni,>> sauniria. 37 Ko i Pita gu beto karu tuna marene gu i Zebeti sa sa toniria. Sa takulanga beto sa roroqu mamata vivitigi sisa, 38 ko sa parangaria sira kue, <<Sa lavata jola pa buloqu sa na takulanga api, ko kode mina boka vagojosiu tu. Mu suvere lani ko mu suvere gegele tavitisiu,>> sauniria.

39 Beto sa rerege rijo lao iapeki sisa, ko sa gona kole opo kokou pa peso, ko sa vavara, <<Tamaqu, bi vei bu boka ao, sa mu varijoia taqu sa na kapa vitigi api. Ba nake isa vei qa nyoroguania ara sa mina taroiti, goto isa tu vei qu nyoroguania ao,>> sau.

40 Beto sa sa rerege mule lao tadira kue sepele, ko sa batiria qai korapa putagadia poni sa parangaria i Pita, <<Ai vei, quke boka suvere gegele tavitisiu ara kai totoso papakana sagou? 41 Mu suvere gegele beto mu vavara ko muke gosoria na totoke. Na gagala sa sa malumu, ba na tini sa sa munyala,>> sau sisa.

42 Beto sa gabala mule ligu lao vavara si Jisu, pira sau, <<Tamaqu, vei mineke boka tavarijo sa na kapa vitigi api goto mana bukua tugu ara, ba jongana gu. Isa gu qu nyoroguania ao sa mi taroiti,>> sau sisa.

43 Sa beto isa sa sa gabala mule ligu lame mutugu tadira kue sepele sa sa batiria qai korapa puta betogadia, ura sa ngaolo vivitigiria na nyoro puta. 44 Ego sa loaria mutugu i Jisu sira kue ko sa mule riu ligu vavara na vinaue totoso, ko sa kai pojaria mutugu isa sira sa tei vavaraniria tu.

45 Beto sa sa gabala mule tadira kue sepele, ko pira sauniria, <<Qu korapa tugu putagamiu beto mineremiu sagou? Doro! Mi kamua gu sau sa na totoso na Tuna na Tinoni mina tavakarovo lao pa limadi ira na tinoni seladi. 46 Turu ko ta lao. Doro! Sa kamu gu api na tinoni sa gabala kanasiu ara,>> sau si Jisu.

47 Ko sa korapa tugu paranga vei inara i Jisu sa sa bola gu si Jiudasi, isa kame ira ka manogarua sepele. Qai garunu vatutinia ira na kuta iama beto na iviva mamata tadira na tinoni sa kai puku minete tinoni lavata. Qai okoto pogoso benete vaiperana beto na kubau. 48 Ko sa tei poja vakoleniria tu ira i Jiudasi perangana sa kai vinagigila mina roitinia ti Jisu, pira sauniria, <<Isa na tinoni mana lao aoa ara, sa isa tugu sa na tinoni qu nyoroguania agou, ko muna lao gu aru tamania sisa,>> sauniria. 49 Ko sa rerege totoai lao gu i Jiudasi si Jisu, ko sa gosoro qeqerania, <<Jongana, Rabi!>> sau, beto sa sa aoa si Jisu.

50 Poni sa pira saunia i Jisu sisa, <<Baere, na sa sa qu lamenia ao?>> sau sisa.

Beto sa qai aru tamania ira si Jisu. 51 Na totoso tugu isa sa kame ira na sepele sa tutia i Jisu sa sa saputu tekua sa na ona benete vaiperana ko sa taqasa teusu palea sa kai kale talingina na pinausu tana kuta iama lavata.

52 Poni sa lao i Jisu ko sa tokea sa na tinoni isa, <<Mu soba mulenia pa ona sosobana sa na mua benete ina! Ira doru qai aru benete vaipera sa mai mate tugu pa benete vaipera. 53 Ai sa vei quke gigilai tu ao sa nake tapatana taqu sa ara ba boka tepai gu na Tamaqu ko bi garunu lagereniria ira na joa tina mateana ko bai tokanisiu? 54 Ba vei mana roiti vei inara ara, sa minake boka gore votu sa isa vei sa pojai pa Kukuti Tabuna na veveina isa qa korapa gosoria ara,>> saunia i Jisu sisa.

55 Na totoso isa sa pira sauniria i Jisu sira na minete tinoni, <<Kai tinoni raja ikikoqu sara ko qu pogoso bola tarinisiu tu na benete beto na kubau ko muna tekusiu? Doru rane sa pa kakabarena zelepade gu qa kole suvere vaivagigalai sara, ba quke aru tamanasiu. 56 Ba doru sakasava pira sa qai soni taroiti ko vei tugu ko mi gore votu beto sira na kokorotai tadira na tinoni kokorotai,>> sau sisa. Beto sa ira doru sepele sa qai okoto uku loa palea sisa.

