Faronona 'Oka Matthew 'e Gerea
Matthew na wale ala akwala wala rua waleli galona Jesus gi. Matthew 'e gerea buka 'e fala ioli Jiu gi. Fuli ala talasi profet gi 'i laola Alafuuna 'Ualo li, gera alaa sulia God kae kwatea mae te wale li faamauri gera soia 'alia Christ 'a Mesaea. Jiu gi gera kwaimamali maasia. 'Urifo wasua talasi Jesus 'e dao mae gera malata 'ada 'uri 'e, “'I lia iko lou Christ. 'I Lia iko lou Mesaea.” Farasi gi, failia Sadusi gi, ma wale ba'ela Jiu gi li, gera barasi 'alia Jesus. Ioli Jiu gi li gera fia 'uria Christ kae dao 'alia nanatana ba'ela, ma ka 'ilitoa fafia ioli gi sui. Iko 'ali gera fia 'ali 'e totolia Christ ka mae ala 'ai rara folo. Matthew 'e gerea buka 'e 'ali 'e kwairanai ada 'ali gera ka lio raea Jesus lo Christ kwalaimoki, ma 'i lia walelitalona kwalaimoki gera. Talasi afula Matthew 'e fatailia alaana 'i laola Geregerena Abu 'e alaa sulia Christ gi. Ma ka fatailia alaana fo gi gera fatae kwalaimoki, talasi Jesus 'e dao mae ka io 'i laola molagali li.
Me 'are 'ilitoa 'i laola buka 'eli gi li gera 'uri 'e:
Futanala mae Jesus (1:1—2:23)
'I lao ma Jesus ka bi fuli'aea galona lia (3:1—4:11)
Jesus 'e fulia galona lia 'i Galili (4:12—18:35)
Jesus 'e fulia galona lia 'i Judea (19:1—20:34)
Fe atoa 'isi'isi Jesus 'e io 'i Jerusalem gi (21:1—25:64)
Jesus 'e mae ma ka mauri oli lou (26:1—28:20)
1
Isuuna sulia fuiwale lia Jesus 'a Christ
(Luke 3:23-38)
Isuuna sulia Jesus 'a Christ. 'I lia 'e futa ala David walelitalona, wale 'e futa ala kwalofa Abraham li.
Ma isuuna 'e, 'e fuli'ae ala Abraham.
Wela Abraham Aesak,
Aesak 'e alua Jakob,
ma Jakob ka alua Juda failia walefae lia gi.
Ma wela Juda gi Peres failia Sera. (Teite daroa ratala Tama.)
Ma wela Peres Hesron,
Hesron ka alua Ram.
Ram ka alua Aminadab,
Aminadab ka alua Nason,
Nason ka alua Salmon.
Salmon ka alua Boas, ma teite lia ratala Rahab.
Boas ka alua Obed, teite lia ratala Rut.
Obed ka alua Jesi.
Jesi ka alua David walelitalona 'i Israel.
David ka alua Solomon, teite lia 'orula ke wale Iuraea
Solomon ka alua Rihoboam,
Rihoboam ka alua Abaeja,
Abaeja ka alua Asa.
Asa ka alua Jehosafat,
Jehosafat ka alua Joram,
Joram ka alua Iusaea.
Iusaea ka alua Jotam,
Jotam ka alua Ehas,
Ehas ka alua Hesikaea.
10 Hesikaea ka alua Manase,
Manase ka alua Emon,
Emon ka alua Josaea.
11 Josaea ka alua Jekonaea failia ai 'i burila gi. Gera futa ka sui lo malimae gera gi ka bi sakea ioli 'i Israel gi fala falua baela 'i Babilon.
12 'I burila malimae gera gi gera sakea ioli 'i Israel gi fala 'i Babilon, Jekonaea ka bi alua Sialtiel.
Ma Sialtiel ka alua Serababel.
13 Serababel ka alua Abaeud,
Abaeud ka alua Elaeakim,
Elaeakim ka alua Aso.
14 Aso ka alua Sadok,
Sadok ka alua Akim,
Akim ka alua Eliud.
15 Eliud ka alua Elaesa,
Elaesa ka alua Matan,
Matan ka alua Jakob.
16 Jakob ka alua Josef arai Mary teite Jesus lia gera soia lou 'alia Christ, sulia 'i lia lo wale God 'e filia fala walelitalona li.
17 Fuli'ae mae ala Abraham la la ka dao ala David walelitalona, akwala wala fai ului ioli. Sui ka fuli'ae ala David walelitalona la la ka li dao ala talasi ba malimae gera gi gera sakea ioli 'i Israel gi fala 'i Babilon, na akwala wala fai ului ioli lou. Ma ka fuli'ae ala talasi ioli Israel gi gera la fala 'i Babilon la la ka dao ala talasi Jesus Christ 'e futa ai, na akwala wala fai ului ioli lou.
Futanala Jesus Christ
(Luke 2:1-7)
18 Futanala Jesus Christ 'e 'uri 'e: Talasi gera alu fafia Mary teite Jesus 'ala Josef, ma iko 'ali daro io ruru 'ua, Mary ka saiai 'e dodolanaa lo ala Aloe 'are Abu. 19 Ma Josef, wale 'e gera alu fafia 'alaa, 'e malata 'ali ma ka lugasia, sulia 'i lia wale rada. Wasua ma iko 'ali 'e oogaa faa'ekenala 'i maala afulana, ma ka malata 'ali ma ka lugatae agwaagwa mola ala. 20 Wasua ma talasi kae malata mola 'ua 'ala sulia me 'are fo gi li, eniselo God ka fatae fala 'i laola mo'osu bole na ma ka sae 'uri 'e, “Josef 'i'o wale ala kwalofa David li, ikoso mau 'alia tolenala Mary 'ali rau 'alia wateu 'o. Sulia 'e dodolanaa ala Aloe 'are Abu. 21 Ma 'i lia kae faafutaa te wela wale, ma koe fafurataa 'alia Jesus (fadanai ‘Walelifaamauri’), sulia 'i lia kae faamauria ioli lia gi faasia ta'ana gera gi.”
22 Ma 'are 'e gi kae fuli 'ali fakwalaimokia 'are ba God 'e faarono mae 'alida, ala talasi ba profet lia 'e sae 'uri 'e, 23 “Te ulao 'auabua kae dodolanaa ma kae faafutaa te wela wale, ma gera kae soia 'alia Emanuel.” Aesea 7:14 Ma fadanala ratae 'are fo 'e 'uri 'e: “God 'e io fae gia.”
24 Ma talasi Josef 'e ada ai, ka tau lo sulia 'are fo eniselo fo God 'e ilida fala gi. Ma ka tolea lo Mary. 25 Wasua ma iko 'ali daro teo ruru 'ua la la ka dao ala talasi Mary 'e faafutaa wela wale fo li. Ma Josef ka fafurata 'alia Jesus.

1:23 Aesea 7:14