1 Ego ko na Tamasa sa tei vanigita tu nona vairoqu vaialona sa gita taqe sela ko sa vei poni sa na sa tanagu sa vei? Ai vei palu ta laoda gu toania sa na toa sela ko mi tadogoro vakakabere sa na vairoqu vaialona tana Tamasa? 2 Dai ko dai tugu! Taqe tei mate loa pale tu gita sa na sela, ko na sa laona mule tana kole toa laoda gu pana sela? 3 Muke mumania agou sa tonai taqe tapaputaiso lao pana ti Jisu Karisito, poni sa pana mate tana sa taqe tapaputaiso lao sa gita. 4 Ko gita sa taqe taborutoni tavitia isa tonai taqe tapaputaiso lao pana ona mate. Ko kai muqisi podeke vei na Karisito sa turu mule pana neqi lavata tana Tamada, poni sa gita ba ta toania na toa koregana. 5 Ko gita sa taqe tei tavaborutoni tavitia tu isa pana ona mate, ko sa vei sa gita ba kode tana mekarai toa tavitia tugu sisa tonai tana tavaturu mule vei isa.

6 Ego ko taqe gigilaioda sa na oda toa leluna sa tavasomana mate tavitia na Karisito pana ona korosi, ko na tinida sa nyoroguania na sela sa mi tapiara pale, ko gita take tavapinausu pana sela. 7 Ura na tinoni matena sa sa tei taruvata tu pana neqi tana sela. 8 Ko gita sa taqe tei mekarai mate tavitia tu na Karisito ko sa vei sa taqe vasosotoa sa kode tana kole mekarai toa tavitia tugu vei sisa. 9 Taqe gigilai sa na Karisito sa tei tavaturu mule tu pana mate ko minake mate ligu, ura na mate sake neqi jolania si Jisu. 10 Tonai sa mate sa sa matenia isa sa na sela tadira doru tinoni kai memeka totoso gu, beto na toa sa toania kopira sa sa toa vania na Tamasa. 11 Ko pana soana vei tugu isa sa agou ba mekamiu sa mu dogoro veinigou na tinoni matedi qaike nyorogua sela, beto mu toa vania na Tamasa ura qu tei somana kole kame tavitia tu i Jisu Karisito sagou.

12 Ego ko kopira muke vamalumia sa na nyorogua sela ko mi bangarania na tinimiu isa kode mina nyabo gu, kita vei ko mu roitiniria sira na nyorogua ikikeredi pana miu toa. 13 Beto muke vamalumu vania na sela sira na okokoto kokobu tinimiu ko mai tavaroiti pana roiti ikikeredi. Goto mu vania tu na Tamasa sa doruna miu toa, mu vei ira na tinoni qai tei tavatoa mule tu pana mate, beto mu vamalumu vania na Tamasa sira doruna na okokoto kokobu tinimiu ko mai tavaroiti pana roiti tuvisidi. 14 Na sela sa minake bangaranigou, ura agou sa quke tapiu pana tutina na Vavanau goto qu tatoni pana vairoqu vaialona tana Tamasa.

15 Ego ko tonai tana dogoria sisa qa koni pojai ara, poni na sa tanagu sa gita? Ai vei palu ta laoda gu toania na toa sela ura taqeke tapiu pana tutina Vavanau goto taqe tatoni pana vairoqu vaialona tu tana Tamasa sa gita? Dai ko dai tugu! 16 Ai vei quke gigilai tugu agou sa tonai qu vapinausu mulenigou lao tana kai bangara ko qu vatabea sisa, poni sa na ona pinausu tugu na tinoni qu vatabea sagou? Ko agou sa vei muna pinausu pana nyorogua tana sela sa kode na vuana muna tekua sa na mate tugu, ba vei muna vamalumugou mekamiu ko muna vatabea na Tamasa poni sa muna vuania tugu agou sa na toa tuvisina. 17 Ba agei qe paranga jongana jola lao tana Tamasa! Ura na totoso qai jola pori agou qu tavapinausu tana na sela, ba kopira qu tei vatabea tu pana bulomiu sa na vaivagigalai qu tavagigalainia. 18 Ko qu tei taruvata tu pana sela ko kopira sa na ona pinausu mutu na tuvisi sagou. 19 Qa korapa paranga vavapodekenia na toa tadagita na tinoni sara ura agou pana miu rorove tinoni sa quke boka nongoro vakoititiria sira na vaivagigalai koridi. Pana totoso qai jola pori qu vamalumuria sira na okokoto kokobu tinimiu ko qu sela beto qu tavapinausu pana roiti pajidi beto na roiti ikikeredi, ko qu roitiniria tu lalaomiu agou sira doru roiti ikikeredi. Ko pana soana vei tugu isa sa kopira ba mu vamalumuria sira na okokoto kokobu tinimiu ko mu tavapinausu pana roiti tuvisina, ko mu toania sa na toa liosona pana tana Tamasa.

20 Agou tonai qu pinausu tana sela, poni sa quke tapiunia agou sa vei bu roitinia agou sa na tuvisi sa nyoroguania na Tamasa. 21 Ego ko na sa sira na vua jongadi qu vagavororia agou tonai qu roitiniria perangaina sira na roiti ikikeredi qai vakeagou kopira? Na vinaokotona ira na roiti ira ko na mate gu ke! 22 Ba kopira sa qu tei taruvata tu pana sela beto qu tei tavapinausu tu tana Tamasa sagou, ko na vuana qu isongia sa na toa liosona pana tana Tamasa, ko na vinaokotona sa na toa jola. 23 Ura na tabarana na sela sa na mate tugu, ba na vaivana tana Tamasa sa na toa jola isa taqe isongia gita tonai taqe kole kame tavitia i Jisu Karisito na oda Bangara.