1 Yod hanr liq
Awg meh he lehq phehq peg che awg lawn
Yer suq Khreq muhd nuh maq khod-aq lo kawq taz kawq veh khaz nuhr teq ha khuhq ve awg yand khuhn, ma hez hez che sar lar teq pa awr lehr, Yer suq Khreq awg cehg mag chaw yad phehq che haq mad haq yug lehq, Khreq yad awg mor awg khuhn awg lawn che haq mar yaq che yaog. Duhd khad che ve teq pa vawr, Nawz sa tiq awg mor teq pa ve duhd khad phehq che yaog. Ma hez hez che yonr khad che ve awr lehr, 1 Yod hanr liq haq buhq thad huh phehq chehd che awg lawn phehq che yaog.
Buhq var he lehq buhq che awg yand
Buhq var awr lehr, Yer ber dehd ve yad par Yod hanr yaog. Yawd vawr, Yer suq ve awg laq ghuhd phehq lehq Ha lehg che bon khuhd Yod hanr liq he lehq Pheq mar liq haq buhq var phehq che yaog. Liq che ve te koz haq buhq lar che awg yand kha nehax ma koz chez lar che yaog. Kheh ma khuhd, cawg lar che awg ceng laex ceng haq ngawx ver, A.D. 90 khuhq kheh thad huh buhq lar che yaog lehd sir gha che yaog.
A yed ir che awg lawn he lehq awg lawn kha peg
Yod hanr liq che ve haq buhq thad huh yawd ni ma khuhn te gad che awg ceng nid ceng cawg lehq buhq lar che yaog: (1) Ma hez hez che sar lar teq pa ve awg lawn haq kha nehax pheq mar vid lehq (2) yonr che chaw teq pa haq i hehd awg cehg mag thaer khuhq che haq gha vehr che haq sir vid gad che yaog. Nawz sa tiq ve ma hez hez che sar lar teq pa haq tawr daq tug yawd te gad che khuhn, Yod hanr yawd chaw u ve teq pa haq ded lehq, i hehd awg khuhn daq che duhd khad te khad teq chaweh liz mad cawg che haq kha sehax koz buhq lar che yaog. I hehd ve mar khad vawr, awg ha awr lehr, saw daq lehq med nged jeg kor he lehq chaw yad ve awg ton awr lehr teq chaweh liz mad daq hawg lehd koz mar che yaog. Yod hanr vawr, Jawd mawd Yer suq chaw yad ve awg hoq awg han haq puhd lehq, chaw yad phehq che haq yawd ved mehz sir kha ter tear gha mawg che awg lawn haq yawd sax khiz khanr lehq, Jawd mawd Yer suq chaw yad ve awg hoq awg han he lehq awg suhr awg sar cawg che haq yonr che ted ceng awr lehr, cawd jad che yaog lehd koz che yaog. Yawd ved liq che haq haq yug che chaw teq pa ve yonr che che ve awr lehr, awg cehg mag cawd jad che yaog lehd Yod hanr yawd i hehd haq kha sehax sir vid cuh gad che yaog. Yod hanr i hehd haq koz vid che, yawd duhd law lar che awg ceng che ve haq yawd te gha ver, yawd ha lehg duhd sa jad tug yaog, lehd koz vid che yaog.
Awg lawn nux
1. Khreq awg cehg mag chaw yad ve awg suhr awg sar puhd che (1:1-4)
2. Awr pa Ghig sa he lehq Yad phu haq awg chawd te daq che (1:5-2:28)
3. Yer suq Khreq Ghig sa ve Yad phu phehq che (2:29-4:6)
4. Bon lid sinx khad he lehq Jawd mawd Yer suq Khreq ve awg lawn (4:7-5:12)
5. Ir jad muh jad che Khreq yad teq pa ve duhd law kig (5:13-21)
1
Co ha teq vid che tawd khuhd
1 Awg kawd maq thad loar cawg lar che co ha teq vid che tawd khuhd awg lawn ngag hehd nig hehd haq buhq ax che yaog. Tawd khuhd u ve haq ngag hehd gha kad lehq mehz sir liz gha mawg peg che yaog. Tawd khuhd u ve haq ngag hehd kha nehax ngawx lehq gha vad gha yug ngawx peg che yaog. 2 Co ha teq che u ve tuhaz che haq ngag hehd mehz sir kha tenr ten-ar gha mawg lehq, u ve awg lawn sax khiz khanr che yaog. Awr pa geh cawg che co tiq ha tiq u ve yawd ngag hehd haq pheq mar ax lehq ngag hehd nig hehd haq kawq koz mar ax che yaog. 3 Nig hehd liz ngag hehd geh awg chawd gha te daq tug ngag hehd gha mawg gha kad peg che awg ceng che teq pa nig hehd haq kawq koz mar ax che yaog. A nig awg chawd te daq che awr lehr, Awr pa he lehq yawd ved Yad phu Yer suq Khreq geh awg chawd te daq che ted ceng phehq che yaog. 4 A nig ha lehg che kha peh vad-ag cawg tug, awg lawn che teq pa nig hehd haq buhq fea che yaog.
Ghig sa awg ghiz phehq che
5 Yer suq geh ngag hehd gha kad lehq nig hehd haq koz mar ax che yawd ved tawd khuhd awr lehr, che kheh yaog. Ghig sa awr lehr awg ghiz phehq lehq yawd awg khuhn awg naz tud te che a cehax liz mad cawg. 6 A nig teq pa yawd geh awg chawd te daq chehd che yaog lehd koz liz, awg naz tud khuhn tod kae chehd ser ver, a nig awr lehr her ka chehd lehq awg cehg mag cawd che haq maq te. 7 Kheh ma khuhd Ghig sa awr lehr awg ghiz awg khuhn lo chehd che heh, a nig liz awg ghiz awg khuhn lo tod kae ver, a nig awr lehr te ghad lehq te ghad awg chawd te daq che yaog. Che haq keh lex lehq yawd ved Yad phu Yer suq Khreq ve awg suhr awr lehr a nig ved vend bax awg gha lia haq chuhd kha ax che yaog. 8 A nig teq pa vend bax mad cawg lehd koz ver, a nig a sug mid khad ve awg ton haq her ka lehq a nig awg khuhn lo awg cehg mag cawd che ted ceng mad cawg. 9 A nig teq pa a sug mid khad ve vend bax haq pheq mar vid ver, a nig ved vend bax haq phehd kha ax lehq ma thed ma cawd che awg gha lia haq chuhd kha ax tug, yawd kar tiq yeg lehq thed cawd che yaog. 10 Ngag hehd vend bax maq te jaw lehd koz ver, Ghig sa haq a nig her ka var meh vid lehq yawd ved tawd khuhd a nig awg khuhn lo mad cawg.