12
Na rereko beto na ratovo
1 Beto sa votu lame vei pa noka sa kai vinagigila vaivagabarana jola. Sa bola votu sa kai rereko sa pokonia na tapo, na popu pa kauru nenena, beto pa batuna sa tarapaenia ka manogarua seru. 2 Tei pore iapana tu sa na rereko isa, ko sa vivitigi beto sa lukana ura mi vapore koburu gu sau.
3 Beto sa sa votu lame gu mule sa kai vinagigila vaivagabarana pa noka. Sa bola votu gu sa kai ratovo jijimirina lavata, ka vitu batuna, ka manogaputa kekeuna, beto qai okoto vasolapa tarapae bangara sira doru batuna. 4 Ko sa iruniria na pikutuna isa sa na kobu vinauedi ira na seru pa noka ko sa gona goreniria pa peso. Beto sa lao turu pa moena na rereko sa tata vapodo koburu sa na ratovo, ko mina ponyolo doruria sa na melalu mina vapodoa na rereko sau. 5 Ko sa vapodoa na rereko sa kai melalu, na tuna marene, isa mina vakilasa betoria beto mina bangaraniria doru pupuku tinoni. Ba sa tasaputu sae tana Tamasa sa na ona koburu, pana totoqona bangara tana Tamasa. 6 Beto sa na rereko sa uku riuona pa qega, na ia sa vatanai na Tamasa ko mina takopu beto na tavateteku sa na rereko isa, pana kai tina karu gogoto vonomongavuluputa rane.
7 Ego ko sa poraka votu gu sa na vaipera pa noka, ko i Maekolo beto ira na ona minete mateana sa qai rajai sa na ratovo. Poni na ratovo beto ira na ona minete mateana ba qai raja vaibeidia tugu, 8 ba sa tavakilasa sa na ratovo beto ko ira na mateana tana, beto ko qai taiju pale pa noka. 9 Ko sa tagona gore pale pa peso sa na ratovo, isa tugu sa na dole pa moa, na isongona sa na bangaradi ira na tomate babi Setani, isa sa sa toni vapiruria doru tinoni pa kasia gusu. Ko ira na ona mateana sa qai tagona gore tavitinia tugu isa.
10 Beto qa nongoria mule ara sa kai ovovele pa noka, pira sa vevela viviva vei,
<<Kopira sa tabata sa na inaalo, na neqi
beto binangara tana Tamasa!
Kopira mina bangarania na kasia gusu
sa nona Karisito.
Ura sa tei tagona gore tu pa peso
sisa sa kokole pitu tutiria doru rane na bongi
pana moena na oda Tamasa sa na sela tadira na tasida.
11 Ira na tasida qai tei vakilasia tu sisa pana orunguna na lami,
beto pana dia vavavakato votuna na paranga tana Tamasa,
beto ko qaike rabeke vakamunia pa mate sa na dia toa.
12 Inara sa vei ko mu suvere qera agou na noka,
beto ko agou doru qu suvere ketakoi!
Goto mu takulanga sagou na peso na ivere!
Ura sa tei goregana tu pana tamugou ina
sa na bangaradi ira na tomate.
Sa tagigiri vivitiginia sisa
ura sa gigilaiona isa na ona totoso mina kole roiti
sa sa tei papaka tu,>> sau.
13 Totonai sa gigilai na ratovo sa tei tagona gore tu pa peso sisa, poni sa sa podalai gu nyaqo tututia isa ko mi ngangangulia sa na rereko isa sa vapodoa na koburu marene sau. 14 Ba sa taiania na rereko isa sa karu babanana na jako lavata, ko mina boka tatava uku riu pana ia sa vatana vakolea na Tamasa ko mina takopu na tavateteku sisa pana kue aoro kobuna, ko ketakoi sa mina tavasare tana ratovo. 15 Poni sa tue votunia na ratovo pa mangana sa na nyoro pie, ko sa tuti pa liguna na rereko, ko mi pogoso vaole riu palea sau. 16 Ba na peso sa tokania sa na rereko; sa tapaqala revanga sa na peso, ko sa ponyolo pale sa na nyoro pie sa tue votunia pa mangana na ratovo. 17 Poni sa tagigiri vivitiginia na ratovo sa na rereko isa, ko sa lao gu rajaria sira doru tuna na rereko qai suvere jola, ira qai vatabea na garunu tana Tamasa, beto qai tarange pana dia vavakatona na sosoto ti Jisu Karisito.
18 Ko sa kole gu turuona pana nagasana pa nole sa na ratovo.