1 Na qua paranga bebetona sa, ka visa tavitiqu, mu qeqera pana miu kole kame tana Bangara. Na ginuana qa kai kuti liguria mule sira na sakasava qu tei gigilariamiu tu agou, sa nake vei ko qa udapelu gu qa vei sa goto isa tugu sa na vaturu vamaurumiu agou sisa. 2 Mu balauniria sira na sie nganganguludi pori! Mu balauniria sira na tinoni roiti ikikeredi! Mu balauniria sira qai lida papale na vuliti tini! 3 Ura gita tu sa na tinoni tapobeda sosoto, gita taqe nabulu vatarasae pana Gagala tana Tamasa, taqe kekemarania na Karisito Jisu beto nake sakasava qai taroiti pana peguruna na tini taqe vatogasania sa na oda totoravusu. 4 Ara ba pada boka totoravusuria gu vei sira na sakasava qa roitiniria pana toa tini. Vei kai goto tinoni bi rovea sa mina boka totoravusuria sira na roiti pana toa tini biu, poni sa ara sa pada ko mana boka vavaqata vajolaqua sosoto. 5 Ara qa tapobe na vesu ranequ, na podoqu tadira na puku tinoni Izireli, na lame veiqu pana bubutu tai Benijimani, beto na podo Hiburu tadira na Hiburu sara. Pana kalena na kopuna na Vavanau, ara sa kai Parese. 6 Pana kalena na ngangalinia na Tamasa, ara sa qa komiti vivikeria na ekelesia. Pana kalena na tuvisi isa sa koko vei pana tuti pulisina na Vavanau, ara sa qa liaburu sosoto. 7 Ba ira doru sakasava qai poreveveina jola taqu perangana, sa ira tugu pira sa kopira qa anye veiniria na ikika ura qa batia na Karisito. 8 Ba nake isa gu mekana sa! Kopira sa doru sakasava sa qa anye veiniria na ikika tonai qa doro vaitotonia na poreveveina jola na gigilaina na Karisito Jisu na qua Bangara. Na laena i Jisu sa qa vaikikaria ara sa doru sakasa ko qa doro veiniria na gagale paji nyabo vuvusu, ko qa isisongonia sa na Karisito, 9 beto isa sa isongosiu ara. Ko kopira nake qua tuvisi mekaqu, isa sa koko vei pana Vavanau, sa qa isongia, goto isa tu na tuvisi sa koko vei pana rangena na Karisito, isa na tuvisi tana Tamasa sa lame vei pana rarange. 10 Ko isa gu qa nyorogua gigilai ara sa na Karisito beto na neqina na ona turumule qau beto na somana gosorodi na vitigi tana, ko mana bei vei isa pana mate tana, 11 ko, ai bi soana vevei sisa, sa ara ba mana tavaturu mule tugu pana mate qau.

12 Nake vei ko ara qa tei tekua tu babi qa tei vaokotoria tu sa. Goto ara sa qa korapa abutu nono lao gu ko ma aru tamania qau sa isa sa tei aru tamananisiu na Karisito Jisu. 13 Ka visa tavitiqu, ara mekaqu qake rove veinisiu qa tei aru tamania tu sa na pinia isa. Goto isa qa roitinia ara sa, ira na sakasava pa liguqu sa qa muma paleniria ko qa kaqama laoria sira tu sakasava pa moequ. 14 Ko na vinabebetona sa qa abutu nono laoa ko ma aru tamania sa na pinia isa qau, ko na pinia isa sa na kuku tana Tamasa sae vei pa nulu ura qa rangea i Jisu Karisito. 15 Ko gita doru taqe matua sa ta toania na uana vei api. Ba vei kaki agou bi goto na dia uana, sa na Tamasa tu kode mina vakabere vanigou. 16 Ba padana vei taqe tei teku vatogai tu, sa ta mekarai rerege gu pana kai soana.

17 Ka visa tavitiqu, mu mekarai doro tutisiu ara. Beto mu dogororia sira qai rerege vei isa qe vabatinigou agei. 18 Qa tei pojanigou tu na totoso qai jola pori sapi, ko kopira qa pojanigou mule taviti oni mataqu sapi: koledia sira na tinoni qai kanai sa na nongorona na korosi tana Karisito. 19 Ira na tinoni ira sa na dia vinabebetona sa mai tapipiara gu, na dia tamasa sa na nyorogua gu tana iapadi, beto qai vaqatania sa isa vei bai boka keania. Na dia roroqu sa pugelia na nyorogua ikikeredi tana kasia gusu. 20 Goto gita na oda gugusu susuverena sa pa noka tu, ko taqe korapa vera kukulinia gita sa na oda inaalo, na Bangara i Jisu Karisito, mina koko vei ketakoi. 21 Isa sa mina beia na oda tini munyalana ko mina beinia na tini kikilangana tana. Isa mina roitinia sa na roiti api pana ona neqi mina aru vaikamuniria doru sakasava pana kauruna nona neqi mekana.