Ruala Geregerena Paul Fala Ioli Fakwalaimoki 'I Tesalonika Gi
'E iko 'ali tekwa mola 'i burila lia Paul 'e gerea etala buka fala Kristin 'i Tesalonika gi li, ka gerea lou ai 'e. Me 'are ba'ela Paul 'e sae luia lo falalauna laa wale gi gera ilia 'uria Christ 'e oli sui lo mae. 'Urifo Paul ka alaa madakwa sulia liafo me 'are fo iko 'ali kwalaimoki. 'E ilia 'i laoala Christ kae oli mae, Wale Ta'a ala Saetan kae manotafa mae.
Paul 'e ilia fala Kristin gi, 'ali gera ura nasi lo 'alia fitoona gera gi, ala talasi ilito'ona gi kae dao mae fala malakwaitana ada. Ma gera ka 'itoli galo nanata, 'ali gera daria fana fada 'i talada, ka malaa lia Paul failia rua wale kwaima lia gi daulu taua. Ma gera ka 'itoli taua mola 'ada galona 'oka gi.
'Are 'ilitoa 'i laola buka 'e li gi li:
Faalalauna sulia olinala mae Christ (1:1—2:17)
Faalalauna sulia galona Kristin gi fala taunali (3:1-18)
1
1 'I 'ameulu Silas failia Timoti ma 'i lau Paul, lia 'e meulu geregere ko famiu ioli fakwalaimoki 'i Tesalonika gi, ioli God Mama gia ma failia Aofia Jesus Christ gi.
2 Meulu foa 'ali God Mama gia failia Aofia Jesus Christ ka kwai'ofe amiu ma ka kwatea aroarona famiu.
God kae lokokwaikwaina fala ioli gi ala talasi Jesus Christ kae oli mae.
3 Alae iolifuta lau 'e totolia 'ali meulu 'idufae batafea mola God 'i osiamiu. Me 'are fo 'e totolia sulia fitoona 'amiu gi 'e bulao ka ba'ela, ma kwaimanaa 'amiu famiu 'i matanamiu 'e bulao ka ba'ela lou. 4 Ma sulia falafala 'amiu 'e 'urifo, meulu alaa 'oka suli 'amiu fala ioli fakwalaimoki God gi. Meulu alaa 'oka sulia nanatana 'alia fitoona 'amiu gi li, wasua 'amu ka daria 'atona afula gi, sulia nali ioli gera malakwaita amiu 'i osiala fitoona 'amiu gi.
5 'Amu ura nasi ala fitoona 'amiu gi, wasua 'amu ka dao tonala 'atona afula gi, 'e fatailia lia God kae lokokwaikwaina fala ioli gi sui 'alia radana. 'I lia kae kwatea 'amu ka totolia fala iona 'i laola 'Ilitoana Lia liafo gera malakwaita amiu fafia. 6 Ma lokokwaikwainala God 'e rada, sulia 'i lia kae kwatea famalifiina fala ioli gera malakwaita amiu 'i talasi'e gi li. 7 Ma 'i lia kae lufaa famalifiina gi faasi 'amiu ma 'i 'ameulu lou. 'I lia kae tau 'urifo ala talasi Aofia Jesus kae la mae faasia 'i nali failia eniselo kwalaimoki lia gi, 8 ma failia meamea ala dunaa li. Ma talasi fo, kae kwatea kwaikwaina fala ite ioli gera barasi 'alia God ma iko 'ali gera ronosulia Faronona 'Oka sulia Aofia gia Jesus. 9 Kwaikwaina lia fada osina firi. Ma gera kae io faasia Aofia failia raranala ma nanatana ba'ela lia. 10 Ma 'are fo gi kae fuli ala talasi la 'ua mae ala fe atoa Aofia kae oli lou mae ai. 'I lia kae oli lou mae 'i laola molagali 'e 'ali ioli lia gera fakwalaimoki ala gi, gera ka batafea, ma gera ka soi ba'ela ala. Ma 'amu ka tau lou 'urifo, sulia 'amu fakwalaimokia faronona 'e meulu faarono 'amiu 'alia.
11 Lia 'e taua ma meulu ka foa famiu ala talasi gi sui. Meulu foa 'ali God kae kwatea abulona 'amiu gi ka totolia maurina 'e 'e fili 'amiu fai. Ma meulu ka foa lou 'ali nanata na lia kae rana 'amiu 'ali 'amu saiala taunala 'are 'oka 'amu oga taunali gi. 'Amu oga taunala 'are 'oka fo gi 'i dunala 'amu fakwalaimoki ala Jesus. 12 Meulu foa 'urifo 'ali 'amu batafea Aofia gia Jesus, ma 'i lia kae batafe 'amiu lou. Ma 'are 'e gi kae fuli sulia kwai'ofena God failia Aofia Jesus Christ.