57 Ego ko ira tugu qai aru tamana tekua i Jisu sa qai toni laonia sisa pa ruma tai Kaiapasi, isa na kuta iama lavata. Ko ketakoi qai kole suvere vavaikamudia sira qai vaivagigalainia na Vavanau beto ko ira na iviva mamata. 58 Ba i Pita sa sa kole tututi vasosouona tu pa liligu, tinganai sa lame kamu pa bobole sesebena na ruma tana kuta iama lavata. Beto sa sa tome lao pa leo kakabarena na ruma ko sa lao toqo vairuraiona tadira na nabulu kopu ko mi doria isa sa na roiti mai roitinia ira tai Jisu sau.

59 Qai podekia ira na kuta iama beto ko ira doru iviva pa kauniseli ko mai nyaqo votuniria sa kaki vinasosoto sesekedi, ko mai boka vamatea si Jisu qarigu. 60 Ko kubo ira sa qai turu vavovoturia na paranga sesekedi, ba kepore sa kai ginugua jongana bai batia vei bai boka vamatenia sisa. Pana vinabebetona sa qai turu sa karu tinoni, 61 ko pira qarigu, <<Sa paranga sa na tinoni api, <Mana boka jegara palea ara sa na zelepade madina tana Tamasa, beto pa rane vinaue sa mana vaturu beia ara,> sau,>> qarigu sira karu.

62 Poni sa turu sa na kuta iama lavata ko sa nanasia si Jisu, <<Ai vei, quke boka oeia ao sisa qai jutunigo ira karu inara?>> sauniria. 63 Ba sake vagala si Jisu.

Poni sa paranga sa na kuta iama lavata, <<Pa korapa isongona na Tamasa toana sa qa pojanigo ara sao: mu ule vatale vanigei, ao tugu sa na Karisito na Tuna na Tamasa?>> sau.

64 Poni sa paranga si Jisu, <<Isa tugu qu pojai ao. Ba ma poja vatatalenigou ara sapi: podalai kopira ko mi lao kode muna batia agou sa na Tuna na Tinoni mina toqo pa kale matuana na Tamasa vivana jola, beto mina mule lame vei pa lei pa noka!>> sau si Jisu.

65 Isa tugu sa nongoria sa paranga vei inara i Jisu sa sa bako rikata palea na kuta iama lavata sa nona poko beto pira sau, <<Sa vamoroania na Tamasa sa na tinoni api! Na vinasosoto sa mule sa tana nyaqoa gita? Doro, qu tei nongoriamiu tugu agou sa sa poja vivikeria na Tamasa sapi! 66 Ko na sa sa na roroqu qu vatoqoa sagou ka visa bangara?>> sauniria.

Poni qai oe sira na tinoni lalavata, <<Sa pada vivitigi gu ko mina tavamate sisa,>> qarigu.

67 Beto poni sa qai tue taria na isumatana beto qai irirunia na vavaiiruna. Ira kaki tinoni qai kole popoaria 68 sa pira qai paranga veinia sisa, <<Ego tu, ao na Karisito! Mu ule vanigei tu moko i sei sa sa korapa majago?>> qarigunia.

69 Ego totonai sa korapa toqona pa kakabarena na ruma tana kuta iama lavata si Pita, sa lame sa kai nabulu rereko ko sa parangia, <<Ao tugu sa kame qu tututia i Jisu na tinoni Qalili!>> saunia.

70 Ba sa kilu palenia pa moedi ira doru, pira sau, <<Qake gigilai ara sa na manugu qu korapa pojai ao ina,>> sau.

71 Tonai sa votu lao pa atakamanana na kakaberena na ruma sa sa batia mule kai nabulu rereko sisa, ko pira sauniria sira na tinoni qai suvere ketakoi, <<Na tinoni api sa sa kole tugu tututi tai Jisu na tinoni Nazareti!>> sau.

72 Ba sa kilu pale mutugu taviti maulu si Pita, pira sau, <<Qake isongo gigila podekia tugu ara sa na tinoni ina!>> sau.

73 Sa oqoro sovai gu sa vei inara, beto sa qai lao gu sira na tinoni qai kole turu ketakoi ko pira qarigunia si Pita, <<Ao sosoto gu sa kame ira qai tututia i Jisu, ura na vakerana na mua vavukele paranga sa ulenigo sosoto sao,>> qarigunia.

74 Poni sa paranga si Pita, <<Qa maulu sara ko qa korapa pojai na sosoto! Vei mana seseke sa mina vakilasasiu na Tamasa! Qake gigilai ara sa na tinoni qugunia agou ina!>> sau.

Ego isa tugu sa poja vei inara i Pita, poni sa sa piranga gu sa na kokorako. 75 Beto sa sa gigila kamua i Pita sa isa vei qi pojai perangaina i Jisu tonai pira qiunia, <<Mina oqoro piranga na kokorako, sa ao muna kilu palenisiu kue totoso,>> qiunia. Ko sa votu pa peguru si Pita ko sa lukana vapasania.